ខេត្ដសៀមរាប បានរកឃើញអ្នកវិជ្ជមានមេរោគកូវីដ-១៩ បំប្លែងថ្មី ប្រភេទកូនកាត់ឥណ្ឌា ចំនួន ២ករណី នៅក្នុងខេត្ដនេះ ទៅលើពលការនីពីរនាក់ ដែលបានចំណាកស្រុកមកពីប្រទេសថៃ នៅថ្ងៃទី១៨ ខែមិថុនា ឆ្នាំ២០២១នេះ ។
ឯកឧត្តមវេជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាល ខេត្ដសៀមរាប លោកបានប្រាប់តាមទូរស័ព្ទកាលពីរសៀលថ្ងៃទី១៨ ខែមិថុនានេះថា ការរកឃើញវិជ្ជមានកូវីដ-១៩បម្លែងថ្មីប្រភេទឥណ្ឌានេះ ក្រោយពេលពលការិនីពីររូបនោះមកពីប្រទេសថៃ កាលពីថ្ងៃទី០៨ ខែមិថុនា ឆ្នាំ២០២១នេះ ហើយបានធ្វើចត្ដាឡីស័កយ៉ាងប្រយ័ត្នប្រយ៉ែងបំផុតនៅក្នុងខេត្ដសៀមរាប។ ក្រោយពីរកឃើញវិជ្ជមានកូវីដ-១៩ប្រភេទថ្មីនេះ ពលករទាំងពីររូបនោះ បានយកទៅសម្រាកនៅមន្ទីរពេទ្យបង្អែកខេត្ដ ហើយក្រុមគ្រូពេទ្យបានយកសំណាកទៅធ្វើតេស្ដបន្ដនៅម៉ាស្ទ័ររាធានីភ្នំពេញ ទើបទទួលលទ្ធផលនៅព្រឹកថ្ងៃទី១៨ ខែមិថុនានេះថា មានមេរោគកូវីដ-១៩ កូនកាត់ឥណ្ឌាបម្លែងខ្លួន 21A/B-1-617.2 (Delta) ដែលមកដល់ពេលនេះ ខេត្ដសៀមរាប មានពីរករណីហើយ ក្នុងនោះរកឃើញលើស្ដ្រីអាយុ៤០ឆ្នាំម្នាក់ និងស្ដ្រីអាយុ៣៤ឆ្នាំម្នាក់ទៀត។ បច្ចុប្បន្ន អ្នកវិជ្ជមានកូវីដ-១៩ថ្មីនេះ កំពុងសំរាកព្យាបាលនៅក្នុងមន្ទីរពេទ្យខេត្ដសៀមរាប។ ឯកឧត្តមវេជ្ជបណ្ឌិត បានបញ្ជាក់ថា មេរោគបំប្លែងខ្លួនថ្មីនេះ ជាមេរោគឆ្លងសាហាវ កើតរោគសញ្ញាសួតធ្ងន់ធ្ងរ បើពេទ្យជួយមិនបានទាន់ពេលទេអាចបណ្ដាលអោយស្លាប់។ ឯកឧត្តម ក៏បានអំពាវដល់ប្រជាពលរដ្ឋចូលរួមអនុវត្ដតាមការណែនាំរបស់រាជរដ្ឋាភិបាល និងក្រសួងសុខាភិបាល ៣ការពារ, ៣កុំអោយបាជាប់ជាប្រចាំ។
ព័ត៌មានជាតិ ថ្មីៗ
សូមជម្រាបថា ក្នុងព្រឹត្ដិការណ៍សហគមន៍២០កុម្ភ: នៃខេត្ដសៀមរាប មកទល់ថ្ងៃទី១៧ ខែមិថុនានេះ មានអ្នកវិជ្ជមានជំងឺកូវីដ-១៩ ចំនួន៥៣៤នាក់, បានព្យាបាលជាសះស្បើយចំនួន ១៣៦នាក់, ស្លាប់ ៤នាក់ និង៣៩៤នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក៕
អត្ថបទ និងរូបភាព: លោកបូ សាវី
កែសម្រួលដោយ លីវ សុខុន!!!
