នៅព្រឹកថ្ងៃទី២២ ខែមិថុនា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន បានទទួលជួបសំដែងការគួរសម លោក គឹម បញ្ញា នាយកអង្គការមូលនិធិបង្ការរបួសអាស៊ី (AIP) ប្រចាំប្រទេសកម្ពុជា និងបង្ហាញការគាំទ្រ ក្នុងការរៀបចំវេទិកានិពន្ធនាយកសារព័ត៌មានស្តីពី “ការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតនៅកម្ពុជា” ដែលគ្រោងធ្វើឡើងនៅក្នុងខែសីហា ឬ ខែកញ្ញា ឆ្នាំ២០២១ ខាងមុខនេះ។
តាមការលើកឡើងរបស់ លោក គឹម បញ្ញា វេទិកានិពន្ធនាយកសារព័ត៌មាន មានគោលបំណងបង្ហាញពី ស្ថានភាពគ្រោះថ្នាក់ចរាចរណ៍ក្នុងចំណោម កម្មករនិយោជិតនៅកម្ពុជា និងគំនិតផ្តួចផ្តើមក្នុងការជំរុញឱ្យសម្រេចបាននូវចក្ខុវិស័យទាំង ៥ ក្នុងការលើកកម្ពស់សុវត្ថិភាពចរាចរណ៍ក្នុងចំណោមកម្មករនិយោជិតនៅកម្ពុជា។
លោក គឹម បញ្ញា បានថ្លែងនូវអំណរគុណយ៉ាងជ្រាលជ្រៅចំពោះ ឯកឧត្តម ខៀវ កាញារីទ្ធ ដែលតែងតែ បានចូលរួមនិងគាំទ្រ ដល់ការលើកកម្ពស់សុវត្ថិភាពចរាចរណ៍ ក៏ដូចជាសកម្មភាពការងាររបស់អង្គការមូលនិធិបង្ការរបួសអាស៊ី ប្រចាំនៅកម្ពុជា។ ជាមួយនោះ លោកនាយកអង្គការ ក៏បានស្នើសុំអនុសាសន៍ ពីឯកឧត្តមរដ្ឋមន្រ្តី ដើម្បីធ្វើឱ្យការខិតខំរបស់អង្គការ កាន់តែទទួលបានភាពជោគជ័យ ក៏ដូចជាមានការចូលរួមពីអ្នកសារព័ត៌មាន ក្នុងការចូលរួមផ្សព្វផ្សាយលើការលើកកម្ពស់ សុវត្ថិភាព ចរាចរណ៍។
លើកជាមតិជូនលោកនាយកអង្គការ ឯកឧត្តម ខៀវ កាញារីទ្ធ លើកឡើងថា អង្គការមូលនិធិបង្ការ របួសអាស៊ី គួរពិនិត្យលទ្ធភាពក្នុងការផ្សព្វផ្សាយ អំពីសុវត្ថិភាពចរាចរណ៍ ដល់កុមារ ព្រោះការបណ្តុះបណ្តាលតាំងពីកុមារភាព កុមារ អាចចងចាំបានល្អ និងទទួលយកបានឆាប់រហ័ស ហើយនៅពេលកុមារធំពេញវ័យ គ្រប់អាយុបើកបរយានយន្ត ពួកគេនឹងមានឥរិយាបថ ល្អប្រសើរ និងមានសុជីវធម៏ នៅតាមដងផ្លូវធ្វើដំណើរ ។ ជាមួយនេះ គួរជំរុញដល់ការងារផ្សព្វផ្សាយ ដែលមានភាពទាក់ទាញ តាមរយៈ គំនូរជីវចល ដែលជាវិធីមួយ អាចជួយឱ្យមានការយល់ដឹងនៅក្នុងស្រទាប់កុមារ ពិសេសបង្កើតឱ្យមានកម្មវិធីប្រកួតប្រជែងរវាងកុមារ និងក្រុមគោលដៅ ដើម្បីផ្ដល់ឱកាសដល់កុមារបានបញ្ចេញជាគំនិតយោបល់ផ្សេងៗដែលខ្លួនមាន។ សម្រាប់ផ្នែកកម្មករ ឯកឧត្តមរដ្ឋមន្រ្តី បានណែនាំឱ្យមានការបង្កើតនូវ គម្រោងសាកល្បង បង្កើតរថយន្តដឹកកម្មករគម្រូ តាមរយ:កិច្ចសហការជាមួយស្ថាប័នពាក់ពន្ធ័នានា ដែលធ្វើឡើងនៅតំបន់ ឬខេត្តណាមួយ ដែលកម្មករនយោជិត តែងប្រឈមនឹងបញ្ហាគ្រោះថ្នាក់ចរាចរណ៍ នៅតាមផ្លូវទៅធ្វើការ។
ក្នុងនោះ ឯកឧត្តមរដ្ឋមន្ត្រី ក៏បានគាំទ្រ ដល់ការរៀបចំ វគ្គបណ្តុះបណ្តាលដល់អ្នកសារព័ត៌មាន ដើម្បីបង្កើនការយល់ដឹង សម្រាប់ការធ្វើសេចក្ដីរាយការណ៍ព័ត៌មានបានកាន់តែល្អប្រសើរ នៅក្នុងដំណើរការជំរុញលើកកម្ពស់ សុវត្ថិភាពចរាចរណ៍ កម្មករនិយោជិតនៅកម្ពុជា ។ ជាមួយនេះ ក៏ត្រូវមានការប្រកួតប្រជែង ជ្រើសរើសអត្ថបទ ការអត្ថាធិប្បាយផ្សព្វផ្សាយ និង សកម្មភាពការងារនានាជាច្រើនទៀត នៅក្នុងចំណោមអ្នកសារព័ត៌មាន។ តាមរយៈកិច្ចខិតខំប្រឹងប្រែង របស់អង្គការមូលនិធិបង្ការរបួសអាស៊ី ក្រសួងព័ត៌មាន នឹងធ្វើកិច្ចសហការក្នុងផ្សព្វផ្សាយឱ្យបានទូលំទូលាយ ហើយអ្វីដែលសំខាន់ទៀតនោះ គួរមានជាកម្មវិធីវេទិកាតុមូល តាមរយៈទូរទស្សន៍ជាតិកម្ពុជា ដើម្បីរួមគ្នា បង្កើនការយល់ដឹងពីបញ្ហាចរាចរណ៍ របស់កម្មករនិយោគជិតនៅកម្ពុជា៕
អត្ថបទ និងរូបភាព៖ ក្រសួងព័ត៌មាន
កែសម្រួល៖ លោក សេង ផល្លី
