ក្រុមអ្នកជំនាញជួសជុលប្រាសាទបុរាណ នៃអាជ្ញាធរជាតិអប្សា កាលពីពេលថ្មីៗនេះ បានប្រទះឃើញរូបចម្លាក់ដងខ្លួនយក្ស និងព្រះសិរទេសវតាម នៅខ្លោងទ្វារតាកាវ ស្ថិតនៅខាងលិចនៃក្រុងអង្គរធំ ខណៈដែលក្រុមបុរាណវិទ្យាធ្វើកំណាយសិក្សាស្រាវជ្រាវ ដើម្បីធ្វើការជួសជុលខ្លោងទ្វារក្រុងអង្គរធំ។
បើតាមលោកស្រី គឹម សេងភក្តី មន្ត្រីផ្នែកបុរាណវិទ្យា នៃអាជ្ញាធរជាតិអប្សរា បានឱ្យដឹងនៅថ្ងៃទី២២ ខែកក្កដា ឆ្នាំ២០២១នេះថា ការប្រទះឃើញចម្លាក់ដ៍អស្ចារ្យនេះ គឺក្នុងពេលក្រុមអ្នកបុរាណវិទ្យាសិក្សាស្រាវជ្រាវកំពុងធ្វើកំណាយ ដើម្បីធ្វើការជួសជុលខ្លោងទ្វារតាកាវឡើងវិញ ដោយក្នុងពេលបំពេញការងារនោះ ក្រុមការងារបានប្រទះឃើញក្បាលយក្សចំនួន០៣ មានរូបរាងល្អ ឯក្បាល៣ទៀតមានត្រឹមតែពាក់កណ្តាល។ ដោយឡែកដងខ្លួនអាសុរៈបានរកឃើញមានចំនួន០៤ទៀត។ រីឯព្រះសិរទេវតាបានរកឃើញចំនួន៣ ក្នុងនោះចំនួន០២នៅមានរូបរាងល្អ និង០១ទៀតមានត្រឹមពាក់កណ្តាលស្មាដល់បបូរមាត់ ហើយក្បាលយក្យដែលជ្រោះធ្លាក់ក្បែរនេះ ជាបំណែកដងខ្លួនហើយអាចរកឃើញឡើងវិញ។
លោកស្រី គឹម សេងភក្តី បន្ថែមថា ចម្លាក់ដែលបានប្រទះឃើញនេះ ក្រុមការងារបានសហការណ៍ជាមួយនគរបាលបេតិកភ័ណ្ឌ ដើម្បីចុះបញ្ជើទទួលស្គាល់ជាឯកសារ និងបានស្ទួយយកមករក្សាទុកនៅការដ្ឋាន ដើម្បីធ្វើគម្រោងជួសជុលឡើងវិញ និងរំពឹងថា អាចនឹងរកឃើញបំណែកដងខ្លួននៅពេលខាងមុខទៀត។ វត្ថុដែលប្រទះឃើញនេះត្រូវបានដាក់នៅនៅជិតខ្លោងទ្វារព្រះសិរ ដោយមិនបានយកទៅទីតាំងណាទេ គឺទុកនៅការដ្ឋានផ្ទាល់ ព្រោះអ្នកជំនាញត្រូវការស្វែងរកបំណែកទៀត ដែលគម្រោងយើងត្រូវជួសជុលបង្កាន់ដៃយក្យ និងទេវតាឡើងវិញ៕
អត្ថបទ និងរូបភាព៖ លោក ឈិត សាវី
កែសម្រួលអត្ថបទ៖ លោក អ៊ុន ណារាជ្យ
