ឆ្លៀតក្នុងឱកាសដ៏មមាញឹកប្រកបដោយទឹកចិត្តអាណិត ស្រលាញ់ រាប់អាន ក្រោមដំបូលសន្តិភាពតែមួយ ដោយមិនរើសអើងក្នុងសកម្មភាពមនុស្សធម៍នៃចលនា ចែករំលែកធនធានផ្ទាល់ខ្លួន និងការកៀងគរបាននូវការជួយឧបត្ថមបន្ថែមជាបន្តបន្ទាប់ផងនោះ នៅព្រឹកថ្ងៃទី០១ ខែកក្កដា ឆ្នាំ២០២១នេះ លោកវរសេនីយ៍ត្រី ខេង ខេមរា នាយផ្នែករដ្ឋបាលសរុប និងជាសមាជិកទទួលការងារអាគារឃាត់ខ្លួនស្នាក់ការត្រៀមបណ្តេញចេញប្រចាំខេត្តសៀមរាប នៃអគ្គនាយកដ្ឋានអន្តោប្រវេសន៍ក្រសួងមហាផ្ទៃ រួមជាមួយអាជ្ញាធរសង្កាត់ស្វាយដង្គំ បានអញ្ជើញចុះសួរសុខទុកនាំយកនូវគ្រឿងឧបភោគបរិភោគដែលជាអំណោយរបស់លោកជំទាវឧកញ៉ាបណ្ឌិត លី អ៊ុអេង អនុប្រធានសភាពាណិជ្ជកម្មមណ្ឌលខេត្តសៀមរាប-ឧត្តរមានជ័យ ប្រគល់ជូនប៉ុស្តិ៍នគរបាលស្វាយដង្គំ និងប្រជាការពារភូមិកន្ត្រក ៣គ្រួសារ ដែលកំពុងធ្វើចត្តាឡីស័ក នៅក្នុងសង្កាត់ស្វាយដង្គំ ក្រុង/ខេត្តសៀមរាប។
ក្នុងឱកាសនោះ លោកវរសេនីយ៍ត្រី ខេង ខេមរា មានប្រសាសន៍ថា ដោយមានការយកចិត្តទុកដាក់ខ្ពស់ពីសំណាក់រាជរដ្ឋាភិបាលពីតម្រូវការចាំបាច់របស់បងប្អូនប្រជាពលរដ្ឋ កំពុងជួបប្រទះនៅការខ្វះខាតខណ:ពេលដែលជំងឺកូវីដ-១៩ កំពុងរាតត្បាតដោយចាប់តាំងពីព្រឹត្តិការណ៍២០កុម្ភៈ បានផ្ទុះឡើងរហូតមកដល់ពេលនេះ យើងទាំងអស់គ្នាមានការព្រួយបារម្ភជាខ្លាំង អំពីលទ្ធភាពនៃការរីរាលដាលជាបន្តបន្ទាប់នៅក្នុងសហគមន៍ ហេតុនេះ សូមបងប្អូនប្រជាពលរដ្ឋយកចិត្តទុក្ខជាចម្បងក្នុងការរួមចំណែកទប់ស្កាត់ការរីករាលដាលជំងឺកូវីដ-១៩នេះ។
លោក ខេង ខេមរា ក៏បានថ្លែងអំណរគុណដល់អាជ្ញាធរខេត្ត និងសូមកោតសសើរចំពោះក្រុមគ្រូពេទ្យ និងក្រុមការងារប្រចាំការនៅក្នុងខេត្ត ដែលបានលះបង់អស់កម្លាំងកាយចិត្ត និងពេលវេលាផ្ទាល់ខ្លួនមិនថាយប់ មិនថាថ្ងៃ ខិតខំបំពេញការងារយ៉ាងសកម្ម ដើម្បីទប់ស្កាត់ជំងឺកូវីដ-១៩ កុំឱ្យរីករាលដាលកាន់តែធំឡើង និងដើម្បីឈានទៅគ្រប់គ្រងឱ្យបាននាពេលខាងមុខ ព្រោះយើងទាំងអស់គ្នាបានដឹងហើយថា នេះជាដំណាក់កាលដែលយើងទាំងអស់គ្នាត្រូវប្រុងប្រយ័ត្នខ្ពស់បំផុត ខណៈពេលដែលរាជរដ្ឋាភិបាលបាននឹងកំពុងទប់ស្កាត់ ដោយបានធ្វើការអប់រំផ្សព្វផ្សាយជាហូរហែទាំងនៅក្នុងសហគមន៍ និងនៅតាមគ្រឹះស្ថានសិក្សា ឲ្យអនុវត្តឲ្យបានខ្ជាប់ខ្ជួនតាមវិធានការរបស់ក្រសួងសុខាភិបាល និងវិធានការរបស់រាជរដ្ឋាភិបាល គឺ៣ការពារ និង៣កុំ ផងដែរ។
សូមជម្រាបថា អំណោយដែរបានប្រគល់ជូននាឱកាសនោះដែររួមមាន៖ ប៉ុស្តិ៍នគរបាលស្វាយដង្គំ ទទួលបាន៖ អង្ករ៥០គីឡូ ,មីកំប៉ុង ៤យួរ ,ត្រីខ ២យួរ ,ទឹកស៊ីអ៊ីវ ២យួរ ,ទឹកសុទ្ធ ២កេស និងថវិកា១០ម៉ឺនរៀល។ ចំនែកគ្រួសារប្រជាការពារ៣គ្រួសារ ក្នុង១គ្រួសារទទួលបាន៖ អង្ករ៥០គីឡូ ,មីកំប៉ុង ២យួរ ,ត្រីខ ១យួរ ,ទឹកស៊ីអ៊ីវ ២យួរ ,ទឹកសុទ្ធ ២កេស និងថវិកា១០ម៉ឺនរៀល៕
អត្ថបទ និង រូបភាព៖ លោកស៊ាន សុផាត
កែសម្រួល៖ លោក អ៊ុន ណារាជ្យ
