គិតត្រឹមរយៈពេល៣ថ្ងៃ គឺចាប់ពីថ្ងៃទី១៩ ដល់ថ្ងៃទី២១ ខែកក្កដា ឆ្នាំ២០២១ អាជ្ញាធរខេត្តសៀមរាប បានទទួលប្រជាពលរដ្ឋដែរវិលត្រលប់ពីក្រៅប្រទេសបានចំនួនជាង៣៨០០នាក់ ដែលកំពុងសម្រាកព្យាបាលជំងឺកូវីដ-១៩ និងកំពុងបន្តធ្វើចត្តាឡីស័កក្នុងខេត្ត បន្ទាប់ពីពេលថ្មីៗនេះ រាជរដ្ឋាភិបាលបានសម្រេចយកខេត្តសៀមរាបជាខ្សែត្រៀមទី២ ក្រោយពីខេត្តឧត្តរមានជ័យកំពុងខ្វះខាតកន្លែង មិនអាចទទួលដាក់ប្រជាពលរដ្ឋខ្មែរចំណាកស្រុកបន្ដទៀតបាន។
មានប្រសាសន៍ក្នុងប្រជុំជាមួយថ្នាក់ដឹកនាំក្នុងខេត្តតាមវីឌីអូ Zoom នៅព្រឹកថ្ងៃទី២២ ខែកក្កដានេះ ឯកឧត្តម ទៀ សីហា អភិបាលនៃគណៈអភិបាលខេត្តសៀមរាប បានឲ្យដឹងថា ជាមធ្យមក្នុងមួយថ្ងៃពលរដ្ឋដែរត្រឡប់មកពីក្រៅប្រទេសចូលមកកាន់ខេត្តសៀមរាប មានចំនួនប្រមាណជាង៣០០នាក់ តាមច្រកខេត្តបន្ទាយមានជ័យ និងខេត្តឧត្តរមានជ័យ ដែលភាគច្រើនវិលមកពីប្រទេសថៃ។ ក្នុងនោះសម្រាប់ខេត្តសៀមរាបមានមណ្ឌលព្យាបាលជំងឺកូវីដ-១៩ កម្រិតស្រាល និងមណ្ឌលចត្តាស័កចំនួន០៦ មានដូចជា៖ មណ្ឌលសាលាគរុកុសល្យ និងវិក្រឹតការខេត្ត ,មណ្ឌលវិទ្យាល័យអង្គរ ,មណ្ឌលវិទ្យាល័យសម្តេចឱ ,មណ្ឌលវិទ្យាល័យ១០ មករា ,មណ្ឌលវិទ្យាល័យហ៊ុន សែន វត្តស្វាយ និងមណ្ឌលថ្មីភោជនីដ្ឋានវិមានមង្គល។
ឯកឧត្តម ទៀ សីហា មានប្រសាសន៍ទៀតថា បច្ចុប្បន្នអាជ្ញាធរខេត្ត បាននឹងកំពុងបន្ថែមចំនួនរយៈពេលនៃការធ្វើចត្តាឡីស័ករបស់បងប្អូនប្រជាពលរដ្ឋ ដែលវិលត្រលប់មកពីក្រៅប្រទេសរហូតដល់២១ថ្ងៃ ដើម្បីបញ្ជៀសការរីករាលដាលវីរុសបំប្លែងខ្លួនថ្មីប្រភេទឌែលតា (Delta ) ខណៈវីរុសបំប្លែងខ្លួនថ្មីនេះ កំពុងបង្កការភ័យខ្លាំងទៅលើប្រជាពលរដ្ឋខ្មែរចំណាកស្រុកមកពីក្រៅប្រទេស ដែលមេរោគនេះមានភាពកាចសាហាវជាងមេរោគធម្មតា។ ក្នុងនោះការបញ្ជូនអ្នកវិលត្រលប់មកពីក្រៅប្រទេសមកខេត្តសៀមរាប អាជ្ញាធរខេត្តបានបែងចែកជា០២ផ្នែកគឺ ទី១.ចត្តាឡីស័ក និងទី២.មកសម្រាកព្យាបាលជំងឺកូវីដ-១៩ ហើយពួកគាត់ទាំងនោះ អាចប្រឈមខ្លាំងជាមួយជំងឺបំលែកខ្លួនប្រភេទថ្មី។ ចាមួយគ្នានោះដែរឯកឧត្តមអភិបាលខេត្ត ក៏បានជំរុញឱ្យក្រុមការងារទាំងអស់ត្រូវយកការងារទប់ស្កាត់ជំងឺកូវីដ-១៩នេះ ជាការងារអតិភាព ដោយត្រូវបង្កើនកិច្ចសហការត្រួតពិនិត្យផ្នែកសន្តិសុខ សណ្តាប់ធ្នាប់ និងបញ្ហាបរិស្ថានផងដែរ ។
មានប្រសាសន៍ក្នុងឱកាសនោះដែរ ឯកឧត្តមវិជ្ជបណ្ឌិត ក្រុស សារ៉ាត់ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាល នៃរដ្ឋបាលខេត្ដសៀមរាប បានបញ្ជាក់ថាបច្ចុប្បន្នខេត្តសៀមរាប កំពុងស្ថិតនៅលើបន្ទាត់ក្រហមនៅឡើយ ដូចនេះសូមឲ្យប្រជាពលរដ្ឋត្រូវបង្កើនការប្រុងប្រយ័ត្នឱ្យបានខ្ពស់ ដោយវិធាន៣កុំ និង៣ការពារ ឱ្យបានជាប់ជាប្រចាំ ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩ ខណ: បច្ចុប្បន្នជំងឺនេះកំពុងតែមានការកើតឡើងនៅក្នុងភូមិសាស្ត្រខេត្តរបស់យើង៕
អត្ថបទ៖ លោក បុង ឆវន្ត ,រូបភាព៖ លោក វី សុវត្ត
កែសម្រួលអត្ថបទ៖ លោក អ៊ុន ណារាជ្យ
