ខណ:ដែលប្រទេសកម្ពុជា កំពុងតែប្រយុទ្ធប្រឆាំងនឹងការរីករាលដាលជំងឺដ៏កាចសាហាវកូវីដ-១៩ ដោយឡែកនៅខេត្តសៀមរាប ក៏បាននឹងកំពុងតែប្រយុទ្ធប្រឆាំងនឹងជំងឺនេះយ៉ាងសស្រាកសស្រាំផងដែរ ក្នុងបរិបទនេះ អាជ្ញាធរខេត្តទាមទារឱ្យមានការចូលរួមពីថ្នាក់ដឹកនាំគ្រប់លំដាប់ថ្នាក់ ពាណិជ្ជករ អ្នកវិនិយោគិន វិស័យឯកជន និងប្រជាពលរដ្ឋ ទាំងកម្លាំងកាយ ទាំងស្មារតី និងសម្ភារ: ដើម្បីរួមជាមធ្យោបាយ ក្នុងការទប់ស្កាត់ និងលុបបំបាត់ជំងឺនេះឱ្យអស់ជាស្ថាពរ។
ឆ្លើយតបទៅនឹងវិបត្តិខាងលើ ឯកឧត្តម អ្នកឧកញ៉ា សៀងណាំ តំណាងរាស្ត្រមណ្ឌលសៀមរាប និងលោកជំទាវ បាននាំយកអំណោយជា គ្រឿងឧបភោគបរិភោគ ទៅប្រគល់ជូនឯកឧត្តម ទៀ សីហា អភិបាល នៃគណ:អភិបាលខេត្តសៀមរាប នារសៀលថ្ងៃទី១២ ខែឧសភា ឆ្នាំ២០២១នេះ ដើម្បីចូលរួម និងឆ្លើយតបទៅនឹងសេចក្តីការរបស់រដ្ឋបាលខេត្ត សម្រាប់បែងចែកជូនដល់ក្រុមការងារ អាជ្ញាធរមូលដ្ឋាន កម្លាំងប្រដាប់អាវុធ និងបងប្អូនប្រជាពលរដ្ឋជួបការលំបាកក្នុងជីវភាពប្រចាំថ្ងៃ ដោយសារវិបត្តិ នៃការរីករាលដាលជំងឺកូវីដ-១៩ ដែលអំណោយទាំងនោះរួមមាន÷ អង្ករចំនួន ២០តោន, ត្រីខ ១០០កេស និងទឹកបរិសុទ្ឋ ១៥០កេស ។
ឯកឧត្តម អ្នកឧកញ៉ា សៀង ណាំ មានប្រសាសន៍ថា៖ សម្ភារស្បៀងអាហារទាំងនេះ ជាការជួយសម្រាលបន្ទុកដល់អាជ្ញាធរខេត្ត ក្នុងការបែងចែកដល់ក្រុមការងារគ្រប់ទីកន្លែងក្នុងខេត្ត ដើម្បីជួយសម្រាលទុក្ខលំបាក និងជួយដោះទ័លរបស់ប្រជាពលរដ្ឋដែលជួបការខ្វះខាតជាក់ស្តែង ។ ឯកឧត្តម បានផ្តំាផ្ញើដល់ប្រជាពលរដ្ឋគ្រប់ទីកន្លែងទាំងអស់ ឱ្យបន្តគោរពតាមការណែនាំរបស់ក្រសួងសុខាភិបាល ក៏ដូចជាប្រសាសន៍ណែនាំរបស់សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ស្តីពីការចូលរួមប្រយុទ្ធប្រឆាំងនឹងជំងឺកូវីដ -១៩ ជាពិសេសវិធានការ ៣កុំ ៣ការពារ ឱ្យបានម៉ឺងម៉ាត់បំផុត។
ក្នុងនាមអាជ្ញាធរខេត្ត ក្រុមប្រឹក្សាខេត្ត និងប្រជាពលរដ្ឋក្នុងខេត្តសៀមរាប ឯកឧត្តម ទៀ សីហា អភិបាល នៃគណ:អភិបាលខេត្ត បានបង្ហាញនូវក្តីសោមនស្សរីករាយ ចំពោះទឹកចិត្តដ៏ឧត្តុងឧត្តម របស់ឯកឧត្តម អ្នកឧកញ៉ា សៀង ណាំ និងលោកជំទាវ ដែលបានលះបង់នូវធនធានផ្ទាល់ខ្លួន ចូលរួមយ៉ាងធំធេងក្នុងពេលដែលយើងទាំងអស់គ្នាកំពុងប្រឈម និងជួបការលំបាកដោយសារវិបត្តិជំងឺកូវីដ-១៩ ចូលរួមចំណែកជាមួយរាជរដ្ឋាភិបាល ជាពិសេសរដ្ឋបាលខេត្តសៀមរាប។ រដ្ឋបាលខេត្ត នឹងយកអំណោយទាំងអស់នេះ ប្រើប្រាស់ឱ្យចំគោលដៅសំខាន់ៗ និងបែងចែងជូនប្រជាពលរដ្ឋកំពុងធ្វើចត្តាឡីស័ក និងពលរដ្ឋដែលខ្វះខាតនៅក្នុងអំឡុងពេលធ្វើយុទ្ធនាការប្រយុទ្ធប្រឆាំងនឹងជំងឺកូវីដ-១៩ គឺព្រឹត្តិការណ៍ ២០កុម្ភ: ទៅតាមលទ្ឋភាពដែលរដ្ឋបាលខេត្តមាន ។
ឯកឧត្តម ទៀ សីហា ក៏បានបង្ហាញនូវក្តីបារម្ភពីសុខទុក្ខរបស់បងប្អូនប្រជាពលរដ្ឋក្នុងទូទាំងខេត្តសៀមរាប ជាមួយនឹងការប្រឈមទៅនឹងវិបត្តិជំងឺកូវីដ-១៩ ដែលទាំងអស់គ្នាត្រូវតែចូលរួមការពារ ទប់ស្កាត់បញ្ហានេះទាំងអស់គ្នា មិនមែនជាបញ្ហារបស់បុគ្គលណាម្នាក់ឡើយ។ ឯកឧត្តម បញ្ជាក់បន្ថែមថា បច្ចុប្បន្នរដ្ឋបាលខេត្តសៀមរាប បាននឹងកំពុងយកចិត្តទុកដាក់អនុវត្តវិធានការបង្ការទប់ស្កាត់ការឆ្លងរីករាលដាលជម្ងឺកូវីដ-១៩ ចូលដល់សហគមន៍ តាមបទបញ្ជារបស់ប្រមុខរាជរដ្ឋាភិបាល និងវិធានការណែនាំរបស់ក្រសួងសុខាភិបាល ក៏ដូចជាក្រសួងមហាផ្ទៃបានយ៉ាងល្អប្រសើរ ។ ជាក់ស្តែងក្រៅពីការរៀបចំមណ្ឌលចត្តាឡីស័កនៅតាមបណ្តាក្រុង ស្រុក អាជ្ញាធរ ខេត្តក៏បានធ្វើការរឹតបន្តឹង នៅតាមបណ្តាច្រកព្រំប្រទល់រវាងខេត្តសៀមរាប និងកំពង់ធំ បន្ទាយមានជ័យ ឧត្តរមានជ័យ ក្នុងការពិនិត្យតាមដានសុខភាពបឋម របស់អ្នកដំណើរចូលមកខេត្តនេះ ដើម្បីតាមដានគ្រប់គ្រង និងកាត់ផ្តាច់ខ្សែចម្លងជម្ងឺកូវីដ-១៩ ឲ្យមានប្រសិទ្ធភាព និងការទទួលខុសត្រូវខ្ពស់៕
អត្ថបទ និងរូបភាព៖ យូ វង្ស
កែសម្រួល៖ លីវ សុខុន
