នៅព្រឹកថ្ងៃទី២៣ ខែមិថុនា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន រួមដំណើរដោយ ឯកឧត្តម ទន់ សារ៉ាត រដ្ឋលេខាធិការ ឯកឧត្តម លី វ៉ាន់ហុង ប្រតិភូរាជរដ្ឋា ភិបាលទទួលបន្ទុកជា អគ្គនាយករដ្ឋបាល និងហិរញ្ញវត្ថុ នៃក្រសួងព័ត៌មាន បាននាំយកនូវស្បៀងអាហារ រួមមាន៖ អង្ករ ៦០០គីឡូក្រាម ,មី ២៤កេស ,ត្រីខ ២៤យួរ ,ទឹកស៊ីអ៊ីវ ២៤យួរ និងទឹកត្រី ២៤ យួរ មកប្រគល់ជូនដល់រដ្ឋបាលស្រុកកោះសូទិន ខេត្តកំពង់ចាម ដើម្បីទុកសម្រាប់ចែកជូនដល់បងប្អូនប្រជាពលរដ្ឋដែលកំពុងធ្វើចត្តាឡីស័កនៅតាមខ្នងផ្ទះ ក្នុងភូមិ/ឃុំនានា នៃស្រុកកោះសូទិន។
តាមការបញ្ជាក់របស់ លោក យី វណ្ណ: អភិបាលនៃគណ:អភិបាល ស្រុកកោះសូទិន ខេត្តកំពង់ចាម បានអោយដឹងថា ចាប់តាំងពីមានការឆ្លងរីករាលនៃជំងឺកូវីដ-១៩ នេះមក សម្រាប់ស្រុកកោះសូទិន មានអ្នកឆ្លងចំនួន ២៨នាក់ ក្នុងនោះជាសះស្បើយបានចំនួន ៥នាក់ ហើយអ្នកឈឺកំពុងសម្រាកព្យាបាលនៅខេត្តកំពង់ចាម។ សម្រាប់អ្នកដែលធ្វើចត្តាឡីស័កនៅតាមផ្ទះតាំងពីមុនមកដល់ពេលនេះ មានចំនួន ១៦៥នាក់ ហើយត្រូវបានអាជ្ញាធរធ្វើការណែនាំមិនអោយចេញពីផ្ទះនោះទេ។ សម្រាប់បងប្អូនប្រជាពលរដ្ឋដែលមានការជាប់ពាក់ពន្ធ័ និងអ្នកកើតជំងឺកូវីដ-១៩ ហើយត្រូវធ្វើចត្តាឡីស័កនៅតាមផ្ទះបានទទួលអំណោយជាស្បៀងអាហារពីឯកឧត្តម ខៀវ កាញារីទ្ធ និងលោកជំទាវ ជាបន្តបន្ទាប់រួចមកហើយ និងបន្តផ្តល់ជូនបន្ថែមទៀត។
នៅក្នុងឱកាសនោះ ឯកឧត្តម រដ្ឋមន្រ្តី ខៀវ កាញារីទ្ធ បានក្រើនរំលឹកដល់អាជ្ញាធរដែនដីគ្រប់លំដាប់ថ្នាក់ត្រូវបង្កើនកិច្ចការងារនិងវិធានការ បង្ការទប់ស្កាត់ការឆ្លងរីករាលដាលនៃជឺងឺកូវីដ-១៩ ក្នុងមូលដ្ឋានភូមិឃុំនៃស្រុកកោះសូទិន ឲ្យបានកាន់តែខ្លាំងក្លាបន្ថែមទៀត ហើយក្នុងនោះថ្នាក់ដឹកនាំ និងមន្រ្តីគ្រប់ជាន់ថ្នាក់ក៏ត្រូវថែរក្សា និងការពារខ្លួនឯងជាចាំបាច់ផងដែរ តាមរយះវិធានការ ៣កុំ និង ៣ការពារ ដែលជាវិធានការល្អបំផុតកុំអោយឆ្លងជំងឺកូវីដ-១៩។
ព័ត៌មានជាតិ ថ្មីៗ
សូមជម្រាបជូនថា ក្រៅពីនាំយកនូវស្បៀងអាហារទុកសម្រាប់ចែកជូនប្រជាពលរដ្ឋធ្វើចត្តាឡីស័ក នាឱកាសនោះដែរឯកឧត្តមរដ្ឋមន្រ្តី ខៀវ កាញារីទ្ធ ក៏បានជូននូវថវិកាជូនក្រុមការងារស្រុកកោះសូទិន និងកងកំលាំងនគរបាល អាវុធហត្ថ យោធា ក្នុងស្រុកកោះសូទិន ផងដែរ៕
អត្តបទនិងរូបភាព៖អគ្គនាយកដ្ឋានទូរទស្សន៍ជាតិកម្ពុជា
