ជនបរទេសជាច្រើននាក់ដែរបច្ចុប្បន្នកំពុងស្នាក់នៅក្នុងខេត្ដសៀមរាប បានសម្ដែងការរីករាយចំពោះរដ្ឋាភិបាលកម្ពុជាក្រោយពួកគាត់ទទួលបានចាក់វ៉ាក់សាំងបង្ការជំងឺកូវីដ-១៩ ដូសទី១ ដោយមិនគិតថ្លៃ ដូចជាប្រជាពលរដ្ឋខ្មែរដែរ។
ពួកគាត់បានលើកឡើងថា ពួកគាត់មួយចំនួនបានរស់នៅខេត្ដសៀមរាប ប្រទេសកម្ពុជា ជាច្រើនឆ្នាំហើយ ចំពោះការបានទទួលវ៉ាក់សាំងបង្ការជំងឺកូវីដ-១៩ ដោយមិនគិតថ្លៃនេះ គឺពិតជាធ្វើពួកគាត់សប្បាយចិត្ដខ្លាំងណាស់ ព្រោះថាការចាក់វ៉ាក់សាំងនេះ វានឹងអាចជួយការពារពួកគាត់បានពីមេរោគកូវីដ-១៩។ ពួកគាត់សូមថ្លែងអំណរគុណ ដល់រាជរដ្ឋាភិបាលកម្ពុជា ដែលបានយកចិត្ដទុកដាក់ដល់ជនបរទេសដែលបានស្នាក់នៅក្នុងខេត្ដសៀមរាបអស់។
បើតាមលោកឱសថការី លឹម ហេង អនុប្រធានមន្ទីរពេទ្យបង្អែកខេត្ត និងជាប្រធានមណ្ឌលផ្តល់វ៉ាក់សាំង បានមានប្រសាសន៍ថា ចំពោះការចាក់វ៉ាក់សាំងការពារជំងឺកូវីដ-១៩ ជូនដល់ជនបរទេសទាំងអស់ដែលកំពុងស្នាក់នៅ និងកំពុងបំពេញការងារក្នុងខេត្តសៀមរាបនេះ គឺធ្វើឡើងតាមគោលការណ៍ស្ម័គ្រចិត្ត និងមិនគិតថ្លៃ ដែលបានអនុវត្ដចាប់តាំងពីថ្ងៃទី២០ ខែកក្កដា ដល់ថ្ងៃទី២៣ ខែកក្កដា ឆ្នាំ២០២១។ ក្នុងការចាក់វ៉ាក់សាំងការពារជំងឺកូវីដ-១៩ នេះ គឺផ្តល់ជូនដល់ចំពោះជនបរទេសដែលបានស្នាក់នៅ និងកំពុងធ្វើការងារនៅក្នុងខេត្តសៀមរាបប៉ុណ្ណោះ ហើយចំពោះជនបរទេសដែលបានចុះឈ្មោះចាក់វ៉ាក់ គឺមានចំនួនប្រមាណជាង២ពាន់នាក់ផងដែរ។ លោកថានៅថ្ងៃចាក់វ៉ាក់សាំងលើកទី១ លើជនបរទេសបានចំនួនជាង៧រយនាក់ ហើយពួកគាត់បានបន្ដទៅទទួលវ៉ាក់សាំង ជាបន្ដបន្ទាប់រហូតគ្រប់ចំនួន។
សូមជម្រាបថា កាលពីពេលថ្មីៗកន្លងទៅរដ្ឋបាលខេត្តបានជូនដំណឹងដល់ជនបរទេសដែររស់នៅខេត្តសៀមរាប ដែលមានបំណងចង់ចាក់វ៉ាក់សាំងការពារជំងឺកូវីដ-១៩ ត្រូវភ្ជាប់មកជាមួយនៅឯកសារពាក់ព័ន្ធដែលមានដូចជា៖ លិខិតឆ្លងដែន ដែលទិដ្ឋាការនៃការស្នាក់នៅ ក្នុងប្រទេសកម្ពុជានៅមានសុពលភាព ហើយចំពោះជនបរទេស ទាំងឡាយណាដែលមានទិដ្ឋាការនៃការស្នាក់នៅក្នុងប្រទេសកម្ពុជាហួសសុពលភាព ហើយមានបំណងចង់ចាក់វ៉ាក់សាំងការពារជំងឺកូវីដ-១៩ គឺត្រូវទៅធ្វើការពន្យាទិដ្ឋាការនៃការស្នាក់នៅ ក្នុងប្រទេសកម្ពុជា ស្របតាមនីតិវិធីដែលមានជាធរមាន និងលិខិតបញ្ជាក់សុខភាព ឬវេជ្ជបញ្ជានៃការប្រើប្រាស់ថ្នាំនានាដែលកំពុប្រើប្រាស់ជារៀងរាល់ថ្ងៃប្រសិនបើមាន៕
អត្ថបទ និងរូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
