បើតាមសមត្ថកិច្ចស្រុកសូទ្រនិគម បានឲ្យដឹងថា យ៉ាងហោចណាស់មនុស្សម្នាក់បានស្លាប់ភ្លាមៗនៅនឹងកន្លែង និងមនុស្ស២នាក់ទៀតបានរងរបួសធ្ងន់ ក្នុងករណីគ្រោះថ្នាក់ចរាចររថយន្ត និងម៉ូតូ កាលពីវេលាម៉ោង ០២ និង០០នាទី រសៀលថ្ងៃទី២២ ខែកក្កដា ឆ្នាំ២០២១ នៅចំណុចភូមិបឹងវៀន ឃុំតាយ៉ែក ស្រុកសូទ្រនិគម ខេត្តសៀមរាប។
សមត្ថកិច្ច បានឲ្យដឹងទៀតថា គ្រោះថ្នាក់ចរាចរនេះបង្កឡើងដោយរថយន្តម៉ាក ISUZU ពណ៌ទឹកមាស ពាក់ស្លាកលេខ បាត់ដំបង ២B.២៧៣០ បើកបរដោយជនមិនស្គាល់អត្តសញ្ញាណ បានបើកមកបុកម៉ូតូមួយគ្រឿងម៉ាកសង់កូរ៉េ ពណ៌ក្រហម ពាក់ស្លាកលេខ សៀមរាប ១H.១៤១០ ជិះគ្នា៣នាក់ ដែលបើកបរក្នុងទិសដៅស្របគ្នាបានបុកពីក្រោយពេញទំហឹង បណ្ដាលឲ្យមនុស្សម្នាក់ឈ្មោះ ឆាង តែម ភេទស្រី អាយុ៧០ឆ្នាំ មានទីលំនៅភូមិដាក់ផ្ការ ឃុំតាយ៉ែក ស្រុកសូទ្រនិគម បានស្លាប់នៅនឹងកន្លែង និងមនុស្ស២នាក់ទៀតបានរបួសធ្ងន់ មានឈ្មោះ វ័ន្ត តុញ ភេទស្រី អាយុ៣២ និងឈ្មោះ វ័ន្ត ហូន ភេទស្រី អាយុ៣០ឆ្នាំ ដែលអ្នកទាំង៣នាក់មានទីលំនៅក្នុងភូមិឃុំជាមួយគ្នា។
ក្រោយកើតហេតុអ្នកបើករថយន្តបានរត់គេចខ្លួនបាត់ ហើយអ្នករបួសទាំង២ ត្រូវបានសមត្ថកិច្ចបញ្ជូនទៅសង្គ្រោះនៅមន្ទីរពេទ្យស្រុកសូទ្រនិគម រីឯអ្នកស្លាប់បានប្រគល់ឲ្យក្រុមគ្រួសារយកទៅធ្វើបុណ្យ។ ក្នុងនោះដែរចំពោះវត្ថុតាំងមានរថយន្ត និងម៉ូតូត្រូវបានជំនាញយកទៅរក្សាទុកបណ្ដោះអាសន្ន នៅអធិការស្រុកសូទ្រនិគម ដើម្បីរងចាំការដោះស្រាយនៅពេលក្រោយ៕
អត្ថបទ និង រូបភាព៖ លោក ខេង ឧត្តម
កែសម្រួល៖ លោក អ៊ុន ណារាជ្យ
