លោក គង់ វណ្ណសុភី ប្រធានបច្ចេកទេសនៃក្រុមហ៊ុន Gaungdong ដែលទទួលម៉ៅការជួសជុលកំណាត់ផ្លូវជាតិលេខ៦ក្នុងក្រុងសៀមរាប ឱ្យដឹងថា កំណាត់ផ្លូវពីស្តុបសុខាដល់រង្វង់មូលរូបសំណាកព្រះបាទជ័យវរ្ម័នទី៧នេះ មានប្រវែង៥.៨០០ម៉ែត្រ ដែលបានអនុវត្តចាប់ពីខែតុលាឆ្នាំ២០២០ ដែលមកដល់ពេលនេះ សម្រេចបានជិត៥០ភាគរយហើយ ហើយប្រសិនបើគ្មានការរាំងស្ទះទេនេះ ការជួសជុសកំណាត់ផ្លូវនេះ នឹងបញ្ចប់នៅខែតុលា ឆ្នាំ២០២១ ខាងមុខនេះ ខណៈបច្ចុប្បន្ន កំពុងតែក្រាលកៅស៊ូអេស៊ីបានពីរគន្លង ពីស្ថានីយសាំងកាល់តិចមកសល់ផ្លូវបំបែកស្តុបគ្រួស និងគន្លងខាងឆ្វេងចាប់ពីស្តុបគ្រួសមកដល់រង្វង់មូលរូបសំណាកព្រះបាទជ័យវរ្ម័នទី៧ បានប្រវែងជិត៤គីឡូម៉ែត្រហើយដែរ។
សូមជម្រាបថា លោកបានមានប្រសាសន៍យ៉ាងដូច្នេះ ក្នុងឱកាសដែលឯកឧត្តម ទៀ សីហា អភិបាលខេត្តសៀមរាប ដឹកនាំក្រុមការងារខេត្ត អមដំណើរដោយប្រធាន-អនុប្រធានមន្ទីរ អង្គភាពមួយចំនួនក្នុងខេត្ត និងមន្ត្រីជំនាញ នៃមន្ទីរសាធារណការនិងដឹកជញ្ជូន , មន្ត្រីបច្ចេកទេសនៃក្រសួងសាធារណការនិងដឹកជញ្ជូន ទីប្រឹក្សាបច្ចេកទេស និងតំណាងក្រុមហ៊ុនម៉ៅការ បានចុះពិនិត្យវឌ្ឍនភាពនៃការដ្ឋានសាងសង់ផ្លូវ ដែលជាគម្រោងឥណទានរបស់ធនគារអភិវឌ្ឍន៍អាស៊ី លើកំណាត់ផ្លូវជាតិលេខ៦ ចាប់ពីស្តុបសុខាដល់រង្វង់មូលរូបសំណាកព្រះបាទជ័យវរ្ម័នទី៧ កាលពីព្រឹកថ្ងៃទី២២ ខែមិថុនា ឆ្នាំ២០២១ ។
លោក គង់ វណ្ណសុភី បានឱ្យដឹងទៀតថា នារយៈពេលកន្លងមក ការជួសជុលផ្លូវនេះបានជួបនូវបញ្ហាប្រឈមមួយចំនួនដូចជា បញ្ហាខែ្សអគ្គិសនី , បណ្តាញខ្សែកាប្លិ៍ផ្សេងៗ , ប្រព័ន្ឋលូ និងបណ្តាញកប់ក្រោមដីជាដើម តែទោះជាយ៉ាងណាក្តី មកដល់ពេលនេះ គឺបានសហការជាមួយអាជ្ញាធរនិងភាគីពាក់ព័ន្ឋ កែសម្រួល និងកាប់កាយយកចេញអស់ហើយមិនជួបជាបញ្ហាទៀតទេ ។
លោក គី វីរិន្ទ ប្រធានមន្ទីរសាធារណៈការនិងដឹកជញ្ជូនខេត្ត មានប្រសាសន៍ថា ការពង្រីកកែលំអផ្លូវជាតិលេខ៦ ពីរាជដំណាក់ទៅរង្វង់មូលរូបសំណាកព្រះបាទជ័យវរ្ម័នទី៧ ចំណុចផ្លូវបត់ចូលទៅព្រលានយន្តហោះអន្តរជាតិសៀមរាបនេះ ត្រូវបានពង្រីកជា ៦គន្លង ក្នុងនោះមាន៣គន្លងទៅ និង ៣គន្លងមក ជាថវិកាកម្ចីពីធនាគារអភិវឌ្ឍន៍អាស៊ី ដែលត្រូវប្រើរយៈពេលមួយឆ្នាំ ដូច្នេះគ្រោងនឹងបញ្ចប់តាមគម្រោងផែនការនៅអំឡុងខែតុលាឆ្នាំ២០២១។ លោកបានសំណូមពរដល់ប្រជាពលរដ្ឋដែលរស់នៅតាមដងផ្លូវ និងអ្នកប្រើប្រាស់ផ្លូវដែលកំពុងជួសជុលស្ថាបនាកែលំអនេះ សុំមានការយោគយល់ អធ្យាស្រ័យ អត់ធ្មត់ចំពោះការរំខាន និងផលប៉ះពាល់ដោយសារដំណើរការដ្ឋានសាងសង់ ដូចជាហុយដី ចង្អៀតស្ទះពិបាកក្នុងពេលធ្វើចរាចរណ៍ និងចូលរួមសហការល្អជាមួយនឹងអាជ្ញាធរមានសមត្ថកិច្ច និងក្រុមការងារបច្ចេកទេស ដើម្បីឱ្យដំណើរការគម្រោងស្ថាបនាផ្លូវនេះអនុវត្តទៅដោយរលូន៕
អត្ថបទ និង រូបថត ៖ លោក យូ វង្ស ,លោក ងឹន គឹមឡេង
កែសម្រួលអត្ថបទ ៖ លោក លីវ សាន្ត
