ដើម្បីអបអរសាទរព្រះរាជពិធីចម្រើនព្រះជន្មវស្សា សម្តេចព្រះមហាក្សត្រី នរោត្តម មុនិនាថ សីហនុ ព្រះវរៈរាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាទីសក្ការៈដ៏ខ្ពង់ខ្ពស់បំផុត ក្នុងគម្រប់៨៥ យាងចូល ៨៦ ព្រះវស្សានា ព្រឹកថ្ងៃទី ១៧ ខែមិថុនា ឆ្នាំ២០២១ គណៈកម្មាធិការសាខាកាកបាទក្រហមកម្ពុជាខេត្តសៀមរាប បានរៀបចំពិធីសូត្រមន្តចម្រើនព្រះបរិត្ត និងប្រគេនចង្ហាន់ ទេយ្យទានដល់ព្រះសង្ឃ ចំនួនបីវត្ត មានវត្តរាជបូណ៌ ,វត្តអង្គរខាងត្បូង និងវត្តប្រាសាទបាគង ដែលពិធីនេះប្រព្រឹត្តទៅក្រោមវត្តមានលោកជំទាវ មាស សន ជា ម៉ន អនុប្រធានកិត្តិយសគណៈកម្មាធិការសាខាកាកបាទក្រហមកម្ពុជាខេត្តសៀមរាប ដោយមានការនិមន្តចូលរួមពីសំណាក់ ព្រះមហាវិមលធម្ម ពិន សែម សិរីសុវណ្ណោ ព្រះរាជាគណៈថ្នាក់ទោ ឧត្តមទីប្រឹក្សាគណសង្ឃនាយកនៃព្រះរាជាណាចក្រកម្ពុជា សមាជិកថេរសភាសង្ឃ និងព្រះចៅអធិការវត្តរាជបូណ៌ ខេត្តសៀមរាប និងលោកលោកស្រីជាសមាជិកសមាជិកាសាខាកាកបាទក្រហមកម្ពុជាមួយចំនួនទៀត។
ក្នុងឱកាសនោះដែរ លោកជំទាវ មាស សន ជា ម៉ន បានមានប្រសាសន៍ថា យើងទាំងអស់គ្នាជាកូនចៅ ចៅទួតរបស់ព្រះអង្គ សូមសំដែងនូវការគោរព និងចងចាំគ្មានថ្ងៃបំភ្លេចបាន នូវស្នាព្រះហត្ថព្រះរាជសកម្មភាពសម្ដេចម៉ែ សម្ដេចយាយជាអម្ចាស់ក្នុងព្រះរាជបេសកកម្មបម្រើប្រទេសជាតិមាតុភូមិ ក្នុងវិស័យមនុស្សធម៌ ព្រមទាំងបានបួងសួងថ្វាយព្រះពរជ័យមហាប្រសើរថ្វាយសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ជាអម្ចាស់ជីវិតលើត្បូង ជាទីសក្ការៈដ៏ខ្ពង់ខ្ពស់បំផុត សូមព្រះអង្គរមានព្រះរាជសុខភាពល្អបរិបូរណ៌ព្រះកាយពលមាំមួន ព្រះជន្មយឺតយូរជាងរយព្រះវស្សា ដើម្បីគង់ប្រថាប់ជាម្លប់ដ៏ត្រជាក់របស់ប្រជារាស្ត្រជាកូនចៅ ចៅទួតរបស់ព្រះអង្គតរៀងទៅ។
លោកជំទាវ មានប្រសាសន៍ទៀតថា ដោយមានការយកចិត្តទុក្ខដាក់ពីសំណាក់សម្តេចកិត្តិព្រឹទ្ធបណ្ឌិត ប៉ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលតែងតែគិតពីសុខទុក្ខ និងការលំបាករបស់បងប្អូនប្រជាពលរដ្ឋនៅទូទាំងប្រទេស សំខាន់បងប្អូនជាជនក្រីក្រ ជនងាយរងគ្រោះ ជនចាស់ជរា អ្នកផ្ទុកមេរោគអេដស៍ និងទុរគតជននា និងបានពាំនាំមកនូវការផ្តាំផ្ញើសួរសុខទុក្ខ ព្រមទាំងលើកទឹកចិត្តដល់បងប្អូនប្រជាពលរដ្ឋឲ្យខិតខំថែទាំសុខភាព និងប្រកបរបរចិញ្ចឹមជីវិតតាមលទ្ធភាពដែលអាចធ្វើទៅបាន។ ជាមួយគ្នានោះក្នុងនាមឯកឧត្តមបណ្ឌិត សៀង ណាំ ប្រធានកិត្តិយស និងឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត លោកជំទាវ ក៏បានរំលឹកដែរថា បញ្ហាសំខាន់ គឺបងប្អូនត្រូវមានការប្រុងប្រយ័ត្ននៅគ្រប់វិនាទីនូវជំងឺកូវីដ-១៩ គឺត្រូវធ្វើអនាម័យឲ្យបានជាប្រចាំ ព្រមទាំងប្រតិបត្តិឲ្យបានខ្ជាប់ខ្ជួន វិធានការរបស់ប្រមុខរាជរដ្ឋាភិបាល ៣កុំ ៣ការពារ និង សេចក្តីណែនាំវិធានការរបស់ក្រសួងសុខាភិបាល ។
ព័ត៌មានជាតិ ថ្មីៗ
សូមជម្រាបថា ក្នុងឱកាសនៃពិធីអបអរសាទរព្រះរាជពិធីចម្រើនព្រះជន្មសម្តេចព្រះមហាក្សត្រី នរោត្តម មុនិនាថ សីហនុ ព្រះវរៈរាជមាតាជាតិខ្មែរ សាខាកាកបាទក្រហមកម្ពុជាសាខាខេត្ត បាននាំយកនូវទេយ្យទាន និងបច្ច័យ ប្រគេនព្រះសង្ឃទាំង៣វត្ត ដោយមួយវត្តទទួលបាន៖ អង្ករ១៥០ គីឡូក្រាម ,មី៥កេស ,ទឹកសុទ្ធ ៥កេស ,ត្រីខ ៥យួរ ,ទឹកត្រី ៥យួរ ,ទឹកស៊ីអ៊ីវ ៥យួរ ,អាល់កុល ៥លីត្រ ,ម៉ាស់ ៥ប្រអប់ ,បច្ច័យចំនួន១លានរៀល ជាមួយនោះបងប្អូនសប្បុរសជនចូលរួមបន្ថែមតាមវត្តនីមួយៗ និង ប្រគេនដល់ព្រះសង្ឃ ទាំង២៧អង្គ ក្នុងមួយអង្គៗ នូវស្លាដក១ និងបច្ច័យ ៥ម៉ឺនរៀលផងដែរ ៕
អត្ថបទ និង រូបថត ៖ លោក ទ្រា ពន្លឺ ,ម៉ី សុខារិទ្ធ
កែសម្រួលអត្ថបទ ៖ លោក អ៊ុន ណារាជ្យ
