លោកឧកញ៉ា ហួត អៀងតុង ប្រធានអគ្គនាយកហត្ថាកសិករលីមីតធីត មានប្រសាសន៍ថា ក្នុងឆ្នាំ២០១៨ កន្លងទៅនេះ ថ្នាក់គ្រប់គ្រង និងបុគ្គលិកគ្រប់ជាន់ថ្នាក់របស់ហត្ថាកសិករ បានខិតខំប្រឹងប្រែងអស់ពីកម្លាំងកាយចិត្ត ដើម្បីអនុវត្តផែនការយុទ្ធសាស្ត្ររហូតដល់សម្រេចបានទៅលើការផ្តល់ឥណទាន និងប្រមូលប្រាក់បញ្ជើសន្សំពីអតិថិជន នូវអត្រាកំណើន៣១,២៨ភាគរយ ដោយកើនឡើងពីចំនួន៥៧៦.៨៨ លានដុល្លារអាម៉េរិកក្នុងឆ្នាំ២០១៧ ទៅដល់ ចំនួន៧៥៧.៣២លានដុល្លារអាម៉េរិកក្នុងឆ្នាំ២០១៨ ខណៈដែលសមតុល្យប្រាក់បញ្ញើសន្សំសម្រេចបានក្នុងអត្រាកំណើន ៣០,៦២ភាគរយ ដោយកើនឡើងពី ៣៦៧.៣៥ លានដុល្លារអាម៉េរិក ក្នុងឆ្នាំ២០១៧ ទៅដល់ ៤៨០.១០លានដុល្លារអាម៉េរិកក្នុងឆ្នាំ២០១៨ ហើយបានក្លាយទៅជាស្ថាប័នទី១ ដែលបានបោះផ្សាយនូវសញ្ញាប័ណ្ណសាជីវកម្មដំបូងបំផុតនៅក្នុងប្រទេសកម្អុជា ។
លោកឧកញ៉ា ហួត អៀងតុង មានប្រសាសន៍ទៀតថា សម្រាប់ផែនការឆ្នាំ២០១៩ យើងមានផែនការយុទ្ឋសាស្ត្រធំៗជាច្រើន ដើម្បីឲ្យបុគ្គលិកយកទៅអនុវត្តន៍ រួមមាន ៖ ធ្វើការជំរុញកំណើននៃការផ្តល់សេវាឥណទាន និងការប្រមូលប្រាក់, បញ្ញើសន្សំតាមរយៈការបង្កើតនូវផលិតផលថ្មីៗបន្ថែមទៀត ដើម្បីចាប់យកចំណែកទីផ្សារថ្មី ធ្វើការជំរុញកំណើននៃការណែនាំសេវាធានារ៉ាប់រង ធ្វើវឌ្ឍនភាពលើសេវាធនាគារចល័ត និងធ្វើការពង្រឹងសុវត្តិភាព លើប្រព័ន្ធព័ត៌មានវិទ្យាជាដើម ខណៈដែលគិតត្រឹមខែធ្នូ ឆ្នាំ២០១៨នេះ ហត្ថាកសិករ មានសាខាសរុបចំនួន១៧៨ , មានម៉ាស៊ីនអេធីអឹមចំនួន ១២៩គ្រឿងនៅទូទាំងប្រទេស , មានសមតុល្យប្រាក់បញ្ញើសន្សំចំនួនជាង ៤៨០ លានដុល្លារអាមេរិក ជាមួយនឹងចំនួនអតិថិជនដាក់ប្រាក់បញ្ញើសន្សំជាង ២៣៥,០០០ នាក់ និងផលប័ត្រឥណទានសរុបមានចំនួនជាង ៧៥៧ លានដុល្លារអាមេរិក ដោយមានអតិថិជនខ្ចីប្រាក់ឥណទានចំនួនជាង ១៤៤,០០០ នាក់ ។
លោកឧកញ៉ា ហួត អៀងតុង មានប្រសាសន៍បន្ថែមទៀតថា នៅឆ្នាំ២០១៦ ហត្ថាកសិករ បានក្លាយជាបុត្រសម្ព័ន្ធនៃធនាគារក្រុងស្រ៊ី ដែលជាធនាគារធំជាងគេលំដាប់ទី៥ នៅព្រះរាជា ណាចក្រថៃឡង់ និងជាសមាជិកនៃធនាគារ MUFG សម្ព័ន្ធធនាគារដែលធំជាងគេនៅប្រទេសជប៉ុន និងជាក្រុមហិរញ្ញវត្ថុ ធំបំផុតមួយនៅក្នុងពិភពលោក ។
ព័ត៌មានជាតិ ថ្មីៗ
លោកឧកញ៉ា ហួត អៀងតុង មានប្រសាសន៍យ៉ាងដូច្នេះ ក្នុងពិធីមហាសន្និបាតប្រចាំឆ្នាំលើកទី២២ ដែលរៀបចំធ្វើឡើងនៅសណ្ឋាគារសុខាសៀមរាប ខេត្តសៀមរាប នាព្រឹកថ្ងៃទី០៨ ខែកុម្ភៈ ឆ្នាំ២០១៩នេះ ដោយមានអ្នកចូលរួមពីសំណាក់ថ្នាក់គ្រប់គ្រង និងបុគ្គលិកសំខាន់ៗប្រមាណជិត ៤០០នាក់ មកពីសាខាគ្រប់ខេត្ត រាជធានី នៃព្រះរាជាណាចក្រកម្ពុជា ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
