កាលពីថ្ងៃទី៧ ខែមិថុនា ឆ្នាំ២០២១ នៅសាលាខេត្តសៀមរាប មានរៀបចំពិធី ចុះហត្ថលេខាលើកិច្ចព្រមព្រៀង អនុវត្តន៍គម្រោងកាត់បន្ថយសំណល់ប្លាស្ទិក នៅក្នុងខេត្តសៀមរាប រវាងក្រសួងបរិស្ថាន និងរដ្ឋបាលខេត្តសៀមរាប ដោយក្រោមអធិបតីភាព ឯកឧត្តម គិត ច័ន្ទគ្រីស្នា ទីប្រឹក្សាក្រសួងបរិស្ថាន និងលោក ង៉ាន់ ភិរុណ អភិបាលរងខេត្ត តំណាង ឯកឧត្តម ទៀ សីហា អភិបាលខេត្តសៀមរាប។
លោក ង៉ាន់ ភិរុណ លើកឡើងថា ពិធីចុះហត្ថលេខាលើកិច្ចព្រមព្រៀងនេះ មានគោលបំណងរួមចំណែកក្នុងការទប់ស្កាត់ និងការកាត់បន្ថយសំណល់ប្លាស្ទិកទំាងនៅលើដី និងក្នុងទឹក តាមរយៈការអនុវត្ត គោលការណ៍៤Rs រួមមាន ការកាត់បន្ថយ ការប្រើប្រាស់ឡើងវិញ ការកែច្នៃ និងបដិសេធ។
តាមការបញ្ជាប់របស់ លោកអភិបាលរងខេត្ត នាពេលកន្លងមក រដ្ឋបាលខេត្ត បានទទួល ឡដុតសំរាមចំនួន ៣គ្រឿង រ៉ឺម៉កម៉ូតូកង់បីចំនួន ០៦គ្រឿង និងរថយន្តដឹកជញ្ជូនសំរាម ២គ្រឿង ផ្តល់ដោយក្រសួងបរិស្ថាន និងទទួលបានរថយន្តបោសសម្អាតផ្លូវចំនួន ០៣គ្រឿង ក្រោមជំនួយឧបត្ថម្ភពីខេត្តយូណាន នៃសាធារណៈរដ្ឋប្រជាមានិតចិន សម្រាប់សម្អាតតាមដងផ្លូវនានា ក្នុងក្រុងសៀមរាប។ បន្ថែមពីនេះ រដ្ឋបាលខេត្ត បាននឹងកំពុងកៀរគរធនធានពីដៃគូអភិវឌ្ឍន៍ និងជំរុញ ដល់រដ្ឋបាល ក្រុង-ស្រុក ក្នុងការអនុវត្តមុខងារគ្រប់គ្រងសំរាម សំណល់រឹងទីប្រជុំជនតាមបណ្តាក្រុង-ស្រុក ដោយអនុលោមតាមអនុក្រឹត្យលេខ១១៣ អនក្រ.បក ស្តីពីការគ្រប់គ្រងសំរាម សំណល់រឹងទីប្រជុំជន ដើម្បីធានាបាននូវ សោ-ភណ្ឌភាព សុខមាលភាព និងគុណភាពបរិស្ថាន។
តាមរយៈកិច្ចព្រមព្រៀងនេះ លោកអភិបាលរងខេត្ត រំពឹងថា សំណល់ប្លាស្ទិក នៅក្នុងខេត្តសៀមរាប នឹងត្រូវបានកាត់បន្ថយ តាមរយៈការបញ្ជ្រាបការយល់ដឹង និងផ្សព្វផ្សាយដល់ប្រជាពលរដ្ឋ ដោយប្រើបា្រស់ផលិតផលជំនួស ផលិតផលប្លាស្ទិក និងការគាំទ្រនូវមធ្យោបាយសម្ភារផ្សេងៗសម្រាប់អនុវត្តសកម្មភាពរួមមាន៖១).ការសិក្សាពីលទ្ធភាព និងមធ្យោបាយបង្កើនសេវាគ្របដណ្តប់ក្នុងការប្រមូល សម្អាត និងដឹកជញ្ជូនសំរាម និងដោះស្រាយការកកស្ទះសំរាម ២).ការផ្តល់នូវសម្ភារធុងសំរាម និងការរៀបចំតម្លើងផ្ទាំងផ្សព្វផ្សាយទាក់ទង ទៅនឹងការកាត់បន្ថយប្លាស្ទិក និង៣).ការបង្កើនចំណេះដឹង និងយុទ្ធនាការផ្សព្វផ្សាយគ្រប់មធ្យោបាយ។
គួរជម្រាបថា ពិធីចុះហត្ថលេខាលើកិច្ចព្រមព្រៀង អនុវត្តន៍គម្រោងកាត់បន្ថយសំណល់ប្លាស្ទិក នៅក្នុងខេត្តសៀមរាប មានការចូលរួមពី លោកនាយករង រដ្ឋបាលខេត្ត លោកប្រធានមន្ទីរបរិស្ថាន លោកប្រធានមន្ទីរទេសចរណ៍ លោកប្រធានមន្ទីរកសិកម្ម រុក្ខាប្រមាញ់ និងនេសាទ លោកអភិបាលរងក្រុង អ្នកតំណាងមន្ទីធនធានទឹក និងឧតុនិយម និងអ្នកជំនាញការបរិស្ថាននៃកម្មវិធីអភិវឌ្ឍន៍សហប្រជាជាតិ (UNDP)។
ប្រភព៖ រដ្ឋបាលខេត្តសៀមរាប
អត្ថបទ៖ មន្ទីរព័ត៌មានខេត្តសៀមរាប