ក្នុងកិច្ចប្រជុំសាមញ្ញប្រចាំសប្តាហ៍ នាទីស្ដីការក្រសួងព័ត៌មាន ព្រឹកថ្ងៃទី៧ ខែមិថុនា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានបង្ហាញការគាំទ្រ ចំពោះគម្រោងបង្កើតកម្មវិធីប្រដាល់ របស់ស្ថានីយ៍ទូរទស្សន៍ ជាតិកម្ពុជា ការផ្សព្វផ្សាយដំណឹងរបស់ទីភ្នាក់ងារសារ ព័ត៌មានកម្ពុជា (AKP) កម្មវិធីផ្សាយរបស់វិទ្យុជាតិកម្ពុជា ព្រមទាំងវឌ្ឍនភាពការងារនានា របស់អគ្គនាយកដ្ឋានទាំង៥ ដែលសម្រេចបាននាពេលកន្លងមក។
ក្នុងនោះដែរ ឯកឧត្តម រដ្ឋមន្រ្តី ខៀវ កាញារីទ្ធ បានណែនាំដល់ ថ្នាក់ដឹកនាំគ្រប់ផ្នែក ពិសេសទូរទស្សន៍ជាតិកម្ពុជា ត្រូវបន្តយកចិត្តទុកដាក់សម្រាប់ការរៀបចំ កម្មវិធីប្រកួត រ៉ូបូត ប្រចាំឆ្នាំ កម្មវិធីស្នាដៃគំនូរជីវចល ព្រមទាំងត្រូវពិនិត្យមើលនូវលទ្ធភាព ក្នុងការរៀបចំកម្មវិធីខាងលើឡើងវិញនៅក្នុងឆ្នាំ២០២១នេះ ដើម្បីធ្វើការពង្រឹងគុណភាពកម្មវិធី ឱ្យកាន់តែល្អ និងមានការចូលរួមប្រកួត និងគាំទ្រ បានកាន់តែច្រើនបន្ថែមទៀត ។
បន្ថែមពីនេះ ឯកឧត្តមរដ្ឋមន្រ្តី ក៏បានណែនាំ ដល់គណ:កម្មការបណ្តុះបណ្តាលវិក្រិត្យការ និង វិជ្ជាជីវ: លើកជាគម្រោងរៀបចំជាសិក្ខាសាលា និង បើកវគ្គបណ្តុះបណ្តាល ដោយផ្តោតជា សំខាន់នៅលើតូនាទី របស់អ្នកសារព័ត៌មាន នៅការអនុវត្តន៍វិជ្ជាជីវ: និងកិច្ចសហការ ជាមួយ អាជ្ញាធរមានសមត្ថិកច្ច ក្នុងការបំពេញកិច្ចការងារ ប្រកបដោយភាពត្រឹមត្រូវ ។ ទន្ទឹនេះ ត្រូវ សិក្សាស្វែងយល់អំពីទិដ្ឋភាពច្បាប់ បទដ្ឋានគតិយុត្តផ្សេងៗ ដែលបំពេញដល់តូនាទីភារកិច្ច របស់អ្នកសារព័ត៌មាន ជាពិសេសគឺការត្រៀមរៀបចំ ការស្វែងយល់ ការប្រើប្រាស់ច្បាប់ នៅក្នុងវិស័យសារព័ត៌មាននៅកម្ពុជា ដើម្បីបម្រើផលប្រយោជន៍ដល់អ្នកសារព័ត៌មាន ដែលកំពុងបំពេញការងារប្រកបដោយក្រមសីលធម៌ វិជ្ជាជីវ:ត្រឹមត្រូវ ឱ្យកាន់តែមានតម្លៃ និងគុណភាព។
ប្រភព ៖ ក្រសួងព័ត៌មាន
អត្ថបទ៖ មន្ទីរព័ត៌មានខេត្តសៀមរាប
