តាមរបាយការណ៍របស់លេខាធិការដ្ឋាននៃគណៈកម្មាធិការត្រួតពិនិត្យគ្រឿងញៀនខេត្ត បានឲ្យដឹងថា ក្នុងរយៈពេលមួយខែឧសភា ឆ្នាំ២០២១នេះ កម្លាំងសមត្ថកិច្ចជំនាញ បានធ្វើការចុះបង្រ្កាបករណីជួញដូរ រក្សាទុក និង ប្រើប្រាស់ដោយខុសច្បាប់នូវសារធាតុញៀន ចំនួន៣៥ករណី ដោយឃាត់ខ្លួនជនសង្ស័យបានចំនួន ១៣៣នាក់ មានស្រី០២នាក់ ក្នុងនោះ ៖ បង្រ្កាបករណីជួញដូរ រក្សាទុក បានចំនួន១១ករណី ឃាត់ខ្លួនជនល្មើសចំនួន ៣៤នាក់ , បង្ក្រាបករណីប្រើប្រាស់នូវសារធាតុញៀន ចំនួន២៣ករណី ដោយឃាត់ខ្លួនមនុស្សចំនួន៩៨នាក់ មានស្រី០២នាក់ ហើយបានបញ្ជូនទៅមជ្ឈមណ្ឌលស្ដារនីតិសម្បទាអ្នកញៀនគ្រឿងញៀនខេត្ត និង បង្រ្កាបដោយអនុវត្តតាមដីកាចំនួន០១ករណី ។
នៅក្នុងប្រតិបត្តិការណ៍នោះដែរ កម្លាំងសមត្ថកិច្ចជំនាញ បានធ្វើការដកហូតនូវវត្ថុតាងមានថ្នាំញៀនប្រភេទមេតំហ្វេតាមីន ( ICE ) ចំនួន ៩០,០៥ក្រាម , ម៉ូតូ មួយគ្រឿង , កាំភ្លើងខ្យល់ចំនួន ០១, ទូរស័ព្ទដៃចំនួន ៣៨គ្រឿង និងជញ្ជីងសម្រាប់ថ្លឹងគ្រឿងញៀនចំនួន ០៤ ។
គួររំលឹកថា ក្នុងការចុះបង្រ្កាបករណីជួញដូរ រក្សាទុក និង ប្រើប្រាស់ដោយខុសច្បាប់នូវសារធាតុញៀន ចំនួន៣៥ករណីនេះ គឺមានការថយចុះចំនួន១១ករណី បើធៀបនឹងខែមេសាឆ្នាំ២០២១ ដែលមាន ចំនួន ៤៦ករណី ។
របាយការណ៍បានឲ្យដឹងទៀតថា ជាមួយគ្នានេះ ក៏បានចុះអនុវត្តវិធានការរដ្ឋបាលចំពោះអ្នកបើកបរយានយន្ត ចំនួន០១លើក ដោយសហការណ៍ជាមួយមន្ទីរជំនាញពាក់ព័ន្ធចុះត្រួតពិនិត្យ និងតេស្ដទឹកនោមរកសារធាតុញៀនលើអ្នកបើកបររថយន្ដ និងទោចក្រយានយន្ត សរុបចំនួន២៥នាក់ ដែលជាលទ្ធផលតេស្ដវិជ្ជមាន ចំនួន០២នាក់ និងបានបញ្ជូនទៅមជ្ឈមណ្ឌលស្ដារនិតិសម្បទាអ្នកញៀនគ្រឿងញៀនខេត្ត ដោយឡែកចំពោះអ្នកដែលបានធ្វើតេស្ដទឹកនោមអវិជ្ជមាន ចំនួន២៣នាក់ បានធ្វើការអបរំ និងណែនាំឲ្យយល់ដឹងអំពីផលប៉ះពាល់នៃគ្រឿងញៀន ។
លោកវរសេនីយ៍ទោ ណាម ណម នាយរងការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប មានប្រសាសន៍ថា កន្លងមកការិយាល័យប្រឆាំងគ្រឿងញៀនតែងតែធ្វើការផ្សព្វផ្សាយដល់ប្រជាពលរដ្ឋក្នុងមូលដ្ឋាន ឲ្យស្វែងយល់ពីផលប៉ះពាល់នៃគ្រឿង និងចូលរួមរាយការណ៍ចំពោះករណីសង្ស័យ ប៉ុន្តែបច្ចុប្បន្ននេះ បញ្ហាជំងឺកូវីដ- ១៩ បានធ្វើឲ្យរាំងស្ទះដល់ការចុះផ្សព្វផ្សាយ ប៉ុន្ដែទោះជាយ៉ាងណាក៏ដោយ ក៏លោកបានធ្វើកាជំរុញដល់អាជ្ញាធរមូលដ្ឋាន ធ្វើការសហការជាមួយប្រជាពលរដ្ឋ ទាំងការផ្សព្វផ្សាយ និងការរាយការណ៍ជាដើម ។
សូមបញ្ជាក់ថា ពាក់ព័ន្ធនឹងបញ្ហាគ្រឿងញៀននេះ ក្រសួងមហាផ្ទៃ ក៏បានបានដាក់ចេញនូវផែនការ ស្តីពីយុទ្ធនាការបង្ការ ទប់ស្កាត់ និងបង្រ្កាបបទល្មើសគ្រឿងញៀន នៅតាមបណ្តោយព្រំដែន ដោយផ្ដោតសំខាន់លើការ ដោះស្រាយ និងបង្ក្រាបបទល្មើសគ្រឿងញៀនតាមខ្សែបន្ទាត់ព្រំដែន ឱ្យស្ថិតក្នុងស្ថានភាពសន្តិសុខសណ្តាប់ធ្នាប់សាធារណៈនៅតាមតំបន់ព្រំដែនឱ្យកាន់តែល្អប្រសើរឡើងដោយរួមសហការជាមួយភាគីពាក់ព័ន្ធទាំងអស់ ដើម្បីបញ្ចៀសឱ្យបាននូវឥទ្ធិពលអវិជ្ជមាននានាបណ្ដាលមកពីគ្រឿងញៀន ៕
អត្ថបទ ៖ លោកស្រី ហែម បូរ៉ាន្នី
កែសម្រួលអត្ថបទ ៖ លោក លីវ សាន្ត
