សាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្តសៀមរាប ហៅកាត់ថា ក.ប.ប បានចាប់ផ្តើមមមាញឹកក្នុងការផ្សព្វផ្សាយ និងអនុវត្ត នូវប្រកាសអន្តរក្រសួងលេខ៖ ៣៣៨ សហវ.ប្រក ចុះថ្ងៃទី០៣ ខែមិថុនា ឆ្នាំ២០២១ ស្តីពីនីតិវិធីពិន័យអន្តរការណ៍ លើអំពើល្មើសនឹងច្បាប់ស្តីពីកិច្ចការពារអ្នកប្រើប្រាស់។ សកម្មភាពផ្សព្វផ្សាយ និងអនុវត្តប្រកាសនេះ គឺធ្វើឡើងតាមទីតាំងគោលដៅមួយចំនួនដូចជា៖ តាមស្ថានីយ ឬដេប៉ូប្រេងឥន្ធនៈ ,កន្លែងចែកចាយគ្រឿងឧបភោគបរិភោគតាមម៉ាត និងផ្សារទំនើប ក្នុងក្រុង/ខេត្តសៀមរាប។
បើតាមលោក ខៀវ បញ្ញាវឌ្ឍន៍ ប្រធានសាខាការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំខេត្ត បានឲ្យដឹងនៅថ្ងៃទី២១ ខែកក្កដានេះថា ប្រកាសអន្តរក្រសួងនេះត្រូវបានអនុម័តឡើងក្នុងគោលបំណងកំណត់នីតិវិធី និងសិទ្ធិពិន័យអន្តរការណ៍ ដើម្បីលើកកម្ពស់ប្រសិទ្ធភាពនៃការអនុវត្តច្បាប់ស្តីពី កិច្ចការពារអ្នកប្រើប្រាស់ និងមានវិសាលភាពលើការពិន័យអន្តរការណ៍លើអំពើល្មើសដែលមានចែងក្នុងមាត្រា៤១ ,មាត្រា៤៤ ,មាត្រា៤៥ ,មាត្រា៤៨ និងមាត្រា៤៩ នៃច្បាប់ស្តីពីកិច្ចការពារអ្នកប្រើប្រាស់។ ក្នុងនោះចំពោះមាត្រា៤១ សម្រាបបុគ្គលដែលល្មើសនឹងមាត្រាអាចនឹងត្រូវពិន័យអន្តរការណ៍រហូតដល់ ២០លានរៀល លើអំពើមិនសុចរិតក្នុងធុរកិច្ច មានជាអាទ៍បទល្មើសពាក់ព័ន្ធនឹងគុណភាព និងប្រភពទំនិញ ការធ្វើអោយអ្នកប្រើប្រាស់មានការភាន់ច្រលំអំពីថ្លៃ និងគុណភាពទំនិញ និងសេវា ការបំភាន់ ឬធ្វើអោយមានការភាន់ច្រឡំទាក់ទងទៅនឹងបរិមាណ រង្វាស់រង្វាល់ ក្រិតខ្នាត ភាពមិនសមតាមបំណង ចរិតលក្ខណៈទំនិញជាដើម។ល។ ចំពោះមាត្រា៤៤ បុគ្គលល្មើសអាចនឹងពិន័យរហូតដល់៥០លានរៀល ចំពោះការអនុវត្តមិនសុចរិតដូចយ៉ាង ការសន្យាផ្តល់អំណោយ រង្វាន់ ឬវត្ថុឥតគិតថ្លៃដ៏ទៃទៀត ក្នុងចេតនាភូតកុហុក ឬបោកប្រាស់អ្នកប្រើប្រាស់។ល។ មាត្រា៤៥ ជនល្មើសអាចនឹងត្រូវពិន័យរហូតដល់៨០លានរៀល សម្រាប់បទល្មើសទាក់ទងទៅនឹងគម្រោងលក់បែបពីរ៉ាមីដ ឬលក់ទំនិញដែលភ្ជាប់សេចក្តីបរិយាយពាណិជ្ជកម្មដោយមិនពិតជាដើម។
លោក ខៀវ បញ្ញាវឌ្ឍន៍ បញ្ជាក់ថា ក្នុងនីតិវិធីពិន័យអន្តរការណ៍នេះ បុគ្គុលល្មើសអាចបង់ប្រាក់ពិន័យអន្តរការណ៍ជូនមន្ត្រីសើបអង្កេតនៃអគ្គនាយកដ្ឋាន ក.ប.ប. ភ្លាមៗ ឬយ៉ាងយូរ៣០ថ្ងៃ ចាប់ពីសមីខ្លួនទទួលបានឯកសារ ហើយក្នុងករណីដែលជនល្មើសមិនបានបង់ប្រាក់ពិន័យអន្តរការណ៍ និងមិនបានដាក់ពាក្យបណ្តឹងតវ៉ាក្នុងរយៈពេលកំណត់ នោះ នឹងត្រូវមានចំណាត់ការតាមនីតិវិធីតុលាការ។ ស្របពេលជាមួយគ្នានេះដែរ ប្រសិនបើបុគ្គលដែលមិនសុខចិត្តនឹងសេចក្តីសម្រេចរបស់មន្រ្តីស៊ើបអង្កេតនៃអគ្គនាយកដ្ឋាន ក.ប.ប. មានសិទ្ធប្តឹងទៅគណៈកម្មាធិការជាតិការពារអ្នកប្រើប្រាស់ យ៉ាងយូរក្នុងរយៈពេល១៥ថ្ងៃ ចាប់ពីទទួលបានសេចក្តីសម្រេច។ ចំពោះបុគ្គលដែលមិនសុខចិត្តនឹងសេចក្តីសម្រេច របស់គណៈកម្មាធិការជាតិការពារអ្នកប្រើប្រាស់ មានសិទ្ធប្តឹងទៅតុលាការមានសមត្ថកិច្ចក្នុងរយៈពេល៣០ថ្ងៃយ៉ាងយូរ ចាប់ពីថ្ងៃទទួលបានសចក្តីសម្រេច៕
អត្ថបទ និង រូបភាព៖ លោក ស៊ាន សុផាត
កែសម្រួល៖ លោក អ៊ុន ណារាជ្យ
