នៅព្រឹកថ្ងៃទី២៦ ខែកក្កដា ឆ្នាំ២០២១ម្សិលមិញនេះ ឯកឧត្តម ទៀ សីហា ប្រធានគណៈកម្មាធិការ សាខាកាកបាទក្រហមកម្ពុជាខេត្តសៀមរាប បានចាត់ក្រុមប្រតិបត្តិសាខានិងអនុសាខា ចុះជួបសួរសុខទុក្ខ និងនាំយកអំណោយមនុស្សធម៌ជូនដល់គ្រួសាររងគ្រោះ ដោយសារកូនងោកធ្លាក់ចូលឆ្នាំងសម្លទឹកនំបញ្ចុក ឈ្មោះ ហ៊ុន មុន្នី អាយុ១ ឆ្នាំ និងម្តាយឈ្មោះ ឡាច វុទ្ធី អាយុ ៣១ឆ្នាំ រស់នៅភូមិវាល សង្កាត់គោចក ក្រុងសៀមរាប ដែលរងរបួសរលាកដៃ ដោយសារលូកយកកូនពីក្នុងឆ្នាំង ដែលបច្ចុប្បន្នជនរងគ្រោះទាំង២នាក់ម្ដាយនិងកូន កំពុងតែសម្រាកព្យាបាលជំងឺនៅមន្ទីពេទ្យព្រះបាទជ័យវរ្ម័នទី៧ ។
មានមតិសំណេះសំណាលក្នុងឱកាសនោះ លោក ស៊ុ សំអន នាយកប្រតិបត្តិសាខា បានពាំនាំនូវការផ្ដាំផ្ញើសួរសុខទុក្ខពីឯកឧត្តម ទៀ សីហា ប្រធានគណៈកម្មាធិការសាខា ដែលតែងតែយកចិត្តទុកដាក់គិតគូរខ្ពស់ចំពោះសុខទុក្ខបងប្អូនប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ។ ថ្វីត្បិតតែអំណោយមនុស្សធម៌ដែលបាននាំយកមកចែកជូនបងប្អូននាពេលនេះមានកម្រិតក្ដី តែក៏អាចជួយសម្រាលទុក្ខលំបាកបានមួយដំណែក ហើយក៏ជាការបង្ហាញនូវការយកចិត្តទុកដាក់ចំពោះប្រជាពលរដ្ឋគ្រប់រូបពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា -មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។ ក្នុងឱកាសនោះផងដែរ លោកនាយកផ្តាំផ្ញើគ្រួសាររងគ្រោះ ត្រូវបន្តគោរពវិធានការរបស់ក្រសួងសុខាភិបាល ដើម្បីការពារជំងឺកូវីដ-១៩ ជាពិសេសវិធានការរបស់រាជរដ្ឋាភិបាលគឺ ៣ការពារ ៣កុំ ។
គួររំលឹកថា អំណោយមនុស្សធម៌ដែលបានផ្ដល់ជូននាពេលនោះមាន៖ មុង២ , ភួយ២ , សារុង២ , ក្រមា២ , កន្ទេល២ , អង្ករ ៦០គីឡូក្រាម , មី២កេស , ត្រីខ២យួរ និងថវិកា ៦០ម៉ឺនរៀល ជាមួយគ្នានោះដែរអនុសាខាក្រុងបានជួយឧបត្ថម្ភទឹកដោះគោឆៅចំនួន ៣យួរ និងថវិកា ចំនួន២០ម៉ឺនរៀល៕
អត្ថបទ និង រូបភាព៖ សាខាកាកបាទក្រហមកម្ពុជាខេត្តសៀមរាប
កែសម្រួល៖ លោក លីវ សាន្ត
