នៅថ្ងៃទី០៧ ខែមិថុនា ឆ្នាំ២០២១ លោក ពិន ប្រាកដ អភិបាលរងខេត្តសៀមរាប បានដឹកនាំគណៈកម្មការចម្រុះខេត្ត សៀមរាប ចុះទៅពិនិត្យ ទីតាំងក្រុមហ៊ុនលាយស៊ីម៉ង់ត៍ ស៊ី ផិក ខេមបូឌា ស្ថិតនៅភូមិកសិកម្ម សង្កាត់ស្រង៉ែ ក្រុងសៀមរាប បន្ទាប់ពីទទួលបានលិខិត របស់ក្រសួងមហាផ្ទៃ ស្ដីពីករណីប្រជាពលរដ្ឋ បានផ្ញើសារចូល ហ្វេសប៊ុក ផេកផ្លូវការរបស់ សម្តេចក្រឡាហោម ស ខេង ពាក់ព័ន្ធករណីរថយន្តក្រឡុកស៊ីម៉ង់ត៍ ឈ្មោះ ស៊ីផិក បានបង្ហូរទឹកស៊ីម៉ង់ត៍ពីក្នុងរថយន្តទៅលើផ្លូវថ្នល់ ដែលបង្កឱ្យមានធូលីហុយ នៅពេលធ្វើចរាចរណ៍ និងពុំបានស្រោចទឹក ដែលធ្វើឱ្យប៉ះពាល់ដល់ប្រជាពលរដ្ឋនៅក្នុងតំបន់នោះ។
បន្ទាប់ពីបានចុះត្រួតពិនិត្យទីតាំងក្រុមហ៊ុននេះ មន្រ្តីជំនាញនៃគណៈកម្មការចម្រុះ បានណែនាំដល់ម្ចាស់ទីតាំង ត្រូវបំពេញបន្ថែមនូវបទដ្ឋានគតិយុត្តមួយចំនួន ដែលនៅខ្វះខាត ពាក់ព័ន្ធទៅនឹង បញ្ហាបរិស្ថាននៅក្នុងបរិវេណនៃក្រុមហ៊ុននេះ ជាពិសេសការបញ្ចេញកាកសំណល់បេតុង ដើម្បីជៀសវាង ផលប៉ះពាល់ដល់ប្រជាពលរដ្ឋ ឬទីសាធារណៈ។
លោក តាន់ សុភ័ក្រ្ត អ្នកគ្រប់គ្រង របស់ក្រុមហ៊ុន ស៊ីផិក ខេមបូឌា បានឱ្យដឹងថា ក្រុមហ៊ុន របស់លោក មានច្បាប់លិខិតបទដ្ឋានគ្រប់គ្រាន់ ទាំងច្បាប់អនុញ្ញាតធ្វើអាជីវកម្ម ប៉ាតង់ និង ច្បាប់ទីតាំង។ លោកក៏បានឱ្យដឹងទៀតថា ចំពោះករណីទឹកហូរចេញពីការដ្ឋានទៅកាត់ផ្លូវនោះ គឺពុំមានឡើយនាពេលបច្ចុប្បន្ននេះ ដោយក្រុមហ៊ុនបាន រៀបចំអាងចំនួនពីរ ដើមី្បតំកល់ទឹកយកមកបម្រើការលាយបេតុង រីឯកាកសំណល់បេតុង ដែលនៅសេសសល់ ក្នុងឧបករណ៍ក្រឡុកស៊ីម៉ង់ត៍ នៅលើរថយន្ត ក៏មិនបានធ្វើការចាក់បាញ់លាងចោលខាងក្រៅឡើយ ដោយមានអាងស្តុកមួយ សម្រាប់ លាងសម្អាត និងផ្ទុកកាកសំណល់ទាំងនោះ ។
ព័ត៌មានជាតិ ថ្មីៗ
អ្នកគ្រប់គ្រងរូបនេះ ក៏បានលើកឡើងផងដែរថា ក្នុងពេលកន្លងមកក្រុមហ៊ុន ក៏បានសាងសង់ផ្លូវចាក់បេតុង ក្នុងភូមិកសិកម្មនេះ ដើមី្បកាត់បន្ថយដីហ៊ុយក្នុងភូមិ ដែលប៉ះពាល់សុខភាពប្រជាពលរដ្ឋ។ មួយវិញទៀត អំឡុងពេល ស្ថាបនាផ្លូវ៣៨ខ្សែ ក្នុងរយៈពេល០៦ខែ ក្នុងក្រុងសៀមរាបកន្លងមកនេះ ក៏បានបង្កឱ្យមានដីហ៊ុយផងដែរ។ ទន្ទឹមនោះ ក្រុមហ៊ុន ក៏បានបំពាក់ឧបករណ៍វាស់ល្បឿន នៅលើរថយន្ត ដើម្បីកំណត់ល្បឿន ចៀសវាងកើតមានករណីគ្រោះថ្នាក់ចរាចរណ៍ នៅតាមដងផ្លូវសាធារណៈ។
អត្ថបទ និង រូបថត ៖ លោក ឃុត សៅ និងលោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
