កាលពីព្រឹកថ្ងៃទី២៣ ខែមិថុនាឆ្នាំ២០២១ ព្រះចៅអធិការ និង ព្រះគ្រូសូត្រស្តាំ នៃវត្តកេសរារាម , វត្តស្វាយរមៀត វត្តពោធិបន្ទាយជ័យ និងវត្តដំណាក់ ដែលស្ថិតនៅក្នុងក្រុងសៀមរាប បានមូលមតិគ្នាជាឯកច្ឆ័ន្ទ នាំយកគ្រឿងឧបភោគបរិភោគមួយចំនួនដូចជា៖អង្ករ២០០គីឡូក្រាម , មី១០កេសតូច , ទឹកត្រី១០ដប , ទឹកស៊ីអ៊ីវ១០ដប និងថវិកា១០ម៉ឺនរៀល យកទៅចែកជូនដល់គ្រួសារចំនួន១០គ្រួសារ ដែលកំពុងជាប់ធ្វើចត្តាឡីស័កតាំងពីថ្ងៃទី១៩ ខែមិថុនា ឆ្នាំ២០២១មក ដោយសារពួកគាត់ ជាករណីសង្ស័យដែលប៉ះពាល់ដោយផ្ទាល់និងដោយប្រយោលជាមួយអ្នកមានវិជ្ជមានមេរោគកូវី-១៩ ស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប ។
ព្រះគ្រូវិបុលបញ្ញា ថាមវរោ រី សាត ព្រះរាជាគណៈថ្នាក់កិត្តិយសនៃព្រះរាជាណាចក្រកម្ពុជា និងជាព្រះចៅអធិការវត្តកេសរារាម មានសង្ឃដីកាថា ៖សម្ភារនិងគ្រឿងឧបភោគបរិភោគបន្តិចបន្តួចនេះបានមកពីការចូលរួមរបស់ព្រះសង្ឃនិងប្រជាពុទ្ឋបរិស័ទជិតឆ្ងាយដែលយកមកប្រគេននាពេលកន្លងមក ហើយហើយព្រះចៅអធិការវត្តទាំងនេះបានសន្សំសំចៃទុកសម្រាប់ធ្វើការបែងចែកជូនគ្រួសារណាដែលជួបការលំបាកក្នុងជីវភាពជាក់ស្តែង ទៅតាមលទ្ឋភាពដែលព្រះសង្ឃមាន ហើយតាមរយៈការសំណូមពរពីអាជ្ញាធរនៅមូលដ្ឋានឬគ្រួសារផ្ទាល់ នេះជាសកម្មភាពសប្បុរសធម៌ដែលព្រះសង្ឃនិងប្រជាពុទ្ឋបរិស័ទតែងតែប្រព្រឹត្តតាំងពីបុរាណកាលមក ជាពិសេស គឺជាចំណែកតូចមួយ ជួយដល់រាជរដ្ឋាភិបាល ក្នុងការទប់ស្កាត់ និង កាត់បន្ថយការឆ្លងរាលដាលជំងឺងកូវីដ-១៩ ដែលកំពុងបង្កជាហានិភ័យ ដោយគម្រាមកំហែងលើសុខភាព និង អាយុជីវិតប្រជាជនកម្ពុជានាពេលបច្ចុប្បន្ន ។
ក្នុងឱកាសនោះដែរ ព្រះតេជគុណ រី សាត បានអំពាវនាវដល់បងប្អូនដែលកំពុងធ្វើចត្តាឡីស័កនៅទីនេះ ក៏ដូចជាប្រជាពលរដ្ឋទាំងអស់ ត្រូវយកចិត្តទុកដាក់ថែទាំសុខភាព នាំគ្នាហាត់ប្រាណ និងសូមប្រុងប្រយ័ត្ន ហើយកុំប្រមាថ និង មិនត្រូវមើលស្រាល ចំពោះមេរោគកូវីដ-១៩ ពិសេសឱ្យអនុវត្តបានត្រឹមត្រូវនូវវិធានការណែនាំរបស់ក្រសួងសុខាភិបាល ស្តីពីការការពារ ការទប់ស្កាត់ និង បង្ការការចម្លងជំងឺកូវីដ-១៩ និង អនុវត្តឱ្យបានជាប្រចាំ និងឱ្យបានគ្រប់ៗគ្នានូវវិធានការរបស់ប្រមុខរាជរដ្ឋាភិបាល គឺ៣ការពារ និង៣កុំ ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
