នៅព្រឹកថ្ងៃទី២២ ខែកក្កដា ឆ្នាំ២០២១ លោក ង៉ាន់ ភិរុណ អភិបាលរងខេត្ត និងជាប្រធានក្រុមការងារខេត្ត ចុះជួយមូលដ្ឋានស្រុកបន្ទាយស្រី តំណាងដ៍ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប រួមជាមួយសមាជិកសមាជិកាក្រុមការងារ នាំយកនូវទៀនវស្សា ទេយ្យវត្ថុ និងបច្ច័យមួយចំនួន ទៅវេរប្រគេនព្រះសង្ឃដែលគង់ចាំព្រះវស្សាសម្រាប់វត្ត និងអាស្រមទាំង២២ ក្នុងស្រុកបន្ទាយស្រី ស្របពេលដល់រដូវកាលដែលព្រះសង្ឃ ត្រូវធ្វើវដ្តប្រតិបត្តិ ចូលព្រះវស្សា អស់កាលត្រីមាស សម្រាប់ជាចតុប្បច្ច័យភិក្ខុសង្ឃប្រើប្រាស់ ក៍ដូចជាតបទៅនឹងតម្រូវការចាំបាច់នៃដំណាក់កាលជួបការលំបាកដោយវិបត្តិជំងឺកូវី-១៩ ដែលកំពុងរាតត្បាតឆ្លងចូលសហគមន៍ជាបន្តបន្ទាប់ ហើយបងប្អូនប្រជាពលរដ្ឋត្រូវគោរពតាមសេចក្តីណែនាំ និងវិធានការ៣ការពារ៣កុំរបស់រាជរដ្ឋាភិបាល ពួកគាត់ពុំបានទៅជួបជុំធ្វើបុណ្យទាន ឬពិធីសាសនាផ្សេងៗ ដូចពេលមុនឡើយ ជាហេតុនៅតាមបណ្តាលវត្ត និងអាស្រមមួយចំនួនជួបនូវការខ្វះខាតផ្នែកចង្ហាន់។ អំណោយដែរប្រគេនដល់វត្ត និងអាស្រមចំនួន២២ទៀត សរុបរួមមាន៖ ថវិកា៩,៤០០,០០០ម៉ឹនរៀល ,អង្ករ១,១០០គ.ក្រ ,ទៀនចំណាំវស្សាចំនួន ២២គូ ,សាដក ១១០កញ្ចប់ ,មីជាតិ៤៤កេស ,ត្រីខ៤៤យួរ ,ទឹកត្រី៤៤យួរ ,ទឹកស៊ីអ៊ីវ៤៤យួរ ,ទឹកសុទ្ឋ៤៤កេស ,ទឹកក្រូច៤៤កេស,ដំណាប់ស្វាយ២០០កញ្ចប់ ,ម៉ាស១១,០០០ម៉ាស់ ,អង្ករសុខភាព២០០កញ្ចប់ និងអាល់កុល៤៤កានផងដែរ។
លោក ង៉ាន់ ភិរុណ មានប្រសាសន៍ថា សម្ភារ និងទេយ្យវត្ថុដែលបាននាំយកមកប្រគេននៅពេលនេះ គឺជាការចូលរួមរបស់សមាជិកសមាជិកាក្រុមការងារគណៈបក្សចុះពង្រឹងស្រុក ដែលបានបរិច្ចាគធនធានថវិកាសម្រាប់ចំណាយទិញ និងប្រគេនដល់ព្រះសង្ឃ តាជីដូនជីនៅក្នុងវត្តនិងអាស្រមទាំង២២ ក្នុងស្រុកបន្ទាយស្រី។ នៅកម្ពុជាវិស័យអាណាចក្រ និងពុទ្ឋចក្រតែងតែដើរទន្ទឹមគ្នាពុំអាចខ្វះមួយណាបានឡើយ។ ក្នុងការចូលរួមជួយស្តារ និងអភិវឌ្ឍន័សង្គមជាតិឱ្យរីកចំរើន ខណៈដែររាជរដ្ឋាភិបាលកម្ពុជា បានចែងក្នុងរដ្ឋធម្មនុញ្ញថា ព្រះពុទ្ឋសាសនាជាសាសនារបស់រដ្ឋ។ បើទោះបីកម្ពុជាបាននិងកំពុងជួបប្រទះបញ្ហាធំៗ ដូចជាបញ្ហាការរីករាលដាលជំងឺកូវីដ-១៩ បញ្ហាគ្រោះមហន្តរាយធម្មជាតិនានា ក៏ពិតមែន ប៉ុន្តែកម្ពុជានៅតែអាចឈរក្នុងភាពជាម្ចាស់ការដោយខ្លួនឯងបាន ហើយបានកសាងនូវសមិទ្ធផលជាច្រើនពាសពេញផ្ទៃប្រទេស និងមានការអភិវឌ្ឍរីកចម្រើនលើគ្រប់វិស័យ ក្រោមអធិបតីភាពដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ខណៈខេត្តសៀមរាបបច្ចុប្បន្ន កំពុងបន្តស្ថាបនាផ្លូវ៣៨ខ្សែ ក្នុងក្រុងសៀមរាប ដែលផ្លូវទាំងនេះកំពុងសាងសង់ ហើយគ្រោងនឹងរួចរាល់ជាស្ថាពរតាមផែនការគ្រោងទុក នៅចុងឆ្នាំ២០២១នេះ។
លោក ង៉ាន់ ភិរុណ ក៏សូមថ្លែងអំណរគុណចំពោះទឹកចិត្តសប្បុរសធម៌ របស់សមាជិកសមាជិកានៃក្រុមការងារទាំងអស់ ដែលបានលះបង់ធនធានផ្ទាល់ទោះតិចក្តីច្រើនក្តី ដើម្បីយកមកចែករំលែកដល់ទីអារាម ជួយរំលែកការលំបាក ក្នុងដំណាក់កាលដោយសារជំងឺកូវីដ-១៩ កំពុងរីករាលដាលគួរឱ្យបារម្ភ ដែលនេះបង្ហាញឱ្យឃើញពីវប្បធម៌ចែករំលែក ជួយទុក្ខធុរៈគ្នាទៅវិញទៅមកក្នុងគ្រាលំបាក និងបង្ហាញពីទឹកចិត្តនិងស្មារតីយកអាសារ ជួយសង្គ្រោះគ្នាទៅតាមលទ្ឋភាព ស្របតាមគោលនយោបាយរបស់រាជរដ្ឋាភិបាលកម្ពុជា ក្នុងការកាត់បន្ថយភាពក្រីក្ររបស់បងប្អូនប្រជាពលរដ្ឋនៅតាមមូលដ្ឋាន។ ក្នុងឱកាសនោះដែរលោកអភិបាលរងខេត្ត ក៍បានអំពាវនាវដល់ព្រះសង្ឃ និងបងប្អូនប្រជាពលរដ្ឋទាំងអស់ត្រូវចូលរួមទាំងអស់ ត្រូវចូលរួមអនុវត្តតាមសេចក្តីជូនដំណឹង និងសេចក្តីណែនាំនានារបស់រដ្ឋបាលខេត្ត ជាពិសេសត្រូវប្រកាន់ខ្ជាប់តាមការណែនាំរបស់ក្រសួងសុខាភិបាល ក៍ដូចជាវិធានការរាជរដ្ឋាភិបាល៣ការពារ និង៣កុំ ក្នុងការទប់ស្កាត់ការរីករាលដាលនៃជំងឺកូវីដ-១៩។ ក្នុងនោះដើម្បីរួមគ្នាការពារទប់ស្កាត់កុំឲ្យជំងឺកូវីដ-១៩ បន្តឆ្លងរីករាលដាលចូលសហគមន៍បន្តទៀត ដោយត្រូវចូលរួមអនុវត្តវិធានការ៣កុំ ៣ការពារឲ្យបានជាប្រចាំ៕
ព័ត៌មានជាតិ ថ្មីៗ
អត្ថបទ និង រូបភាព៖ លោក យូ វង្ស
កែសម្រួល៖ លោក អ៊ុន ណារាជ្យ
