ស្របពេលដែលពលករចំណាកស្រុកមកពីប្រទេសថៃ ដែលកំពុងធ្វើចត្ដាឡីស័ក និងកំពុងព្យាបាលជំងឺកូវីដ-១៩ នៅស្រុកស្រីស្នំ ខេត្ដសៀមរាប បានមកជាបន្តបន្ទាប់ នៅថ្ងៃទី១៩ ខែសីហា ឆ្នាំ២០២១នេះ ក្រុមការងាររាជរដ្ឋាភិបាលកម្ពុជា ចុះជួយស្រុកស្រីស្នំ ខេត្ដសៀមរាប បាននាំយកអំណោយ និងថវិកា របស់ក្រុមការងារផ្ដល់ជូនរដ្ឋបាលស្រុកស្រីស្នំ ដើម្បីដោះស្រាយភាពខ្វះខាត របស់ប្រជាពលករមកពីក្រៅប្រទេស និងប្រជាពលរដ្ឋ ដែលកំពុងធ្វើចត្ដាឡីស័ក និងព្យាបាលជំងឺ ក្នុងជីវភាពប្រចាំថ្ងៃរបស់ពួកគាត់។
ឯកឧត្ដម ស៊ាន បូរ៉ាត់ រដ្ឋលេខាធិការក្រសួងអប់រំ យុវជន និងកីឡា, អនុប្រធានអង្គភាពប្រឆាំងអំពើពុករលួយ និងជាប្រធានក្រុមការងាររាជរដ្ឋាភិបាលចុះជួយស្រុកស្រីស្នំ ខេត្ដសៀមរាប មានប្រសាសន៍ថា អំណោយទាំងនោះមានអង្ករ ១០តោន, ទឹកសុទ្ធធម្មតា ២៥០យួរ,ទឹកសិទ្ធគូលែន ៥០កេស និងថវិកាជាង ៦លានរៀល ដែលអំណោយទាំងនេះ បានមកពីការចូលរួមរបស់ក្រុមការងាររាជរដ្ឋាភិបាល ដើម្បីជួយសម្រាលការលំបាកដល់រដ្ឋបាលស្រុក សម្រាប់ផ្គត់ផ្គង់ជីវភាពប្រជាពលរដ្ឋ និងពលករ ដែលពួកគាត់បាននឹងកំពុងធ្វើចត្ដាឡីស័ក និងកំពុងព្យាបាលជំងឺកូវីដ-១៩ ក្រោពេលត្រឡប់មកពីប្រទេសថៃ ។ ឯកឧត្ដមបានបន្ដថា ការផ្ដល់អំណាយទាំងនេះ ជាការឆ្លើយតបតាមប្រសាសន៍ណែនាំដ៏ខ្ពង់ខ្ពស់របស់ប្រមុខរាជរដ្ឋាភិបាលកម្ពុជា កាលពីពេលថ្មីៗកន្លងមក ដែលសម្ដេចតេជោ ហ៊ុន សែន នាយករដ្ឋមន្ដ្រី អំពាវនាវដល់ក្រុមការងាររាជរដ្ឋាភិបាលទាំងអស់ ដែលបានចុះជួយមូលដ្ឋាន នៅខេត្ត ស្រុកណា ត្រូវយកចិត្ដទុកដាក់គាំទ្រទំនុកបំរ៉ុង ទាំងស្មារតី សម្ភារ: និងថវិកា និងមើលថែប្រជាពលរដ្ឋ ព្រមទាំងស្វែងរក និងគៀងគរកសប្បុរសជន ដើម្បីជួយដល់ពួកគាត់ដែលកំពុងជួបការខ្វះខាត នៅក្នុងអំឡុងពេលជំងឺកូវីដ-១៩នេះ។ ជាមួយគ្នានោះ ក្រុមការងាររាជរដ្ឋាភិបាលចុះជួយស្រុកស្រីស្នំនេះ តែងចុះមើលប្រជាពលរដ្ឋ និងមានការរៀបចំទីតាំងមណ្ឌលចត្ដាឡីស័ក ជូនប្រជាពលរដ្ឋ ជាប់ជាប្រចាំផងដែរ។ឯកឧត្ដម បានបន្ដថា អំណោយទាំងនេះ បង្ហាញថា រាជរដ្ឋាភិបាលបានយកចិត្ដទុកដាក់ដល់ប្រជាពលរដ្ឋ ដែលពួកគាត់ទើបត្រឡប់មកពីប្រទេសថៃវិញ ហើយថាក្រុមការងារមិនទុកអោយប្រជាពលរដ្ឋខ្វះស្បៀងអាហារហូបចុកនោះទេ ។
(…សម្លេងឯកឧត្ដម ស៊ាន បូរ៉ាត់ ០១…)។
របាយការណ៍របស់រដ្ឋបាលស្រុកស្រីស្នំ ខេត្ដសៀមរាប បានបង្ហាញថា គិតត្រឹមថ្ងៃទី១៨ ខែសីហា ឆ្នាំ២០២១នេះ មានប្រជាពលរដ្ឋមកពីក្រៅប្រទេស បានធ្វើចត្ដាឡីស័ក ចំនួនប្រមាណជាង ៣,៦០០នាក់ ក្នុងនោះអ្នកធ្វើចត្ដាឡីស័កមានចំនួន២,៥៧៣នាក់ និងអ្នកធ្វើចត្ដាឡីស័កនៅតាមផ្ទះដោយខ្លួនឯងមានចំនួន ៧០នាក់ ប៉ុន្តែមួយចំនួនធំ បានបញ្ចប់ការធ្វើចត្ដាឡីស័ករួចហើយ។ ខណ:ដែលអ្នកកំពុងឆ្លងជំងឺកូវីដ-១៩ចំនួនសរុប ២២នាក់ អ្នកជាសះស្បើយចំនួន១១នាក់ និងស្លាប់ម្នាក់៕
អត្ថបទនិងរូបភាព: លោកបូសាវី
កែសម្រួលដោយលីវ សុខុន
