កាលពីថ្ងៃទី២០ ខែមេសា ឆ្នាំ២០២១ម្សិលមិញនេះ លោក ថោង ប៊ុនថារី ប្រធានសមាគមសហគ្រិនវ័យក្មេងកម្ពុជា សាខាខេត្តសៀមរាប និង សហការី បាននាំយកម៉ូតូម៉ាក អ៊ឹមស្មាស់ ចំនួន 2គ្រឿង រួមទាំងសម្ភារមួយចំនួនទៀត ដូចជា ៖ ស្រោមដៃស្បែកថៃចំនួន 30គូ , ស្រោមជង្គង់ ថៃចំនួន 30គូ , ស្រោមកែងដៃថៃចំនួន 30គូ , ខ្សែក្រវ៉ាត់សាំងទែរ៉ុងថៃ ចំនួន 30 និង ខ្សែពាក់ឈាងថៃ ចំនួន 30 មកប្រគល់ជូនស្នងការដ្ឋាននគរបាលខេត្តសៀមរាប ក្រោមវត្តមានលោកឧត្តមសេនីយ៍ទោ ទិត្យ ណារ៉ុង ស្នងការ នៃស្នងការដ្ឋាននគរបាលខេត្ត សម្រាប់ប្រើប្រាស់ក្នុងអង្គភាព ។
លោក ថោង ប៊ុនថារី ប្រធានសមាគម បានលើកឡើងថា ម៉ូតូនិងសម្ភារសម្រាប់ប្រើប្រាស់រួមផ្សំនេះ ផ្តល់ជូនស្នងការដ្ឋាននគរបាលខេត្ត ដើម្បីចូលរួមចំណែកជាមួយអាជ្ញាធរខេត្តនិងកម្លាំងនគរបាលខេត្ត យកទៅប្រើប្រាស់នៅ ក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ១៩ ជាពិសេសជួយបំរើក្នុងការល្បាតលើការងាររក្សាសន្តិសុខសណ្តាប់ធ្នាប់សាធារណៈនៅក្នុងខេត្តសៀមរាប និងជាពិសេស ដើម្បីរួមចំណែកក្នុងយុទ្ធនាការ បង្ការ និងទប់ស្កាត់ជំងឺកូវីដ១៩ ដែលបាននឹងកំពុងយាយីនៅក្នុងសហគមន៍នៃបណ្ដារាជធានី ខេត្តមួយចំនួន ។
លោក ថោង ប៊ុនថារី បានលើកឡើងទៀតថា កន្លងមក សមាគមបានរៀបចំសកម្មភាពសប្បុរសធម៌ជាច្រើន ជូនដល់អ្នកដែលជាប់ពាក់ព័ន្ធជាមួយជំងឺកូវីដ-១៩នេះ រួមមាន៖ បានឧបត្ថម្ភសម្ភារប្រើប្រាស់ និងគ្រឿងឧបភោគបរិភោគជាច្រើន ជូនដល់អ្នកជាប់ធ្វើចត្តាឡីស័ក តាមរយៈរដ្ឋបាលខេត្តសៀមរាប និងសាលាស្រុកពួក ព្រមទាំងបានឧបត្ថម្ភជាសម្ភារប្រើប្រាស់នៃយុទ្ធនាការ ដល់ស្នងការស្នងការដ្ឋាននគរបាលខេត្តសៀមរាប នូវនំបុ័ងចំនួន៦០០ដើម ដែលគិតជាទឹកប្រាក់ស្មើនឹង ៦០០ដុល្លារ ដល់គ្រួសារក្រីក្រចំនួន១០០គ្រួសារ ក្នុងសង្កាត់ទាំង៣ នៃខេត្តសៀមរាប ដែលត្រូវបានបិទខ្ទប់ ។
មានប្រសាសន៍ក្នុងឱកាសនោះ លោកឧត្តមសេនីយ៍ទោ ទិត្យ ណារ៉ុង បានសម្ដែងនូវការកោតសរសើរដល់នូវទឹកចិត្តដ៏ប្រពៃថ្លៃថ្លារបស់សមាជិកសមាជិកា សមាគមសហគ្រិនវ័យក្មេងកម្ពុជា សាខាខេត្តសៀមរាប ដែលបានចូលរួមចំណែកចំពោះកង្វះខាតរបស់កងកម្លាំងនគរបាលខេត្តសៀមរាបទាំងមូល តាមយៈការឧបត្ថម្ភសម្ភារជាច្រើន ដល់ស្នងការដ្ឋាននគរបាលខេត្តសៀមរាប ដែលសកម្មភាពសប្បុរសធម៌របស់សមាគមនាពេលនេះ ក៍ដូចជាពេលកន្លងមក បានបង្ហាញពីឆន្ទៈតែមួយ រួមសាមគ្គីគ្នា ដើម្បីថែរក្សាសណ្ដាប់ធ្នាប់សង្គមឱ្យបានល្អ បង្ក្រាបឲ្យបាននូវរាល់រូបភាពអសន្តិសុខណាមួយ ក្នុងន័យស្វែងរកសេចក្ដីសុខជូនពលរដ្ឋ ជាពិសេសនេះ ម៉ូតូនេះគឺ សម្រាប់ប្រើប្រាស់ជាមធ្យោបាយក្នុងការបំពេញប្រតិបត្តិការការងារ អន្តរាគមន៍បានទាន់ពេលវេលា ចំពោះរាល់គ្រប់សភាពការណ៍ ដែលបានកើតឡើងជាក់ស្ដែងនៅមូលដ្ឋាន បម្រើជាផលប្រយោជន៍ដល់ប្រជាពលរដ្ឋ ៕
អត្ថបទ និងរូបភាព ៖ លោក យូ វង្ស
កែសម្រួលអត្ថបទ ៖ លោក លីវ សាន្ត