បើតាមលោកអនុសេនីយ៍ឯក ភឹម ភួន នាយរងផ្នែកចរាចរណ៍ស្រុកពួក បានឲ្យដឹងថា នៅវេលាម៉ោង១២ នឹង៥០នាទី ឈានចូលថ្ងៃទី២២ ខែកក្កដា ឆ្នាំ២០២១នេះមានគ្រោះថ្នាក់ចរាចរមួយបានកើតឡើង រវាងរថយន្តចំនួន២គ្រឿងបានបុកគ្នា នឹងបានបណ្ដាលឲ្យមនុស្សចំនួន២នាក់បានរងរបួស ត្រង់ចំនុចផ្លូវជាតិលេខ៦ ក្នុងភូមិគោកថ្មី ឃុំពួក ស្រុកពួក ខេត្តសៀមរាប។
លោកអនុសេនីយ៍ឯក ភឹម ភួន បានឲ្យដឹងទៀតថា រថយន្តទាំងពីរចាងលើទី១.ម៉ាក TRAILER ពណ៌ខៀវស ពាក់ស្លាកលេខ កំពង់ចាម ៣A.៨១៣២ សណ្តោងរ៉ឺម៉កពាក់ស្លាកលេខ ភ្នំពេញ ៤A.៨១២៧ បើកបរដោយឈ្មោះ អាំ ធារី ភេទប្រុស អាយុ៣២ឆ្នាំ នៅភូមិព្រៃចម្លាក់ ឃុំកញ្ជូ ស្រុកឆ្លូងខេត្តក្រចេះ ជិះគ្នា២នាក់ រងរបួសទាំង២ ទិសដៅពីកើតទៅលិច។ លុះមកដល់ចំនុចកើតហេតុបានបុកជាមួយសត្វក្របីឆ្លងផ្លូវ ក៏បានរេចង្កូតទៅបុករថយន្តមួយទៀតដែរបើកបរក្នុងទិសដៅបញ្ជ្រាស់គ្នា ម៉ាកហ៊ីយ៉ាន់ដាយ ពណ៌ខៀវ ពាក់ស្លាកលេខ កំពង់ចាម ៣B.០៧៧៣ សណ្តោងរ៉ឺម៉កពាក់ស្លាកលេខ ភ្នំពេញ ៤A.២៩៤៧ បើកបរមិនស្គាល់អត្តសញ្ញាណបានគេចខ្លួនបាត់ បានបុកគ្នាពេញទំហឹង បណ្ដាលឲ្យឆេះរថយន្តទាំង២ និងមនុស្ស២នាក់បានរងរបួសធ្ងន់ ។
លោកអនុសេនីយ៍ឯក បានឲ្យដឹងបន្ថែមថា ក្រោយកើតហេតុជនរងគ្រោះទាំង២នាក់ត្រូវបានបញ្ជូនទៅសង្គ្រោះនៅមន្ទីរពេទ្យបង្អែកស្រុកពួក ចំណែករថយន្តទាំង២គ្រឿង មួយគ្រឿងបានឆេះនៅសល់តែសំបកគ្រោងឆ្អឹង រីឯមួយគ្រឿងទៀតឆេះកាប៊ីនខាងមុខត្រូវបានសមត្ថកិច្ចបាញ់ពន្លត ហើយបានយកទៅរក្សាទុកបណ្ដោះអាសន្ន រង់ចាំការដោះស្រាយនៅពេលក្រោយ៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
