រដ្ឋបាលខេត្តសៀមរាប បានចេញសេចក្តីប្រកាសព័ត៌មានមួយជម្រាបជូនដល់សាធារណជនក្នុងន័យថា៖ ក្នុងព្រឹត្តិការណ៍ ឆ្លងរាលដាលជំងឺកូវីដ-១៩ ចូលក្នុងសហគមន៍២០កុម្ភ: នេះ ខេត្តសៀមរាប បានរកឃើញអ្នកវិជ្ជមានជំងឺកូវីដ-១៩ ថ្មីទៀតចំនួន ២នាក់ កាលពីថ្ងៃទី១២ ខែឧសភា ឆ្នាំ២០២១ ដូចមានរាយនាមខាងក្រោម៖ ទី១.ឈ្មោះ រឿន គឹមសាក់ ភេទស្រី អាយុ ៣០ឆ្នាំ មានអាសយដ្ឋាននៅភូមិគោកត្រាច ឃុំខ្នាត ស្រុកពួក ជាករណីពាក់ព័ន្ធជាមួយឈ្មោះ លីស ជី អ្នកវិជ្ជមានជំងឺកូវីដ-១៩ កាលពីថ្ងៃទី០៤ ខែឧសភា ឆ្នាំ២០២១។ សូមបញ្ជាក់ថាឈ្មោះ រឿន គឹមសាក់ បានអនុវត្តចត្តាឡីស័កដោយខ្លួនឯង ក្រោយពេលដឹងថាខ្លួនមានពាក់ព័ន្ធដោយផ្ទាល់ជាមួយឈ្មោះ លីស ជី។ តែអំឡុងពេលនៃការស្រាវជ្រាវរកអ្នកពាក់ព័ន្ធជាមួយអ្នកវិជ្ជមាន ដែលបម្រើការងារនៅមន្ទីរសម្រាកព្យាបាល គង់ រិទ្ធី II គឺអ្នកវិជ្ជមានឈ្មោះ លីស ជី ក៏ដូចជាអ្នកគ្រប់គ្រងមន្ទីរសម្រាកព្យាបាលនេះ ពុំបានបង្ហាញអត្តសញ្ញាណ បុគ្គលវិជ្ជមានថ្មីនេះឡើយ។ ទី២.ឈ្មោះ កៅ ពិភព ភេទប្រុស អាយុ២៤ឆ្នាំ មានអាសយដ្ឋាននៅភូមិវាល សង្កាត់សំបួរ ក្រុងសៀមរាប ធ្វើដំណើរមកពីរាជធានីភ្នំពេញ មកដល់ខេត្តសៀមរាប នៅវេលាម៉ោងប្រហែល១៥៖០០នាទី ថ្ងៃទី១២ ខែឧសភា ឆ្នាំ២០២១។ ចំពោះអ្នករួមដំណើរជាមួយឈ្មោះ កៅ ពិភព ត្រូវបានសមត្ថកិច្ចកំណត់អត្តសញ្ញាណ និងត្រូវបានក្រុមគ្រូពេទ្យណែនាំឱ្យធ្វើចត្តាឡីស័ករយ:ពេល១៤ថ្ងៃ ដើម្បីតាមដានសុខភាពបន្ត បន្ទាប់ពីយកសំណាកទទួលបានលទ្ធផលអវិជ្ជមាន។
ពាក់ព័ន្ធករណីទីមួយនេះ គណ:បញ្ជាការឯកភាពរដ្ឋបាលខេត្ត សម្រេចបិទការចេញ-ចូលជាបណ្ដោះអាសន្ន ប៊ូទិច សាយនីង អង្គរ ស្ថិតនៅភូមិត្រពាំងសេះ សង្កាត់គោកចក ក្រុងសៀមរាប ដែលជាកន្លែងបម្រើការងាររបស់អ្នកវិជ្ជមានជំងឺកូវីដ-១៩ រឿន គឹមសាក់។ មកទល់ពេលនេះ ខេត្តសៀមរាប មានអ្នកវិជ្ជមានជំងឺកូវីដ-១៩ ចំនួន៧៨នាក់ បានព្យាបាលជាសះ-ស្បើយចំនួន ២០នាក់ ស្លាប់១នាក់ និង៥៧នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប។
រដ្ឋបាលខេត្ត ក៏បានអំពាវនាវឱ្យបងប្អូនប្រជាពលរដ្ឋរស់នៅក្នុងខេត្ត ត្រូវបង្កើនការប្រុងប្រយ័ត្នខ្ពស់ ក្នុងការចូលរួមអនុវត្តវិធានការ ៣ការពារ ៣កុំ និងត្រូវអនុវត្តកាតព្វកិច្ចពាក់ម៉ាស និងកាតព្វកិច្ចរក្សាគម្លាតសុវត្ថិភាព ជាពិសេសត្រូវអនុវត្តវិធានការរដ្ឋបាល និងវិធានការចត្តាឡីស័កឱ្យបានខ្ជាប់ខ្ជួនបំផុត។ ក្នុងករណីបុគ្គលទាំងឡាយណាប្រព្រឹត្តល្មើសនឹងវិធានការនេះ នឹងប្រឈមការពិន័យអន្តរការណ៍ ឬផ្តន្ទាទោសតាមច្បាប់ និងលិខិតបទដ្ឋានគតិយុត្តជាធរមាន។
ជាមួយគ្នានេះ រដ្ឋបាលខេត្ត សូមជម្រាបជូនបងប្អូនប្រជាពលរដ្ឋ ដែលមានការពាក់ព័ន្ធដោយផ្ទាល់ ឬដោយប្រយោលជាមួយអ្នកវិជ្ជមាន ឬធ្លាប់បានចេញ-ចូល ប៊ូទិច សានីង អង្គរ ចាប់ពីថ្ងៃទី០១ ខែឧសភា ឆ្នាំ២០២១ សូមរួសរាន់ធ្វើចត្តាឡីស័ក នៅតាមផ្ទះក្នុងក្រុមគ្រួសាររៀងៗខ្លួន ដោយមិនត្រូវពាក់ព័ន្ធ ឬប៉ះពាល់ជាមួយអ្នកដទៃជាដាច់ខាត។ ប្រសិនបើមានការប្រែប្រួលសុខភាព សូមផ្តល់ព័ត៌មានមកកាន់លេខទូរស័ព្ទ ០១២ ៩៥៥ ៤៧៤/០៧៧ ៧៨៩ ០០៧ ដើម្បីក្រុមការងារចាត់វិធានការក្នុងការយកសំណាកធ្វើតេស្តស្រាវជ្រាវរកមេរោគនេះ។ រដ្ឋបាលខេត្តសៀមរាប សង្ឃឹមយ៉ាងមុតមាំថា បងប្អូនប្រជាពលរដ្ឋទាំងអស់ ចូលរួមអនុវត្តបានម៉ឺងមាត់ និងអនុវត្តនូវវិធានការការពាររបស់រាជរដ្ឋាភិបាល និងការណែនាំរបស់ក្រសួងសុខាភិបាល បានល្អប្រសើរ៕
អត្ថបទ និងរូបភាព៖ ឈិត សាវី ,ជា ស្រស់
កែសម្រួល៖ លីវ សុខុន
