ឯកឧត្តម ទៀ សីហា អភិបាលខេត្តសៀមរាប បញ្ជាក់ថា នៅថ្ងៃទី២៥ ខែមេសា ឆ្នាំ២០២១នេះ ខេត្តសៀមរាប នៅតែបន្តដាក់ច្រកត្រួតពិនិត្យសុខភាពបឋម និងស្រង់ស្ថិតិអ្នកធ្វើដំណើរឆ្លងកាត់ និងចូលមកកាន់ខេត្តសៀមរាប នៅចំណុចព្រំប្រទល់ស្រុកជីក្រែង-ស្រុកស្ទោង និងព្រំប្រទល់ស្រុកក្រឡាញ់-ស្រុកព្រះនេត្រព្រះដដែល។ ទន្ទឹមនោះ បម្រាមគោចរ ចាប់ពីម៉ោង៨យប់ ដល់ម៉ោង៥ទាបភ្លឺ និង ការបិទខ្ទប់សង្កាត់ទាំង៣ ក្នុងក្រុងសៀមរាប ក៏នៅតែបន្ត អនុវត្តវិធានការរដ្ឋបាលជាបណ្ដោះអាសន្នដដែល ដើម្បីទប់ស្កាត់ការឆ្លងរាលដាល នៃជំងឺកូវីដ-១៩។
ការផ្សព្វផ្សាយនៅលើ ហ្វេសប៊ុកផ្លូវការរបស់ ឯកឧត្តមអភិបាលខេត្តនេះ បន្ទាប់ពីមានសេចក្ដីសម្រេចរបស់រាជរដ្ឋាភិបាលស្ដីពី ការបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស នៅថ្ងៃទីដដែលនេះ។
ការជូនដំណឹងដដែលនេះ ឯកឧត្តមអភិបាលខេត្តក៏បានអំពាវនាវដល់មន្ត្រីរាជការសាធារណៈ កងកម្លាំងប្រដាប់អាវុធគ្រប់ប្រភេទ ក៏ដូចជាបងប្អូនប្រជាពលរដ្ឋទាំងអស់ បន្តការការពារ គោរព និងអនុវត្តន៍តាមវិធានសុវត្ថិភាព និងការណែនាំ របស់រាជរដ្ឋាភិបាល រួមមាន ៣ការពារ: ត្រូវពាក់ម៉ាស់, ត្រូវលាងដៃ, ត្រូវគម្លាតបុគ្គល និង៣កុំ: កុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នា ឲ្យបានខ្ជាប់ខ្ជួន ដើម្បីទប់ស្កាត់ការឆ្លងរាលដាល នៃជំងឺកូវីដ-១៩។
អត្ថបទ៖ លោក សេង ផល្លី
