ក្នុងឱកាសបើកកិច្ចប្រជុំមួយស្ដីពីប្រព័ន្ធចុះឈ្មោះអ្នកដំណើរ(web app )ជំនាន់ទី២ នៅព្រឹកថ្ងៃទីន៨ ខែមិថុនា ឆ្នាំ២០២១នេះ ឯកឧត្តមទៀ សីហា អភិបាលខេត្តសៀមរាប បានមានប្រសាសន៍ថា ប្រព័ន្ធចុះឈ្មោះអ្នកដំណើរ (web app) ជំនាន់ទី២នេះ អាចឲ្យបងប្អូនអ្នកដំណើរជាលក្ខៈគ្រួសារ មន្ត្រីរាជការ និងអង្គការនានា ដែលចូលមកខេត្តសៀមរាប មានភាពងាយស្រួលជាងមុន ជឿនលឿនជាងមុន បន្ថយការកកស្ទះ តាមច្រកកាត់បន្ថថយហានិភ័យ ដោយគាត់គ្រាន់តែបង្កើតគណនីផ្ទាល់ខ្លួន ដែលប្រើជាមួយ Facebook ឬក៍ Gmail scan QR code ហើយត្រូវបំពេញអាសយដ្ឋានបច្ចុប្បន្ន , ស្លាកលេខរថយន្ត ,លេខអត្តសញ្ញាប័ណ្ណ និងលេខទូរស័ព្ទ ដោយខ្លួនឯងជាការស្រេច ។
ឯកឧត្តមទៀ សីហា មានប្រសាសន៍ទៀតថា គុណសម្បត្តិរបស់ប្រព័ន្ធចុះឈ្មោះអ្នកដំណើរ(web app)ជំនាន់ទី២នេះ មានចំនួន៥ គឺ ៖១. អ្នកដំណើរអាចបញ្ជូលព័ត៌មានបានដោយខ្លួនឯង , ២. បង្កភាពងាយស្រួលក្នុងការស្រាវជ្រាវរកអ្នកពាក់ព័ន្ធ , ៣. ចំណេញពេលវេលា , ៤. កាត់បន្ថយហានិភ័យកំឡុងពេលចុះឈ្មោះ និង ៥. ការធ្វើទំនើបកម្មនៃបច្ចេកវិទ្យា ដាក់ឲ្យដំណើរការនៅតាម ច្រកព្រំប្រទល់ខេត្តទាំងបី រួមមាន ៖ ព្រំប្រទល់ខេត្តសៀមរាបនិងខេត្តកំពង់ធំ នៅស្រុកជីក្រែង , ព្រំប្រទល់ខេត្តសៀមរាបនិងខេត្តបន្ទាយមានជ័យ នៅស្រុកក្រឡាញ់ និង ព្រំប្រទល់ខេត្តសៀមរាបនិងខេត្តឧត្ដរមានជ័យ នៅស្រុកស្រីស្នំ ។
ឯកឧត្តមអភិបាលខេត្តសៀមរាប មានប្រសាសន៍បន្ថែមទៀតថា ករណីផ្ទុះជំងឺកូវីដ-១៩នៅស្រុកសូទ្រនិគម និងស្រុកជីក្រែង ក្នុងរយៈពេលប៉ុន្មានចុងក្រោយនេះ គឺជាហេតុការណ៍ដែលមិននឹកស្មានដល់ ដែលកើតចេញពីការជួបជុំដែលមិនចាំបាច់ និងជាករណីបន្ថែមនូវការព្រួយបារម្ភ និងដាក់ចេញនូវផែនការឲ្យក្រុមការងារបន្តស្រាវជ្រាវរកអ្នកពាក់ព័ន្ធ ពង្រឹងការធ្វើចត្តាឡីស័កតាមផ្ទះ ពិសេសអ្វីដែលជាការព្រួយបារម្ភខ្លាំងនោះ គឺប្រការនៅមានអ្នកពាក់ព័ន្ធមួយចំនួនក្នុងតំបន់ផ្ទុះជំងឺនោះ មិនបង្ហាញខ្លួន យកសំណាកធ្វើតេស្ត ដើម្បីសុវត្តិភាពផ្ទាល់ខ្លួន គ្រួសារ និងសហគមន៍នោះ ដូច្នេះក្នុងឱកាសនេះ ដើម្បីបង្កើនប្រសិទ្ធភាពនៃការឆ្លងរាលដាលជំងឺនេះ សូមអាជ្ញាធរគ្រប់លំដាប់ថ្នាក់ ត្រូវដាក់ចេញនូវវិធានការមួយចំនួនបន្ថែមទៀត និង បន្តអនុវត្តឱ្យបានខ្ជាប់ខ្ជូនតាមគោលការណ៍ណែនាំរបស់រាជរដ្ឋាភិបាលនូវវិធានការ “៣ការពារ” និង ”៣កុំ” និងអនុវត្តវិធានការសុខាភិបាល ហើយក្នុងករណីពុំចាំបាច់ សូមកុំធ្វើដំណើចេញពីលំនៅឋាន ឬទីសំណាក់របស់ខ្លួន ៕
អត្ថបទ និង រូបថត ៖ លោក ខេង ឧត្ដម និង លោក ងិន គឹមឡេង
កែសម្រួលអត្ថបទ៖ លោក លីវ សាន្ត
