ដោយមើលឃើញថា មានប្រជាពលរដ្ឋភាគច្រើនត្រូវស្ថិតជាប់ក្នុងតំបន់បិទខ្ទប់ និងជាប់ធ្វើចត្តាឡីស័ក នៅតាមផ្ទះ ដោយសារការពារជំងឺកូវីដ-១៩ ហើយមិនបានចេញក្រៅប្រកបរបរ និងមិនបានយកចង្ហាន់ទៅប្រគេនព្រះសង្ឃ ដែលគង់ក្នុងវត្តអារាមដូចធម្មតា ម្យ៉ាងទៀតពុទ្ធបរិស័ទកំពុង ប្រឈមនឹងការលំបាកផ្នែកសេដ្ឋកិច្ច ហើយជំងឺកូវីដ-១៩ នៅតែបន្តឆ្លងរាលដាលឥតស្រាកស្រាន្តនោះ ធ្វើឲ្យវត្តអារាមទាំងឡាយខ្វះខាតចង្ហាន់, ភេសជ្ជ: និងបច្ច័យបួន សម្រាប់ផ្គត់ផ្គង់ទីអារាម។
នៅថ្ងៃទី០៨ ខែសីហា ឆ្នាំ២០២១នេះ ឯកឧត្តមឧត្តមសេនីយ ទេព សំអាន អគ្គនាយករង នៃអគ្គនាយកដ្ឋានភស្តុភា ក្រសួងការពារជាតិប្រចាំទិសយោធភូមិភាគទី៤ និងជាអនុប្រធានក្រុមការងាររាជរដ្ឋាភិបាលចុះមូលដ្ឋានស្រុកប្រាសាទបាគង ខេត្តសៀមរាប និងឯកឧត្តមអ្នកឧកញ៉ា ទូច សៀ ព្រមទាំងសហការី បាននាំយកអំណោយជាគ្រឿងឧបភោគបរិភោគ សម្ភារ: និងបច័្ចយផ្ទាល់ខ្លួនរួមមាន÷ អង្ករចំនួន ១០បេ ស្មើ ២៥០គ.ក្រ, មីយើងចំនួន ៥កេស, ត្រីខកំប៉ុងខ.មចំនួន ២កេសធំ, ទឹកក្រូចចំនួន ៥កេស, ទឹកសុទ្ធវីតាល់ចំនួន ៥កេស, ម៉ាសចំនួន ១០ប្រអប់ និងបច្ច័យចំនួន ៩៥ម៉ឹនរៀល ទៅប្រគេនដល់ព្រះសង្ឃ ដែលគង់វត្តប្រាសាទគោកចក ដែលស្ថិតនៅក្នុងសង្កាត់គោកចក ក្រុងសៀមរាប ខេត្តសៀមរាប ដែលកំពុងជួបការខ្វះខាតក្នុងបរិបទជំងឺកូវីដ-១៩ ។
ក្នុងឱកាសនោះ ឯកឧត្តមឧត្តមសេនីយ ទេព សំអាន បានមានប្រសាសន៍ថា នៅក្នុងបរិបទ នៃការរីករាលដាលជំងឺកូវីដ-១៩នេះ ប្រជាពុទ្ធបរិស័ទជាច្រើនជួបការខ្វះខាតជីវភាព និងមានការព្រួយបារម្ភយ៉ាងខ្លាំងចំពោះជំងឺដ៏កាចសាហាវនេះ ធ្វើឲ្យពួកគាត់បាត់បង់ឱកាសយកចង្ហាន់ មកប្រគេនព្រះសង្ឃនៅតាមទីវត្តអារាម។ ដូចនេះ ធ្វើឲ្យវត្តអារាម ព្រះសង្ឃ និងពុទ្ធបរិស័ទក្នុងវត្តជាច្រើនខ្វះខាតចង្ហាន់ ដែលតម្រូវឲ្យទូលបង្គំជាខ្ញុំនាំយកគ្រឿងឧបភោគបរិភោគ សម្ភារ: និងបច្ច័យមកប្រគេននាពេលនេះ ដើម្បីជួយសម្រួលដល់ការខ្វះខាតរបស់ព្រះសង្ឃ ជាពិសេសក្នុងរដូវកាលព្រះសង្ឃគង់ចាំព្រះវស្សាផងដែរ។
ឯកឧត្តមឧត្តមសេនីយ បានបន្តថា ទេយ្យទានទាំងអស់នេះ គឺជាការជួយសម្រាលបន្ទុកលំបាកដល់រាជរដ្ឋាភិបាល និងអាជ្ញាធរខេត្ត ដែលកំពុងជាប់ដៃក្នុងការទប់ស្កាត់ជំងឺកូវីដ-១៩នាពេលបច្ចុប្បន្ននេះ។ ម្យ៉ាងទៀត ដោយមើលឃើញវិស័យព្រះពុទ្ធសាសនា និងអាណាចក្រ មានតួនាទីសំខាន់សម្រាប់ប្រទេសកម្ពុជា ក្នុងការអភិវឌ្ឍប្រកបដោយជោគជ័យ និងមានិរន្តរភាពតាមយុទ្ធសាស្ត្រចក្ខុវិស័យ និងគោលនយោបាយឈ្នះៗ របស់សម្តេចតេជោ។ ដូច្នេះ ក្រោមម្លប់សន្ដិភាពតាមរយ:នយោបាយឈ្នះៗ ការដឹកនាំប្រកបដោយគតិបណ្ឌិតរបស់សម្ដេចតេជោនាយករដ្ឋមន្ត្រី ប្រទេសកម្ពុជាមានការអភិវឌ្ឍលើគ្រប់វិស័យទាំងផ្លូវពុទ្ធចក្រ និងអាណាចក្រ។
ព្រះគ្រូវិចិត្រវង្សា ហែម គឹមសាន ព្រះចៅអធិការវត្តប្រាសាទគោកចក មានព្រះសង្ឃដីកាថា ស្ថិតក្នុងដំណាក់កាលដែលព្រះសង្ឃមិនអាចនិមន្តបិណ្ឌបាតទៅក្រៅវត្តបាន ហើយពុទ្ធបរិស័ទក៏មិនសូវហ៊ានចូលមកវត្ត ដោយសារប្រយ័ត្នប្រយែង និងការពារខ្លួនកុំឱ្យឆ្លងជំងឺកូវីដ-១៩ បច្ចុប្បន្នពុទ្ធបរិស័ទមិនសូវមកវត្តធ្វើបុណ្យប្រគេនចង្ហាន់ ឬទេយ្យទានច្រើនដូចមុនៗទេភាគច្រើនមកតែពេលថ្ងៃសីលបន្តិចបន្តួចតែប៉ុណ្ណោះ ហើយជីវភាពប្រចាំថ្ងៃរបស់ព្រះសង្ឃទាំងអស់ក៏ត្រូវសម្រួលបន្សាំទៅ តាមសភាពការណ៍ផងដែរ។ ក្នុងក៏សូមញាតិញោមពុទ្ធបរិស័ទគ្រប់មជ្ឈដ្ឋានមេត្តាចូលរួមទប់ស្កាត់ និងអនុវត្តតាមវិធានការរបស់រាជរដ្ឋាភិបាលកម្ពុជា ដែលមានសម្តេចតេជោ ហ៊ុន សែន នាយករដ្ឋមន្ត្រី និងត្រូវតែបន្តបង្កើនការប្រុងប្រយ័ត្នខ្ពស់ ដោយចូលរួមអនុវត្តតាមវិធានការ ៣ការពារ និង ៣កុំ ឱ្យបានខ្ជាប់ខ្ជួន៕
អត្ថបទ និងរូបភាព៖ លោក ទ្រា ពន្លឺ
កែសម្រួល៖ លោក លីវ សុខុន
