ឯកឧត្តមទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការនិងដឹកជញ្ជូន បានមានប្រសាសន៍ថា ការសម្រេចដាក់ឱ្យដំណើរការជាផ្លូវការ នូវមណ្ឌលផ្តល់សេវាសាធារណៈ ទី៥ នៅក្នុងខេត្តសៀមរាប ដែលមានទីតាំងស្ថិតនៅជាន់ទី២ នៃផ្សារទំនើបហេរីថេក វ៉ក់ ក្នុងក្រុងសៀមរាប គឺដើម្បីបង្ខិតសេវាទៅជិតប្រជាពលរដ្ឋ ឱ្យបងប្អូនប្រជាពលរដ្ឋអាចទទួលបានសេវាសាធារណៈមួយប្រកបដោយប្រសិទ្ធភាព តម្លាភាព ទាន់ពេលវេលា និងចៀសវាងការខាតបង់ថវិកាដោយប្រើប្រាស់សេវារត់ការខាងក្រៅបន្ថែម ដូច្នេះចាប់ពីថ្ងៃនេះតទៅ បងប្អូនប្រជាពលរដ្ឋ អាចមកទទួលសេវាសាធារណៈជាច្រើន ពីច្រកចេញចូលតែមួយនេះ ដូចជា៖ ការធ្វើឬប្តូរប័ណ្ណបើកបរ ផ្ទេកម្មសិទ្ធិយានយន្ត ការស្នើសុំស្លាកលេខយានយន្តជាដើម។
ឯកឧត្តមទេសរដ្ឋមន្ត្រី ស៊ុន ចាន់ថុល មានប្រសាសន៍យ៉ាងដូច្នេះ ក្នុងឱកាសអញ្ជើញជាអធិបតីក្នុងពិធីបើកឱ្យដំណើរការជាផ្លូវជាការ មណ្ឌលផ្តល់សេវាសាធារណៈនៅខេត្តសៀមរាប នៃផ្សារទំនើបហេរីថេក វ៉ក់ នាព្រឹកថ្ងៃទី២១ ខែកក្កដា ឆ្នាំ២០២១នេះ មានវត្តមានក្នុងឱកាសនោះដែរ មានឯកឧត្តម អ៊ាន ឃុន ប្រធានក្រុមប្រឹក្សាខេត្ត និង ឯកឧត្តម ទៀ សីហា អភិបាលខេត្តសៀមរាប ដោយមានការអញ្ជើញចូលរួមពីសំណាក់ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ អគ្គនាយក អគ្គនាយករង នៃក្រសួងសាធារណការ និងដឹកជញ្ជូន និងមន្ត្រីអ្នកមុខអ្នកការក្នុងខេត្តសៀមរាប ជាច្រើនរូបទៀត ។
ព័ត៌មានជាតិ ថ្មីៗ
ឯកឧត្តមទេសរដ្ឋមន្ត្រី ស៊ុន ចាន់ថុល មានប្រសាសន៍បន្ថែមថា កន្លងមក ក្រសួងសាធារណការនិងដឹកជញ្ជូន បានសម្រេចដាក់ឱ្យដំណើរការជាផ្លូវការ នូវមណ្ឌលផ្តល់សេវាសាធារណៈ នៅរាជធានីភ្នំពេញចំនួន៤ទីតាំងរួចមកហើយ ដូច្នេះទីតាំងទី៥នេះ គឺស្ថិតនៅជាន់ទី២ នៃផ្សារទំនើបហេរីថេក វ៉ក់ ដែលមានអាសយដ្ឋានអគាលេខ១៥៨ ផ្លូវជាតិលេខ៦ ភូមិមណ្ឌល២ សង្កាត់ស្វាយដង្គុំ ក្រុងសៀមរាប ខេត្តសៀមរាប ហើយចាប់ពីថ្ងៃទី២១ ខែកក្កដា ឆ្នាំ២០២១នេះតទៅ បងប្អូនប្រជាពលរដ្ឋទាំងក្នុងខេត្តសៀមរាប ក៏ដូចជាបណ្តាខេត្តដទៃទៀត អាចមកទទួលសេវាសាធារណៈដូចជា៖ ការចុះបញ្ជីរថយន្ត និងផ្ទេរកម្មសិទ្ធិយានយន្ត , ការប្ដូរបណ្ណបើកបរ , ការដាក់ពាក្យសុំត្រួតពិនិត្យលក្ខណៈបច្ចេកទេសយានជំនិះ(ឆៀក) ចាប់ពីម៉ោង៨ព្រឹក ដល់ដល់៨យប់ ដែលមានរយៈពេល៧ថ្ងៃក្នុងមួយសប្តាហ៍ ។
ពាក់ព័ន្ធនឹងការសម្ពោធដាក់ឱ្យដំណើរការជាផ្លូវការមណ្ឌលផ្តល់សេវាសាធារណៈ នៅក្នុងខេត្តសៀមរាបនាពេលនេះ ឯកឧត្តម ទៀ សីហា អភិបាលខេត្ត បានបង្ហាញនូវការគាំទ្រទាំងស្រុង ចាត់ទុកថាមណ្ឌលនេះ ជាសមិទ្ធផលថ្មីមួយទៀតរបស់ក្រសួងសាធារណការ និងដឹកជញ្ជូន លើទឹកដីខេត្តសៀមរាប ក្នុងការចូលរួមចំណែកសម្រេចឱ្យបាននូវចក្ខុវិស័យរបស់រាជរដ្ឋាភិបាលក្នុងកម្មវិធីកំណែទម្រង់វិមជ្ឈការ និងវិសហមជ្ឈការ តាមរយៈការលើកកម្ពស់ប្រសិទ្ធភាព គុណភាព និងទំនើបកម្ម នៃការផ្ដល់សេវារដ្ឋបាល ឱ្យបានកាន់តែល្អប្រសើរឡើងជូនប្រជាពលរដ្ឋ ។
ឯកឧត្តម ទៀ សីហា មានប្រសាសន៍ទៀតថា ខេត្តសៀមរាប តាមរយៈការផ្តល់សេវារដ្ឋបាលនៅថ្នាក់ក្រោមជាតិ ដែលមានអង្គភាពច្រកចេញចូលតែមួយរដ្ឋបាលខេត្ត និងការិយាល័យច្រកចេញចូលតែមួយក្រុងស្រុក បាននឹងកំពុងបម្រើសេវាជូនប្រជាពលរដ្ឋយ៉ាងមមាញឹក និងការទទួលខុសត្រូវខ្ពស់ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ មកទទួលសេវាដោយផ្ទាល់នៅផ្សារទំនើប ហេរីថេក វ៉ក និងអង្គភាពច្រកចេញចូលតែមួយរដ្ឋបាលខេត្ត កុំចាំបាច់ពឹងពាក់អ្នកដទៃ (អ្នករត់ការ) ដែលនាំឲ្យខាតបង់ថវិកាច្រើន និងសូមឲ្យមន្ត្រីបំរើសេវារបស់យើង ធ្វើជាមន្ត្រីបំរើរាស្រ្ត ដោយស្មោះត្រង់ ផ្តល់សេវាជូនប្រជាពលរដ្ឋ បានកាន់តែលឿន និងឆាប់រហ័ស ហើយលុបបំបាត់នូវភាពអសកម្មទាំងឡាយ៕
អត្ថបទ និង រូបថត ៖ លោក យូ វង្ស ,លោក ជា ស្រស់ ,លោក ឈិត សាវី
កែសម្រួលអត្ថបទ ៖ លោក លីវ សាន្ត
