នៅព្រឹកថ្ងៃទី១៩ ខែសីហា ឆ្នាំ២០២១ ឯកឧត្តម ខៀវ កាញារីទ្ធ រដ្ឋមន្រ្តីក្រសួងព័ត៌មាន និងជាប្រធានក្រុមការងារថ្នាក់កណ្តាល ចុះមូលដ្ឋានស្រុកកោះសូទិន រួមដំណើរដោយ ឯកឧត្តម ជា រដ្ឋលេខាធិការ អនុរដ្ឋលេខាធិការប្រតិភូរាជរដ្ឋាភិបាល រួមជាមួយថ្នាក់ដឹកនាំក្រសួងព័ត៌មាន បាននាំយកនូវស្បៀងអាហារ រួមមាន អង្ករ មី ត្រី ខ ទឹកស៊ីអ៊ីវ ទឹកត្រី និងម៉ាស មកប្រគល់ជូនដល់អាជ្ញាធរស្រុកកោះសូទិន ដើម្បីចែងចែកជូនដល់បងប្អូនប្រជាពលរដ្ឋ ដែលកំពុងធ្វើចត្តាឡីស័កនៅតាមខ្នងផ្ទះ ក្នុងភូមិឃុំនានា នៃស្រុកកោះសូទិន ខេត្តកំពង់ចាម ។
តាមរបាយការណ៏របស់ លោក យី វណ្ណះ អភិបាលនៃគណ:អភិបាល ស្រុកកោះសូទិន ខេត្តកំពង់ចាម បានអោយដឹងថា ចាប់តាំងពីមានការឆ្លងរីករាលនៃជំងឺកូវីដ-១៩ នេះមក នៅក្នុងស្រុកកោះសូទិន មានអ្នកឆ្លងសរុបចំនួន ១១៦នាក់ ក្នុងនោះ ៥នាក់ស្លាប់ ហើយបានព្យាបាលជាសះស្បើយចំនួន ៧៥នាក់។ ចំពោះអ្នកដែលធ្វើចត្តាឡីស័ក នៅតាមផ្ទះមានចំនួន ២៨៨គ្រួសារ ដោយបានទទួលអំណោយពីឯកឧត្តម រដ្ឋមន្រ្តី ខៀវ កាញារីទ្ធ និងលោកជំទាវ ជាបន្តបន្ទាប់រួចមកហើយ និងបន្តផ្តល់ជូនបន្ថែមទៀត ដែលក្នុងឱកាសនេះ មានជាអង្ករ ១,១៦០គីឡូក្រាម, មីម៉ាម៉ា ៦០កេស, ត្រីខ ៥៨យួរ, ទឹកត្រី ៥៨យួរ, ទឹកស៊ីអ៊ីវ ៥៨យួរ និងម៉ាស ១ម៉ឺនម៉ាស ប្រគល់ជូនដល់អាជ្ញាធរ ស្រុកកោះសូទិន ទុកសម្រាប់ចែកជូនដល់បងប្អូនប្រជាពលរដ្ឋកំពុងធ្វើចត្តាឡីស័ក។ តាមតួលេខរបស់ស្រុកកោះសូទិន បានបង្ហាញចំនួនអ្នកកើតជំងឺកូវីដ-១៩ មាននៅក្នុងឃុំព្រែកតានង់ ១៩នាក់, ឃុំកំពង់រាប ៤នាក់, ឃុំកោះសូទិន ២៦នាក់, ឃុំពាមប្រធ្នោះ ២១នាក់, ឃុំល្វេ ៦នាក់, ឃុំមហាខ្ញូង ៧នាក់, ឃុំមហាលាភ ចំនួន ៣១អង្គ/នាក់ និងឃុំពង្រ ២នាក់។
នៅក្នុងឱកាសនោះ ឯកឧត្តម រដ្ឋមន្រ្តី ខៀវ កាញារីទ្ធ បានធ្វើការរំលឹកដល់ អាជ្ញាធរដែនដីគ្រប់លំដាប់ថ្នាក់ ត្រូវបង្កើនកិច្ចការងារ និងវិធានការបង្ការទប់ស្កាត់ការឆ្លងរីករាលដាលនៃជឺងឺកូវីដ -១៩ ក្នុងមូលដ្ឋានភូមិឃុំ នៃស្រុកកោះសូទិន អោយបានកាន់តែសកម្មបន្ថែមទៀត ហើយក្នុងនោះថ្នាក់ដឹកនាំ និងមន្រ្តីគ្រប់ជាន់ថ្នាក់ក៏ត្រូវថែរក្សា និងការពារខ្លួនឯងជាចាំបាច់ផងដែរ ព្រោះវីរុសបំលែងថ្មី ប្រភេទ Delta កំពុងរីករាលដាលនៅកម្ពុជា។ ឯកឧត្តមរដ្ឋមន្រ្តី ក៏បានណែនាំដល់បងប្អូនប្រជាពលរដ្ឋដែលកំពុងធ្វើចត្តាឡីស័ក ត្រូវអនុវត្តឲ្យបាននូវវិធានការសុខាភិបាល និងត្រូវរាយការណ៍ជូនមន្ត្រីសុខាភិបាល បន្ទាន់ក្នុងករណីមានបញ្ហាសុខភាពដូចជា ក្អកមានស្លេស ក្តៅខ្លួនលើសពី ៣៧ អង្សារ ពិបាកដក ដង្ហើម ឈឺកតិចតួច និងអាការ:មិនស្រួលក្នុងខ្លួន។
ឯកឧត្តម ក៏បានអំពាវនាវដល់ បងប្អូនប្រជាពលរដ្ឋត្រូវអនុវត្តឱ្យបានខ្ជាប់ខ្លួននូវវិធានការ«៣កុំ ៣ការពារ» និងត្រូវកែប្រែទម្លាប់នៃការរស់នៅ សម្របតាមបរិបទនៃជំងឺកូវីដ-១៩ ដោយត្រូវអនុវត្តយ៉ាងម៉ឺងម៉ាត់នូវវិធាន ការអនាម័យតាមការណែនាំរបស់ក្រសួងសុខាភិបាល ប្រកបដោយស្មារតីទទួលខុសត្រូវខ្ពស់ ដើម្បីការពារក្រុមគ្រួសារ និងសហគមន៍ជៀសផុតពីការឆ្លងរីករាលដាលនៃជំងឺកូវីដ-១៩ ។
ក្រៅពីនាំយកនូវស្បៀងអាហារធ្វើការចែកជូនប្រជាពលរដ្ឋ ដែលកំពុងធ្វើចត្តាឡីស័កនៅតាមផ្ទះក្នុងឃុំព្រែកតានង់ នេះដែរ ឯកឧត្តមរដ្ឋមន្រ្តី ខៀវ កាញារីទ្ធ ក៏បានជូននូវថវិកាដល់ក្រុមការងារស្រុកកោះសូទិន ដើម្បីបន្តសកម្មភាពការងារ បង្ការ និងទប់ស្កាត់ជំងឺកូវីដ ពិសេសប្រភេទ Delta កុំអោយមានការកើនឡើងកាន់តែច្រើនបន្ថែមទៀត។ ជាការចូលរួមក្នុងសកម្មភាពការងារមនុស្សធម៏ នាឱកាសនេះដែរ លោក ទី អៀង និងលោកស្រី តាំង ហ្គេចយាន ជាអាជីវករលក់ដូរនៅរាជធានីភ្នំពេញ ដែលបានអញ្ជើញចូលរួមក្នុងការចែកអំណោយនេះដែរ បានជួយជាថវិកាចំនួន ៤លានរៀល ជូនដល់ឯកឧត្តម រដ្ឋមន្រ្តី ខៀវ កាញារីទ្ធ ។
គួររំលឹកដែរថា កាលពីព្រឹកថ្ងៃទី១១ ខែ សីហា ឆ្នាំ២០២១ កន្លងមកនេះ លោក ទី អៀង និង លោកស្រី តាំង ហ្គេចយាន បាននាំអំណោយជូនដល់ ឯកឧត្តម រដ្ឋមន្រ្តី ខៀវ កាញារីទ្ធ រួមមានម៉ាសចំនួន ៣ម៉ឺនម៉ាស, អាវពេទ្យការពារកូវីត-១៩ ចំនួន ៣០០អាវ, មី ១០ កេសធំ, ត្រីខ កំប៉ុង ៥០យួរ និងទឹកបរិសុទ្ធ ១០០ កេស សម្រាប់ជាការចូលរួមប្រយុទ្ធប្រឆាំងកូវីដ-១៩ ៕
