កាលពីរសៀលថ្ងៃទី២៥ ខែមេសា ឆ្នាំ២០២១ លោក នាក់ ណេរ៉ុន អភិបាលរង តំណាងឯកឧត្តម ទៀ សីហា អភិបាលខេត្តសៀមរាប បានធ្វើការជួបប្រជុំបន្ទាន់មួយ ជាមួយរដ្ឋបាលស្រុកក្រឡាញ់់ និងស្រុកស្រីស្នំ ព្រមទាំងកម្លាំងសមត្ថកិច្ចរួមសហការដទៃទៀត នៅមូលដ្ឋានកងរាជអាវុធហត្ថស្រុកក្រឡាញ់ ខេត្តសៀមរាប បន្ទាប់ពី រាជរដ្ឋាភិបាល បានចេញសេចក្ដីសម្រេចស្ដីពី ការបញ្ចប់ការហាមឃាត់ការធ្វើដំណើរ និងការបញ្ចប់ការបិទរមណីយដ្ឋានទេសចរណ៍នៅទូទាំងប្រទេស ដើម្បីណែនាំដល់អាជ្ញាធរនៅតាមចំណុចគោលដៅចេញ-ចូលខេត្ត រួមមាន សៀមរាប-បន្ទាយជ័យ និង សៀមរាប-កំពង់ធំ ត្រូវបន្តអនុវត្តន៍ និងយកចិត្តទុកដាក់ខ្ពស់បន្ថែមទៀត លើការត្រួតពិនិត្យសុខភាពបឋម និងស្រង់ស្ថិតិអ្នកដំណើរទាំងអស់ ។
លោកអភិបាលរងខេត្ត បញ្ជាក់ថា៖ រយៈពេល១០ថ្ងៃចុងក្រោយនេះ គិតត្រឹមថ្ងៃទី២៥ ខែមេសា ខេត្តសៀមរាប ពុំមានរកឃើញថ្មី វិជ្ជមានកូវីដ-១៩ នោះឡើយ ស្របពេលការបើកការឱ្យធ្វើដំណើរចេញ-ចូល នៅតាមបណ្ដាខេត្តទូទាំងប្រទេស ហាក់បង្ហាញពីភាពប្រសើរឡើងក្នុងការគ្រប់គ្រងការឆ្លងរាលដាលនៃជំងឺកូវីដ-១៩។
ទោះជាយ៉ាងនេះក្ដី រដ្ឋបាលខេត្តសៀមរាប នៅតែបន្តអនុវត្តន៍ បម្រាបគោរចរពីម៉ោង ៨យប់ ដល់ម៉ោង៥ទាបភ្លឺ ការបិទខ្ទប់សង្កាត់ចំនួន៣ រួមមាន សង្កាត់ស្វាយដង្គុំ សង្កាត់សាលាកំរើក និងសង្កាត់សៀមរាប និងការរឹតបន្តឹងច្រកត្រួតចេញ-ចូលខេត្តសៀមរាប រហូតដល់មានសេចក្ដីសម្រេចជាថ្មី ដែលនេះជាវិធានការអាទិភាព ក្នុងការការពារ ទប់ស្កាត់ នៃការឆ្លងរាលដាលជំងឺកូវីដ-១៩។
លោកអភិបាលរងខេត្ត ក៏បានអំពាវនាវឲ្យបងប្អូនអ្នកដំណើរទាំងអស់ សូមផ្ដល់ព័ត៌មានពិត ក្នុងការចុះឈ្មោះ នៅចំណុចគោលដៅត្រួតពិនិត្យសុខភាព ដែលនោះគឺជាការចូលរួមយ៉ាងធំធេងបំផុត ជាមួយអាជ្ញាធរដើម្បីកាត់ផ្តាច់ខ្សែចម្លងកូវីដក្នុងសហគមន៍។
លោកអភិបាលរងខេត្ត បញ្ជាក់បន្ថែមថា៖ ការប្រើប្រាស់វិធានការរឹតបន្តឹងនេះ គឺដើម្បីគាំទ្រសេចក្តីសម្រេចរបស់រាជរដ្ឋាភិបាល ក្នុងការលុបបំបាត់ព្រឹត្តិការណ៍សហគមន៍ និងវិលត្រឡប់មកក្នុងស្ថានភាពអាចគ្រប់គ្រងបាន នៃជំងឺកូវីដ-១៩
នៅកម្ពុជា៕
អត្ថបទ និង រូបភាព៖ លោក ងិន គឹមឡេង និងលោក យូ វង្ស
កែសម្រួល៖ លោក សេង ផល្លី
