យោងតាមការបង្ហោះនៅលើបណ្ដាញសង្គមហ្វេសបុកផ្លូវការ របស់ឯកឧត្តម ទៀ សីហា អភិបាលខេត្តសៀមរាប នៅថ្ងៃទី០៨ ខែសីហា ឆ្នាំ២០២១ ឯកឧត្តមបានបញ្ជាក់ថា ជំងឺកូវីដ-១៩ ប្រភេទ ឌែលតា (Delta) ក្នុងខេត្តសៀមរាបបច្ចុប្បន្នកាន់តែកើនឡើងពីមួយថ្ងៃទៅមួយថ្ងៃ។ ដូច្នេះ វិធានការនៃការទប់ស្កាត់នៅពេលនេះ គឺមានតែស្នើសុំការសហការពីសំណាក់បងប្អូនប្រជាពលរដ្ឋទាំងអស់ក្នុងខេត្តសៀមរាប បើមិនចាំបាច់សូមកុំចេញពីផ្ទះ បើចេញ គឺក្នុងករណីចាំបាច់បំផុត ដូចជា៖ ទៅពេទ្យ ទៅធ្វើការ ទៅលក់ដូរជាដើម តែត្រូវអនុវត្តដាច់ខាតនូវការពាក់ម៉ាស់ រក្សាគម្លាត លាងដៃឲ្យបានជាប់លាប់រាល់ពេលប៉ះជាមួយសម្ភារផ្សេងទាំងអស់គ្នា ដើម្បីជៀសឆ្ងាយពីជំងឺកូវីដ-១៩ ប្រភេទ ឌែលតា ដ៏កាចសាហាវនេះ។
ជាមួយគ្នានោះដែរឯកឧត្តម អភិបាលខេត្ត បានបញ្ជាក់ទៀតថា ខ្ញុំសូមទទូចសុំឲ្យបងប្អូនប្រជាពលរដ្ឋទាំងអស់គ្នា ត្រូវបន្តបង្កើនការប្រុងប្រយ័ត្ន យកចិត្តទុកដាក់ឲ្យបានខ្ពស់បន្ថែមទៀត ដោយចូលរួមអនុវត្តតាមវិធានការណែនាំរបស់ក្រសួងសុខាភិបាលឱ្យបានគ្រប់ៗគ្នា នូវវិធានការ ៣ការពារ ៣កុំ ដោយ៣ការពារគឺ ត្រូវពាក់ម៉ាស់, ត្រូវលាងដៃ, ត្រូវគម្លាតបុគ្គល និង៣កុំគឺ កុំនៅបន្ទប់បិទជិត, កុំនៅកន្លែងកុះករ, កុំនៅប៉ះពាល់គ្នា ដើម្បីរួមគ្នាក្នុងការចូលរួមទប់ស្កាត់ និងការពារជំងីកូវីដ-១៩ ទាំងអស់គ្នា។
សូមជម្រាបថា ក្នុងខេត្តសៀមរាប គិតត្រឹមថ្ងៃទី០៨ ខែសីហា ឆ្នាំ២០២១ មានករណីវិជ្ជមានកូវីដ-១៩ បម្លែងខ្លួនថ្មី ប្រភេទ ឌែលតា ចំនួន ៧១ករណី ក្នុងនោះករណីនាំចូលមកពីក្រៅប្រទេសមានចំនួន ២៨ករណី ,ឆ្លងក្នុងសហគមន៍ចំនួន ៤៣ករណី និងព្យាបាលជាសះស្បើយចំនួន ៧នាក់ ហើយចំពោះភូមិសាស្រ្តដែរមានក៏ឆ្លងរាលដាលខ្លាំងជាងគេ គឺស្ថិតក្នុងឃុំកំពង់ឃ្លាំង ស្រុកសុទ្រនិគម ខេត្តសៀមរាប៕
