បើតាមលោក ជូ រ៉ាឌីណា អនុប្រធាននាយកដ្ឋានគ្រប់គ្រងព្រៃឈើ ទេសភាពវប្បធម៌ និងបរិស្ថាន នៃអាជ្ញាធរជាតិអប្សរា បានឲ្យដឹងថា គិតត្រឹមរយៈពេល៦ថ្ងៃ គិតចាប់ពីថ្ងៃទី០២ ដល់ថ្ងៃទី០៧ ខែសីហា ឆ្នាំ២០២១ អាជ្ញាធរជាតិអប្សរា បានបន្តចែកកូនឈើចម្រុះបានសរុបចំនួន ២,៦១០ដើម ជូនដល់សាធារណជនទូទៅនៅក្នុងខេត្តសៀមរាប ក៏ដូចជាបណ្ដារខេត្តផ្សេងទៀត ដើម្បីធ្វើការដាំដុះតាមតម្រូវការ។
លោក ជូ រ៉ាឌីណា បានឲ្យដឹងទៀតថា កូនឈើចម្រុះទាំង២,៦១០ដើមនេះដែរ ត្រូវបានក្រុមការងារចែកជូនដល់៖ ព្រះវិជ័យរង្សី ឡាច លាង ព្រះគ្រូប្រាសាទរង្សី អនុគណក្រុងសៀមរាប ចំនួន៥៥០ដើម ដើម្បីយកទៅដាំក្នុងបរិវេណវត្តមុនឆាយលាងវនារាម ក្នុងស្រុកវារិន ខេត្តសៀមរាប ,ផ្តល់ជូនរដ្ឋបាលឃុំដូនកែវ ក្នុងស្រុកពួក ចំនួន៤០ដើម ដើម្បីយកទៅដាំលំអក្នុងបរិវេណសាលាឃុំ ,ផ្តល់ជូនលោក យឹម គឹមសាន ចំនួន២០០ដើម ដើម្បីយកទៅដាំលំអនៅភូមិធម្មជាតិរុនតាឯក សិ្ថតក្នុងស្រុកបន្ទាយស្រី ខេត្តសៀមរាប។ ផ្តល់ជូនវិទ្យាល័យ ប៊ុនរ៉ានី ហ៊ុនសែន ស្ពឺ ចំនួន២៥០ដើម ដើម្បីយកទៅដាំលម្អក្នុងបរិវេណវិទ្យាល័យនេះ ស្ថិតនៅស្រុកចំការលើ ខេត្តកំពង់ចាម ,ផ្តល់ជូនអ្នកស្រី ឯក នីដា ចំនួន៣០ដើម ដើម្បីយកទៅដាំលំអក្នុងបរិវេណលំនៅដ្ឋានផ្ទាល់ខ្លួន ស្ថិតក្នុងភូមិទ្រាំង សង្កាត់ស្លក្រាម ក្រុងសៀមរាប ,ផ្តល់ជូនសាលាបឋមសិក្សាសំបួរ ចំនួន៦០០ដើម ដើម្បីយកទៅដាំលំអក្នុងបរិវេណសាលារៀន ស្ថិតនៅឃុំសំបួរ ស្រុកក្រឡាញ់ ,ផ្តល់ជូនតំណាងនាយកដ្ឋានសណ្តាប់ធ្នាប់នៃអាជ្ញាធរជាតិអប្សរា ចំនួន៤១០ដើម ដើម្បីយកទៅដាំនៅបរិវេណខាងលិចអាងស្ទាក់ខ្សាច់ (ច្រកសំពៅលូន )ផ្នែកខាងជើងកសិណប្រាសាទអង្គរវត្ត ,ផ្តល់ជូនអ្នកស្រី ព្រំ សុភារ៉ា បំរើការងារនៅខេត្តសៀមរាប ចំនួន១៣០ដើម ដើម្បីយកទៅដាំនៅលើដីទំនេរផ្ទាល់ខ្លួន ស្ថិតនៅភូមិបឹង សង្កាត់ក្របីរៀល ក្រុងសៀមរាប ,ផ្តល់កូនឈើជូនលោក ញាន ឬទ្ធី បំរើការងារនៅខេត្តសៀមរាប ចំនួន២២០ដើម ដើម្បីយកទៅដាំនៅលើដីទំនេរផ្ទាល់ខ្លួន ស្ថិតនៅភូមិអន្លង់ស ឃុំរំលេច ស្រុកស៊ីធរកណ្តាល ខេត្តព្រៃវែង ,ផ្តល់កូនប្រជាពលរដ្ឋរស់នៅខេត្តសៀមរាប ចំនួន៣០ដើម ដើម្បីយកទៅដាំនៅលើដីទំនេរផ្ទាល់ខ្លួន ស្ថិតនៅភូមិស្វាយព្រៃ សង្កាត់ស្វាយដង្គំ និងផ្តល់ជូនអ្នកស្រី សរ ធារី ប្រជាពលរដ្ឋរស់នៅខេត្តសៀមរាប ចំនួន១៥០ដើម ដើម្បីយកទៅដាំនៅដីទំនេរផ្ទាល់ខ្លួន ស្ថិតនៅភូមិព្រៃខ្នុរ ឃុំស្រែណូយ ស្រុកវ៉ារិន ខេត្តសៀមរាប។
សូមជុនជម្រាបថា គិតចាប់ពីខែមករា ដល់ខែកក្កដា ឆ្នាំ២០២១ កន្លងមកនេះ អាជ្ញាធរជាតិអប្សរា បានដាំកូនឈើចម្រុះក្នុងតំបន់អង្គរ បានចំនួន ១១,២០៣ដើម ហើយបានចែកចាយកូនឈើចម្រុះទាំងអស់នោះដោយឥតគិតថ្លៃជូនសាធារណជនទូទៅបានចំនួន ៤៨,៧០២ដើមផងដែរ៕
អត្ថបទ និង រូបភាព៖ លោក ជា ស្រស់
កែសម្រួល៖ លោក អ៊ុន ណារាជ្យ
