នៅថ្ងៃទី២៥ ខែ មេសា ឆ្នាំ២០២១ ក្រុមការងារចំពោះកិច្ចរដ្ឋបាលខេត្តសៀមរាប ដឹកនាំដោយលោក ពិន ប្រាកដ អភិបាលរង នៃគណៈអភិបាលខេត្តសៀមរាប រួមជាមួយមន្ត្រីជំនាញមន្ទីរសុខាភិបាលខេត្ត លោកអភិបាលរងក្រុង និងកងកម្លាំងសមត្ថកិច្ចបានចុះធ្វើការអប់រំផ្សព្វផ្សាយ ដល់អាជីវករនៅក្នុងផ្សារភូមិភាគ៤ ស្ថិតនៅភូមិខ្វៀន សង្កាត់គោកចក ដែលទើបនឹងបើកក្រោយពីពេលបិទខ្ទប់ ដើម្បីឱ្យប្រជាពលរដ្ឋទាំងអស់អនុវត្តវិធានការពាក់ម៉ាស់ឲ្យបានគ្រប់ៗគ្នា។
បើតាមលោក ពិន ប្រាកដ បានបញ្ជាក់ថា ការចុះអប់រំផ្សព្វផ្សាយនៅពេលនេះ ក្រុមការងារបានធ្វើការនាំដល់ប្រជាពលរដ្ឋ ដែលចេញចូលផ្សារ និងតាមទីប្រជុំជន គឺត្រូវពាក់ម៉ាស់ឱ្យបានគ្រប់ៗគ្នា ប្រសិនបងប្អូនមិនចូលរួមពាក់ម៉ាស់នោះទេ ករណីមានការឆ្លងជំងឺកូវី-១៩នោះ នឹងត្រូវបិទផ្សារនេះតែម្តងទៀត។ ជាមួយនោះក្រុមការងារសង្កេតឃើញថា ប្រជាពលរដ្ឋបានចូលរួមពាក់ម៉ាស៩៨ភាគរយ អ្នកខ្លះការប្រើម៉ាស់បានត្រឹមត្រូវ និងអ្នកខ្លះទៀតនៅមិនទាន់បានត្រឹមត្រូវនៅឡើយ ហើយក្នុងនោះគណៈកម្មការនៅមិនទាន់អនុវត្តវិធានការ ក្នុងការផាកពិន័យនូវឡើយទេ គឺគ្រាន់តែចុះមកអប់រំណែនាំបងប្អូនជាបន្តបន្ទាប់ទៀត។
លោក ពិន ប្រាកដ បានឲ្យដឹងទៀតថា បើទោះជាយុទ្ធនាការនេះ បានឈានទៅដល់ការផាកពិន័យនាថ្ងៃខាងមុខ ក៏ប៉ុន្តែអ្វីដែលជាលទ្ធផលចុងក្រោយដែលអាជ្ញាធរខេត្តចង់បាន នោះគឺពុំមែនជាប្រាក់ពិន័យទាំងនោះឡើយ តែគឺការចង់ឃើញប្រជាពលរដ្ឋ ពាក់ម៉ាសបានត្រឹមត្រូវ ដើម្បីការពារអាយុជីវិតទាំងអស់គ្នា។ លោកក៏បានអំពាវនាវឱ្យបងប្អូនប្រជាពលរដ្ឋ បន្តអនុវត្តឱ្យបានខ្ជាប់ខ្ជួន និងកុំមើលស្រាលលើជំងឺដ៏កាចសាហាវនេះ ដោយអនុវត្តវិធានការរបស់ប្រមុខរាជរដ្ឋាភិបាល ៣កុំ និង ៣ការពារ៕
