លោក នាក់ ណេរ៉ុន អភិបាលរងខេត្តសៀមរាប បានឲ្យដឹងនៅថ្ងៃទី២៩ ខែកក្កដា ឆ្នាំ២០២១នេះថា ពាក់ព័ន្ធនឹងបញ្ហាដំណោះស្រាយជនអនាថា និងអ្នកសុំទាននៅក្នុងខេត្តសៀមរាបនាពេលបច្ចុប្បន្ននេះ អាជ្ញាធរខេត្តសៀមរាប នឹងប្រមូលពួកគាត់ឲ្យមករស់លើទីតាំងមួយកន្លែងដែលបានត្រៀមទុក នៅក្នុងសហគមន៍ព្រៃឈើចង្ក្រានរយនេះ។ ចំពោះទីតាំងននោះ ខាងអាជ្ញាធរ និងភាគីពាក់ព័ន្ធ នឹងសង់កន្លែងស្នាក់នៅឲ្យពួកគាត់ រៀបចំប្រព័ន្ធទឹក ដែលអាចឲ្យពួកគាត់ដាំដំណាំលក់យកកម្រៃចិញ្ចឹមជីវិតបាន ប៉ុន្តែមិនមែនចែកដីឲ្យពួកគាត់ទេ តែយើងឲ្យគាត់ស្នាក់នៅ ហើយសហការជាមួយសហគមន៍ ឲ្យគាត់ដាំបន្លែ ចិញ្ចឹមសត្វ នៅទីនេះ។
អភិបាលរងខេត្ត រំពឹងថា ពួកគាត់នឹងទទួលបានផលច្រើនពីទីតាំងថ្មីនេះ ព្រោះនៅពេលបញ្ចប់វិបត្តិកូវីដ-១៩ តំបន់សហគមន៍ព្រៃឈើចង្ក្រានរយ នឹងមានអ្នកទេសចរមកកម្សាន្តច្រើន ហើយពេលនេះអាជ្ញាធរក៏កំពុងរៀបចំជាប្រព័ន្ធផ្លូវសម្រាប់សម្រួលចរាចរណ៍ដល់អ្នកមកកម្សាន្តផងដែរ។ ដូច្នេះពួកគាត់អាចទាញប្រយោជន៍ពីអ្នកទេសចរទាំងនោះបាន។
សូមជម្រាបថា សហគមន៍ព្រៃឈើ និងអេកូទេសចរណ៍ចង្ក្រាន្តរយ ស្ថិតនៅក្នុងភូមិបាយដុត ឃុំស្វាយស ស្រុកវ៉ារិន ខេត្តសៀមរាប។ តំបន់នេះមានផ្ទៃដីទំហំ៩១០៤ហិកតា បានបង្កើតឡើងកាលពីឆ្នាំ២០១០ និងបានចុះបញ្ជីនៅក្រសួងកសិកម្ម រុក្ខាប្រម៉ាញ់ និងនេសាទ នៅឆ្នាំ២០១៧ ក្រោមការជួយជ្រោមជ្រែងពីរដ្ឋបាលខ្រុកវ៉ារិន និងខណ្ឌរដ្ឋបាលព្រៃឈើសៀមរាប ។ សហគមន៍ព្រៃឈើនេះ ជាតំបន់ដែលមានសក្ដានុពលជាខ្លាំងលើវិស័យទេសចរណ៍ ព្រោះមានព្រៃឈើធម្មជាតិតូចធំជាច្រើន និងមានកន្លែងសម្រាប់ទស្សនាជាច្រើនដូចជា៖ ទឹកធ្លាក់ចង្ក្រានរយ ,ភ្នំចង្ក្រានរយ ,ពើងច័ន្ទក្រហម ,ពើងម្នាស់ ,រូងប្រចៀវ រួមទាំងកន្លែងមើលសត្វព្រៃ ដែលមានសត្វព្រៃជាច្រើនប្រភេទកំពុងរស់នៅ ដូចជាប្រភេទសត្វស្លាប ,សត្វចតុបាត និងប្រភេទសត្វល្មូនជាដើម៕
អត្ថបទ៖លោក ជា ស្រស់
កែសម្រួល៖ លោក អ៊ុន ណារាជ្យ
