នៅថ្ងៃទី២១ ខែមិថុនា ឆ្នាំ២០២១នេះ តាមរយៈហ្វេសប៊ុកផ្លូវការរបស់រដ្ឋបាលខេត្តសៀមាប បានផ្សព្វផ្សាយពី ដាក់ឱ្យការដំណើរការកម្មវិធីចុះឈ្មោះអ្នកដំណើរចូល និងឆ្លងកាត់ខេត្ត តាមប្រព័ន្ធអនឡាញជំនាន់ទី២ ដើម្បីតាមដាន និងស្វែងរកអ្នកដំណើរ ដែលមានវិជ្ជមានជំងឺកូវីដ-១៩ ឬពាក់ព័ន្ធនឹងអ្នកមានវិជ្ជមានជំងឺកូវីដ-១៩ នៅតាមប៉ុស្តិត្រួតពិនិត្យសុខភាពបឋម តាមបណ្ដាស្រុក របស់ខេត្តសៀមរាប ដែលមានព្រំប្រទល់ជាប់នឹងខេត្តទាំង៣ ។
តាមរយៈការផ្សព្វផ្សាយដដែលនេះ បង្ហាញថា កម្មវិធីចុះឈ្មោះ ដោយអ្នកដំណើរខ្លួនឯងនេះ នឹងផ្ដល់ភាពងាយស្រួល ចំណាយពេលវេលាតិច ព្រមទាំងកាត់បន្ថយចំនួនមនុស្សរង់ចាំ នៅតាមប៉ុស្តិត្រួតពិនិត្យទាំងនោះ។ ការចុះឈ្មោះតាមប្រព័ន្ធអនឡាញនេះដែរ អ្នកដំណើរអាចចុះឈ្មោះនៅពេលណាក៏បាន ជាមួយចំនួនអ្នករួមដំណើរ មុនពេលចូលមកដល់ភូមិសាស្ត្រខេត្តសៀមរាប ក៏ដូចជាប៉ុស្តិត្រួតពិនិត្យសុខភាពបឋមទាំង ៣ទីតាំង រួមមានច្រកព្រំប្រទល់ខេត្តសៀមរាប-កំពង់ធំ ស្ថិតក្នុងស្រុកជីក្រែង ច្រកព្រំប្រទល់ខេត្តសៀមរាប-បន្ទាយមានជ័យ ស្ថិតក្នុងស្រុកក្រឡាញ់ និងច្រកព្រំប្រទល់ខេត្តសៀមរាប-ឧត្តរមានជ័យ ស្ថិតក្នុងស្រុកស្រីស្នំ។ ក្នុងករណី អ្នកដំណើរ ពុំអាចចុះឈ្មោះ តាមប្រព័ន្ធអនឡាញនេះដោយជោគជ័យ អ្នកដំណើរនៅតែអាចបន្តចុះឈ្មោះនៅតាមបញ្ជរ នៅតាមប៉ុស្តិត្រួតពិនិត្យសុខភាពបឋមនីមួយៗ ដូចធម្មតា។
គួររំលឹកថា កម្មវិធីចុះឈ្មោះអ្នកដំណើរចូល និងឆ្លងកាត់ខេត្តខេត្តសៀមរាប តាមប្រព័ន្ធអនឡាញជំនាន់ទី១ ត្រូវបានរដ្ឋបាលខេត្តសៀមរាប ចាប់ផ្ដើមដាក់ឱ្យប្រើប្រាស់ កាលពីដើមខែមេសា ឆ្នាំ២០២១។
គួរជម្រាបថា គិត្រឹមថ្ងៃទី២០ ខែមិថុនានេះ ខេត្តសៀមរាប មានអ្នកវិជ្ជមានជំងឺកូវីដ-១៩ សរុបចំនួន ៥៨៧នាក់ បានព្យាបាលជាសះស្បើយសរុបចំនួន ១៦៦នាក់ ស្លាប់សរុបចំនួន ៥នាក់ និងចំនួន ៤១៦នាក់ កំពុងសម្រាកព្យាបាលនៅមន្ទីរពេទ្យបង្អែកខេត្តសៀមរាប មណ្ឌលចត្តាឡីស័កគរុកោសល្យ និងវិក្រឹតការខេត្ត និងវិទ្យាល័យដំដែក។
អត្ថបទ៖ លោក សេង ផល្លី
