ក្រោមការផ្តល់កិច្ចសហការអន្តរាគមន៍ដោយក្រសួងកសិកម្ម ដែលមានមន្រ្តីរដ្ឋបាលជលផលចុះផ្ទាល់ផងនោះ នៅថ្ងៃទី០៦ ខែមិថុនា ឆ្នាំ២០២១នេះ អាជ្ញាធរសង្កាត់ជ្រាវ នៃក្រុងសៀមរាប និងសហគមន៍បឹងពារាំងបានដំណើរការជីកប្រឡាយនាំទឹកចេញពីស្រះមួយចំនួន ទៅជួយសង្គ្រោះបន្ទាន់ជីវិតត្រីមេពូជចម្រុះនៅក្នុងតំបន់អភិរក្សបឹងពារាំង ដែលកំពុងស្ថិតក្នុងស្ថានភាពគ្រោះថ្នាក់ ដោយសារតែកត្តាធម្មជាតិ គឺផ្ទៃបឹងរីងរាក់ និងអាកាសធាតុហួតហែង។
បើតាមលោក គង់ មង្គល ប្រធានសហគមន៍បឹងពារាំង បានឱ្យដឹងថា រយៈពេល៣យប់កន្លងមកនេះ ត្រីមេពូជក្នុងបឹងពារាំងចាប់ផ្តើមងាប់ជាបណ្តើរៗ ដោយក្នុងមួយយប់ៗ អាចក្នុងចំនួនប្រមាណជា៥០ក្បាល ស្មើនឹងប្រហែលជិត១០០គីឡូក្រាម។ ជាមួយគ្នានេះដែរកាលណាទឹកបឹងរីងរាក់បែបនេះ មិនត្រឹមតែត្រីមេពូជទេដែលងាប់ ក៏ប៉ុន្តែវាក៏ត្រូវប្រឈមនឹងការយាយីដោយសត្វភេរផងដែរ ដែលសត្វភេរទាំងនោះ មានប្រមាណជា១០០ក្បាលនៅក្នុងតំបន់នេះ។ វាគឺជាការជួយសង្គ្រោះបឋម ដែលអាចបន្តឲ្យត្រីមេពូជទាំងនេះ មានដង្ហើមរស់ក្នុងរយៈពេលប្រហែលជា ១៥ថ្ងៃទៀតប៉ុណ្ណោះ ប្រសិនបើគ្មានភ្លៀងធ្លាក់ទេនោះ វាជាគ្រោះអាសន្នយ៉ាងធ្ងន់ធ្ងរបំផុតដែលមិនធ្លាប់មាន សម្រាប់ជីវិតត្រីមេពូជនៃតំបន់អភិរក្សបឹងពារាំង។ លោកថា លើសពី១៥ថ្ងៃខាងមុខ ជម្រើសចុងក្រោយ គឺមានតែស្នើទៅគណៈអភិបាលខេត្តសៀមរាប សុំរថយន្តដឹកទឹក យកមកបញ្ជូលក្នុងបឹងនេះ ដែលមធ្យោបាយនេះ វាជាក្តីសង្ឃឹមដ៏តិចតួច ដើម្បីសង្គ្រោះត្រីមេពូជឆ្នាំនេះ និងជាមេរៀនពិសោធន៍សម្រាប់ឆ្នាំបន្ទាប់។
លោក គង់ មង្គល បញ្ជាក់ថា ការទន្ទឹងចាំទឹកភ្លៀងជារឿងមួយ ប៉ុន្តែសម្រាប់សហគមន៍ ក៏ដូចជាមន្ត្រីជំនាញ មិននៅស្ងៀមទេ ដោយក្រុមការងារបានខិតខំរកវិធីសង្គ្រោះបឋមដល់ត្រីមេពូជដែលកំពុងរស់នៅជាមួយទឹកបឹងដ៏តិចតួចនេះ។ ក្នុងនោះសកម្មភាពសង្គ្រោះបឋមនោះ មានការបូមទឹកពីស្រះតូចៗចូលទៅក្នុងបឹង ការជីកជាប្រឡាយនៅក្នុងផ្ទៃបឹងជាដើម។
ព័ត៌មានជាតិ ថ្មីៗ
អត្ថបទ និង រូបភាព៖ លោក ងិន គីមឡេង ,លោក ជា ស្រស់
កែសម្រួលអត្ថបទ៖ លោក អ៊ុន ណារាជ្យ
