២ឆ្នាំមកនេះ (២០២០-២០២១) ដោយសារវិបត្តិជំងឺកូវីដ-១៩ កំពុងរីករាលដាលក្នុងសកលលោក ក៏ដូចជានៅកម្ពុជា រាជរដ្ឋាភិបាលបានផ្អាកមិនឲ្យមានការជួបជុំមនុស្សច្រើន ប្រារព្ធពិធីបុណ្យសាសនានានាឡើយ។ ដូច្នេះតាមវត្តអារាមនានា ក្នុងខេត្ត ក៏បានអនុវត្តតាម មិនមានការប្រមូលផ្ដុំព្រះសង្ឃ និងពុទ្ធបរិស័ទច្រើនដូចបណ្តាឆ្នាំមុនទេ ប៉ុន្តែក៏មិនអាចអត់ធ្វើទាំងស្រុងនោះដែរ។ បើពិនិត្យទិដ្ឋភាពនៅតាមទីវត្តអារាមនានាក្នុងខេត្ត ការរៀបចំប្រារព្ធពិធីបុណ្យពិសាខបូជាតាមលំអានព្រះពុទ្ឋសាសនា និងទំនៀមទម្លាប់ប្រពៃណីខ្មែរ ជាធម្មតា ប៉ុន្តែដោយសារបញ្ហាជំងឺកូវីដ-១៩ និងការណែនាំពីវិធានការនានារបស់រាជរដ្ឋាភិបាល និងក្រសួងសុខាភិបាល ដើម្បីទប់ស្កាត់ការឆ្លងរាលដាលជំងឺកូវីដ-១៩នោះ តាមទីវត្តអារាមមិនសូវមានភាពអ៊ូអរ អធិកអធមនោះឡើយ ។
ព្រះសមថមុនី មុត្ត វិបុល ព្រះរាជាគណៈថ្នាក់កិត្តិយស និងជាព្រះចៅអធិការវត្តប្រាសាទលលៃ ស្រុកប្រាសាទបាគងខេត្តសៀមរាបមានសង្ឃដិកា កាលពីថ្ងៃទី២៦ ខែមេសាថា៖ ឆ្នាំមុន និងឆ្នាំនេះ តាំងពីផ្ទុះការឆ្លងជំងឺកូវីដ-១៩ ជាសាកលមក វត្តនេះ នៅបានរៀបចំពិធីបុណ្យពិសាខបូជាជាធម្មតា តែមិនធ្វើពិធីអ្វីធំដុំដូចរាល់ឆ្នាំមុនៗនោះទេ គឺកាត់បន្ថយនូវកម្មវិធីបែបសាសនាមួយចំនួន និងមិនមានការជួបជុំ និងមិនមានដង្ហែរប្រទក្សិណជុំវិញព្រះវិហារនោះដែរ ដោយយោងទៅតាមបទបញ្ជារបស់រាជរដ្ឋាភិបាល ក្រសួងសុខាភិបាលក៏ដូចជាគណ:សង្ឃនាយក បានហាមប្រាមការជួបជុំធំដុំ ដើម្បីចូលរួមទប់ស្កាត់ជំងឺកូវីដ-១៩។ ព្រះសង្ឃព្រះបវរវិជ្ជា ទេព ភឿន ព្រះរាជាគណ:ថ្នាក់កិត្តិយស នៃព្រះរាជាណាចក្រកម្ពុជា និងជាព្រះវិន័យធរគណខេត្តសៀមរាប មានសង្ឃដីកាថា៖ បុណ្យពិសាខបូជាជាពិធីបុណ្យដ៏សំខាន់មួយ ទាំងគ្រហស្ថ និងបុព្វជិតតែងតែនាំគ្នាប្រារព្ឋធ្វើឡើងជារៀងរាល់ឆ្នាំ តែ២ឆ្នាំនេះខុសប្លែកពីបណ្តាឆ្នាំណាៗទាំងអស់ ដោយសារពិធីបុណ្យនេះគេមិនឃើញមានការជួបជុំ និងមិនមានពិធីដង្ហែរមនុស្សច្រើននោះទេ ដោយសារតែកម្ពុជា ក៏ដូចជាពិភពលោកទាំងមូល កំពុងជួបវិបត្តិដោយសារការរីករាលដាលនៃវីរុសកូវីដ-១៩។ ដូចនេះព្រះសង្ឃក៏ចូលរួមបញ្ចៀសបង្ការ និងទប់ស្កាត់ពីការឆ្លងនៃវីរុសនេះទៅកាន់សហគមន៍ និងក្រុមគ្រួសារទើបមិនតម្រូវឱ្យមានការជួបជុំមនុស្សច្រើននោះ។ ផ្ទុយទៅវិញព្រះសង្ឃ និងប្រជាពុទ្ឋបរិស័ទដែលបានចូលរួមត្រូវអនុវត្តនូវវីធានការ ៣ការពារ និង៣កុំ របស់រាជរដ្ឋាភិបាល ។
ព្រះអង្គមានសង្ឃដីកាបញ្ជាក់ថា៖ ពិធីបុណ្យពិសាខបូជា គឺជាបុណ្យមួយយ៉ាងធំនៅក្នុងព្រះពុទ្ធសាសនា អាចរាប់ថាជាពុទ្ធានុស្សរណកិច្ចដ៏សំខាន់សម្រាប់រំឭកដល់ព្រះពុទ្ធសមណគោត្ដម បរមគ្រូជាម្ចាស់ នាថ្ងៃពេញបូណ៌មី គឺថ្ងៃ ១៥ កើត ខែពិសាខ ដែលពុទ្ធសាសនិកទាំងគ្រហស្ថ និងបុព្វជិត តែងធ្វើសក្ការបូជាប្រកបដោយជំនឿថា ជាមហាកុសលដ៏ប្រសើរ។ថ្ងៃ១៥កើត ខែពិសាខ គឺជាថ្ងៃមួយដែលពុទ្ធសាសនិកជននៅទូទាំងសកលលោកបាននាំគ្នាប្រារព្ធពិធីបុណ្យដ៏សំខាន់មួយ នេះផងដែរ។ ប្រការដែលគួរឲ្យកត់សម្គាល់មួយទៀត នៅថ្ងៃទី១៥ ខែធ្នូ ឆ្នាំ១៩៩៩ អង្គការសហប្រជាជាតិដែលមានសមាជិកជិត២០០ប្រទេស បានអនុមត្តជាឯកច្ឆន្ទទទួលស្គាល់និងចាត់ទុកបុណ្យវិសាខបូជាជាបុណ្យអន្តរជាតិមួយផងដែរ៕
អត្ថបទ និងរូបភាព៖យូ វង្ស
កែសម្រួល៖ លីវ សុខុន
