ស្របពេលដែលមន្ត្រីនគរបាលនៃអធិការដ្ឋានក្រុងសៀមរាបចំនួន៣៣នាក់ ដែរបានជួបប៉ះពាល់ដោយផ្ទាល់ និងដោយប្រយោលជាមួយកម្លាំងនគរបាលស្រុកសូទ្រនិគម បាននឹងកំពុងធ្វើចត្តាឡីស័ក ដោយយកសំណាកវិភាគលើកទី១ កាលពីថ្ងៃទី០៥ ខែមិថុនា លទ្ឋផលអវិជ្ជមានទាំងអស់គ្នាហើយនោះ នៅថ្ងៃទី០៨ ខែមិថុនា ឆ្នាំ២០២១ ត្រូវបានប្រតិភូសង្ឃក្នុងខេត្តសៀមរាប នាំយកអំណោយជាគ្រឿងឧបភោគបរិភោគ និងសម្ភារៈប្រើប្រាស់ ប្រគល់ជូនដើម្បីប្រើប្រាស់ប្រចាំថ្ងៃក្នុងរយៈពេលនៃការធ្វើចត្តាឡីស័ក ១៤ថ្ងៃនេះ ដោយអំណោយជាគ្រឿងឧបភោគបរិភោគ និងសម្ភារៈប្រើប្រាស់ក្នុងនោះរួមមាន៖ អង្ករ២០០គីឡូក្រាម ,មី២៥កេសតូច ,ទឹកត្រី៥យួរ ,ទឹកស៊ីអ៊ីវ៥យួរ ,ត្រីខ១យួរ ,ស្ករស៧គីឡូក្រាម ,ទឹកក្រូច២កេស ,ទឹកបរិសុទ្ឋ២៥កេស ,ចានបាយ៦០ចាន ,ចានសម្ល៦០ចាន និងកាហ្វេមួយចំនួនទៀត។
ព្រះធម្មានុរ័ក្ខញាណ ស៊ុម ពិសិដ្ឋ ព្រះសមុហ៍គណខេត្ត និងជាព្រះចៅអធិការវត្តប្រាសាទច័ន្ទរង្សី មានថេរដីកាថា អំណោយជាគ្រឿងឧបភោគបរិភោគ និងសម្ភារៈប្រើប្រាស់ដែលបាននាំយកមកប្រគលជូនពេលនេះបានមកពីការចូលរួមរបស់ព្រះសង្ឃក្នុងខេត្ត និងប្រជាពុទ្ឋបរិស័ទជិតឆ្ងាយដែលយកមកប្រគេននាពេលកន្លងមក ហើយព្រះចៅអធិការវត្តទាំងនេះបានសន្សំសំចៃទុកសម្រាប់ធ្វើការបែងចែកទៅតាមលទ្ឋភាពដែលព្រះសង្ឃមាន យកចែករំលែក និងចូលរួមជាមួយរាជរដ្ឋាភិបាល ក្នុងការទប់ស្កាត់កាត់បន្ថយការឆ្លងជំងឺកូវីដ-១៩ ដែលកំពុងបង្កហានិភ័យដោយគម្រាមកំហែងមកលើសុខភាព និងអាយុជីវិតប្រជាជនកម្ពុជានាពេលបច្ចុប្បន្ន។ ជាមួយនោះអំណោយជាគ្រឿងឧបភោគបរិភោគ និងសម្ភារៈប្រើប្រាស់ដែលបាននាំយកមកនេះ វាគឺជាការចែករំលែកជួយគ្នាក្នុងគ្រាលំបាកទៅតាមលទ្ឋភាព ដែលក្រុមព្រះសង្ឃមានព្រោះថា ជារឿយៗព្រះសង្ឃនៃខេត្តសៀមរាបតែងតែបានចូលរួមក្នុងសកម្មភាពសង្គមជាច្រើន ដែលឆ្លុះបង្ហាញឲ្យឃើញថា វិស័យពុទ្ធិចក្រ និង វិស័យអាណាចក្រ ត្រូវបានផ្សាភ្ជាប់ និងមានទំនាក់ទំនងគ្នាយ៉ាងជិតស្និទ មិនអាចកាត់ផ្តាច់ចេញពីគ្នាបាននោះឡើយ។
ក្នុងឱកាសនោះដែរ ព្រះតេជគុណ ក៏បានអំពាវនាវដល់បងប្អូនសមត្ថកិច្ចដែលកំពុងធ្វើចត្តាឡីស័កនៅទីនេះក៍ដូចជាប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព នាំគ្នាហាត់ប្រាណ និងសូមប្រុងប្រយ័ត្នដោយមិនត្រូវមើលស្រាលចំពោះមេរោគកូវីដ-១៩ ទេ និងត្រូវអនុវត្តបានត្រឹមត្រូវជាប្រចាំនូវវិធានការណែនាំរបស់ក្រសួងសុខាភិបាល ស្តីពីការការពារ ការទប់ស្កាត់ និងបង្ការការសម្លងជំងឺកូវីដ-១៩ ជាពិសេសអនុវត្តឱ្យបានជាប្រចាំនូវវិធានការរបស់ប្រមុខរាជរដ្ឋាភិបាល គឺ៣ការពារ និង៣កុំ ដោយអនុវត្តឱ្យបានគ្រប់ៗគ្នា៕
អត្ថបទ និង រូបភាព៖ លោក យូ វង្ស
កែសម្រួលអត្ថបទ៖ លោក អ៊ុន ណារាជ្យ
