កាលពីរសៀលថ្ងៃទី០៨ ខែសីហា ឆ្នាំ២០២១ ឯកឧត្តម ពៅ ស៊ា តំណាងឯកឧត្ដម មាស សាវ៉ន ប្រធានក្រុមការងារថ្នាក់កណ្ដាលចុះជួយស្រុកវ៉ារិន ខេត្តសៀមរាប ព្រមទាំងក្រុមការងារ បាននាំយកនូវទានព្រះវស្សា គ្រឿងឧបភោគបរិភោគ និងបច្ច័យប្រគេនព្រះសង្ឃគង់នៅវត្តចំនួន០៧វត្ត ក្នុងស្រុកវ៉ារិន ដោយក្នុង១វត្តមាន៖ ទានព្រះវស្សា ចំនួន ១គូ ,អង្ករ ៥០គីឡូក្រាម ,មីកេះធំ ១កេះធំ ,ទឹកស៊ីអ៊ីវ ០១យួរ ,ទឹកត្រី ០១យួរ និងបច្ច័យចំនួន៥០០,០០០រៀល ផងដែរ។
ក្នុងឱកាសនោះដែរឯកឧត្តម ពៅ ស៊ា បានមានប្រសាសន៍ថា ប្រទេសកម្ពុជាក្រោមការដឹកនាំប្រកបដោយគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើឲ្យប្រទេសជាតិទាំងមូលមានសន្តិសុខពេញបរិបូរណ៍ ជាពិសេសមានការរីកចម្រើនលើគ្រប់វិស័យ ទាំងវិស័យពុទ្ធចក្រ និង អាណាចក្រ ដូចដែលយើងទាំងអស់គ្នាបានមើលឃើញជាក់ស្ដែងនឹងភ្នែកស្រាប់ ដូច្នេះក្នុងឱកាសនេះ សូមអំពាវនាវដល់បងប្អូនប្រជាពលរដ្ឋទាំងអស់ សូមបន្តចូលរួមជាមួយរាជរដ្ឋាភិបាលកម្ពុជា ដែលមានសម្ដេចតេជោ ហ៊ុន សែន ជាប្រមុខនាំ ដើម្បីឲ្យប្រទេសកម្ពុជាយើង កាន់តែការរីកចម្រើនថ្មីៗបន្ថែមទៀត ។
ឯកឧត្តមមានប្រសាសន៍ទៀតថា នៅក្នុងបរិបទជំងឺកូវីដ-១៩ នេះដែរ ក៏សូមឲ្យព្រះសង្សគ្រប់អង្គ និងបងប្អូនប្រជាពលរដ្ឋទាំងអស់ មេត្តាយកចិត្តទុកដាក់ឲ្យបានខ្ពស់បន្ថែមទៀត ក្នុងការធ្វើអនាម័យជាប្រចាំ ដើម្បីការពារខ្លួនយើង ក្រុមគ្រួសារយើង ក៏ដូចជាសង្គមជាតិទាំងមូល។ ជាពិសេសត្រូវអនុវត្តជាប្រចាំនូវិធានការរបស់រាជរដ្ឋាភិបាល គឺ៣កុំ និង ៣ការពារ និងអនុវត្តសេចក្តីណែនាំរបស់ក្រសួងសុខាភិបាលឲ្យបានគ្រប់ៗគ្នា ដើម្បីរួមគ្នាការពារទប់ស្កាត់កុំឱ្យមេរោគដ៍សាហាវនេះ រីករាលដាលបន្តឆ្លងចូលសហគមន៍ និងប្រទេសកម្ពុជាយើង៕
អត្ថបទ និង រូបភាព៖ លោក ខេង ឧត្តម
កែសម្រួល៖ លោក អ៊ុន ណារាជ្យ
