នៅព្រឹកថ្ងៃទី០១ ខែកក្កដា ឆ្នាំ២០២១នេះ ឯកឧត្ដម ច័ន្ទ លំផាត់ អនុប្រធានគណៈកម្មាធិការជាតិគ្រប់គ្រងគ្រោះមហន្ដរាយ តំណាងដ៍ខ្ពង់ខ្ពស់ឯកឧត្ដមបណ្ឌិត គន់ គីម ទេសរដ្ឋមន្ដ្រីទទួលបន្ទុកអនុប្រធានទី១ គណៈកម្មាធិការជាតិគ្រប់គ្រងគ្រោះមហន្ដរាយ បាននាំយកអំណោយរបស់សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ដែលឧបករណ៍សម្ភារសង្គ្រោះគ្រោះមហន្ដរាយ ដូចជា ៖ ឯកសណ្ឋានឈុត , មួកសុវត្ថិភាព , ពិលដៃ , ពិលសម្រាប់មួកសុវត្ដិភាព , មួក គ.ជ.គ.ម , អាវយឺតហ្វឹកហ្វឺន , បាឡូដាក់សម្ភារ , ម៉ាស៊ីនភ្លើងចល័ត , តង់ចល័តសម្រាប់ប្រជាជនទំហំ៤មគុណ៦ម៉ែត្រ ចំនួន២០សម្រាប់ , ម៉ាស៊ីបូបទឹកម៉ាកហុងដា , ទុយយោម៉ាស៊ីនបូបទឹក០.៨×៥០ម៉ែត្រ , ខ្សែពួរ , ទូកស្មាច់តូច ធំ និងទូកម៉ាស៊ីន ជូនដល់កងកម្លាំងអន្ដរាគមន៍រុករក និងសង្គ្រោះ នៃយោធភូមិភាគទី៤ ដើម្បីត្រៀមលក្ខណៈជួយសង្គ្រោះប្រជាពលរដ្ឋដែលពេលជួបគ្រោះធម្មជាតិ នៅរដូវវស្សានេះ ។
ឯកឧត្ដម ច័ន្ទ លំផាត់ មានប្រសាសន៍ថា ការផ្ដល់ជូនជាសម្ភារសង្គ្រោះគ្រោះមហន្ដរាយ ជូនដល់យោធភូមិភាគទី៤ នាពេលនេះ ដើម្បីជួយសង្គ្រោះប្រជាពលរដ្ឋដែលរងគ្រោះដោយគ្រោះធម្មជាតិនានាឲ្យបានទាន់ពេលវេលា នៅក្នុងរដូវវស្សានេះ ព្រោះថាតាមការព្យាកររបស់ក្រសួងធនធានទឹក និងឧតុនិយម បានឲ្យដឹងថានៅរដូវវស្សានេះ អាចនឹងមានឧបទ្ទវហេតុខ្យល់ព្យុះ និងមានជំនន់ទឹកភ្លៀង ដូច្នេះត្រូវត្រៀមខ្លួន និងយកចិត្ដទុកដាក់ហ្វឹកហ្វឺនឲ្យបានស្ទាត់ជំនាញ ជាពិសេស ត្រូវយកចិត្ដទុកដាក់ថែរក្សាសម្ភារសង្គ្រោះគ្រោះមហន្ដរាយទាំងអស់នេះឲ្យបានល្អ ព្រោះវាមានអត្ថប្រយោជន៍សំខាន់ខ្លាំងណាស់ សម្រាប់ជួយសង្គ្រោះអាយុជីវិតទាំងមនុស្ស និងសត្វ ក្នុងអំឡុងពេលដែលមានបញ្ហាកើតឡើង ។
មានប្រសាសន៍ក្នុងឱកាសនោះ លោកឧត្ដមសេនីយ៍ទោ សុក រីនណា នាយសេនាធិការយោធភូមិភាគទី៤ បានសម្ដែងនូវអំណរគុណយ៉ាងធំធេងចំពោះសម្ដេចតេជោនាយករដ្ឋមន្ត្រី ដែលផ្ដល់ឧបករណ៍សម្ភារសង្គ្រោះគ្រោះមហន្ដរាយ ជូនយោធភូមិភាគទី៤ នាពេលនេះ សម្រាប់កងកម្លាំងមានភាពលទ្ធភាពគ្រប់គ្រាន់ក្នុងប្រតិបត្ដិការរុក និងជួយសង្គ្រោះប្រជាពលរដ្ឋ ដែលរងគ្រោះក្នុងគ្រោះមហន្ដរាយផ្សេងៗ កងកម្លាំងនឹងត្រៀមជួយអន្ដរាគមន៍ទៅតាមតំបន់ងាយរងគ្រោះដោយកត្ដាធម្មជាតិនានា ទៅតាមបទបញ្ជាថ្នាក់លើប្រគល់ជូន ។
លោកឧត្ដមសេនីយ៍ទោ សុក រីនណា មានប្រសាសន៍ទៀតថា យោធភូមិភាគទី៤ បានរៀបចំកម្លាំងត្រៀមអន្ដរាគមន៍រុករកនិងសង្គ្រោះ ចំនួន ១.៧១៥នាក់ , រថយន្ដ៥០គ្រឿង , រថយន្ដសង្គ្រោះ១១គ្រឿង ព្រមទាំងមធ្យោបាយសម្ភារមួយចំនួនទៀត៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
