ក្រុមការងារអាជ្ញាធរជាតិអប្សរា កំពុងមមាញឹក ក្នុងការកែលម្អផ្លូវថ្មើរជើង និងទេសភាពនៅខាងមុខប្រាសាទលានជល់ដំរី ដើម្បីលើកសោភណ្ឌភាពប្រាសាទបុរាណ និងធ្វើយ៉ាងណា ដើម្បីទាក់ទាញអ្នកទេសចរណ៍ ដែលមកដល់ពេលនេះ បានសម្រេចប្រមាណជាង៦០%ហើយ ។
លោក សោម សុផារ៉ាត អនុប្រធាននាយកដ្ឋានទ្រទ្រង់បច្ចេកទេស និងគម្រោងអន្ដរវិស័យ នៃអាជ្ញាធរជាតិអប្សរា មានប្រសាសន៍នៅថ្ងៃទី០៨ ខែមិថុនា ឆ្នាំ២០២១នេះថា ការកែលម្អនៅខាងមុខលានជល់ដំរីនេះ ធ្វើឡើងកាលពីដើមខែកុម្ភ: ឆ្នាំ២០២១កន្លងមក ដែលមកដល់ពេលនេះ សម្រេចបាន៦៥% ហើយ ពោលនៅសល់តែរៀបចំក្រាលថ្មបាយក្រៀមសម្រាប់ផ្លូវថ្មើរជើង ដាំស្មៅនៅខាងមុខប្រាសាទ និងប្រព័ន្ធបង្ហូរទឹកប៉ណ្ណោះ។ លោកបានបន្ដថា ផ្លូវថ្មើរជើងនេះមានប្រវែងប្រមាណជាង៣០០ម៉ែត្រ ដោយការកែលម្អនេះ ឱ្យសមស្របទៅ លំនាំប្រាសាទបុរាណ ដើម្បីលើកតម្លៃវប្បធម៌ ធ្វើយ៉ាងណាឱ្យខាងមុខប្រាសាទលានជល់ដំរីនេះ មានទេសភាពល្អ និងសោភណ្ឌភាពបៃតង មានការទាក់ទាញអ្នកទេសចរណ៍ជាតិ និងអន្ដរជាតិទៅទស្សនាក្រោយបញ្ចប់ជំងឺកូវីដ-១៩នាពេលខាងមុខ។ លោកបានបន្ដថា គម្រោងនេះ នឹងបញ្ចប់ ក្នុងរយ:ពេល២ខែទៀត និយាយរួម នឹងអោយរួចរាល់នៅក្នុងឆ្នាំ២០២១ខាងមុខ ក្រោយពីស្ថាបនា និងកែលម្អរួចរាល់ហើយ នៅទីលាននោះនឹងមានទេសភាពស្រស់ត្រកាល គ្រប់រដូវកាល លែងមានការបើកបររថយន្ដក្បែរប្រាសាទផងដែរ។
លោក សុផារ៉ាត មានប្រសាសន៍បន្ថែមថា កន្លងមកទីលានជល់ដំរីមានផ្លូវកៅស៊ូសម្រាប់ធ្វើចរាចរណ៍ បានធ្វើឱ្យប៉ះពាល់ដល់ប្រាសាទបុរាណ ដោយសារតែរំញ័រនៃគ្រឿងយន្ដ ទើបអាជ្ញាធរជាតិអប្សរា កែលម្អឡើងវិញ ដោយធ្វើផ្លូវថ្មើរជើងសម្រាប់ដើរទស្សនាប្រាសាទ និង ដើម្បីលើកតម្កើង និងថែរក្សា អភិរក្សវប្បធម៌ជាតិ។ ព្រះលានជល់ដំរីនេះមានទីតាំងស្ថិតនៅក្នុងបរិវេណក្រុងអង្គរធំ នៅទីនេះមានសក្តានុពលទេសចរណ៍សំខាន់ៗជាប្រវត្តិ នៃការសាងសង់ ទីតាំង និងរចនាបទ ដែលមានភ្ញៀវទេសចរអាចមកលំហែរកម្យាន្ត មើលប្រាសាទ ចម្លាក់ក្បូរក្បាច់ ព្រៃព្រឹក្សា និងប្រវត្តិសាស្រ្តផងដែរ។លានជល់ដំរីនេះ ត្រូវបានស្ថាបនាឡើងនៅចុងសតវត្សទី១២ នៃគ្រឹស្តសករាជ ដោយព្រះបាទជ័យវរ្ម័នទី៧៕
អត្ថបទ និងរូបភាព៖ លោកបូ សាវី
កែសម្រួលអត្ថបទ៖ លោក លីវ សុខុន
