តាមរយៈកិច្ចព្រមព្រៀងរវាង ទីភ្នាក់ងារសហប្រតិបត្តិការអន្តរជាតិនៃប្រទេសជប៉ុន ហៅកាត់ថា ចាយកា (JICA) និងមន្ទីរសាធារណការ និងដឹកជញ្ជូនខេត្តសៀមរាប នៅក្នុងតំបន់ផាប់ស្ទ្រីត នឹងចាប់ផ្តើមគម្រោងសាកល្បង សាងសង់កម្រាល និងចិញ្ចើមផ្លូវ ដោយប្រើបច្ចេកទេសបេតុងជ្រាបទឹក ក្នុងបំណងកាត់បន្ថយទឹកជំនន់ និងទឹកដក់ ដែលតែងកើតមានជាញឹកញាប់នៅក្នុងក្រុងសៀមរាប។
លោក សុខ ថុល នាយករដ្ឋបាលខេត្តសៀមរាប បានឱ្យដឹងថា គម្រោងសាកល្បងអំពីបច្ចេកវិទ្យាថ្មីសាងសង់កម្រាល និងចិញ្ចើមផ្លូវដោយបេតុងជ្រាបទឹកនេះ នឹងចាប់ផ្ដើមអនុវត្តនៅថ្ងៃទី១៣ កុម្ភៈនេះ តាមបណ្តោយផ្លូវ ២ធ្នូ ប្រវែង ៩៣ម៉ែត្រ ពីចំណុចប្រសព្វ តំបន់ផាប់ស្ទ្រីត ដល់មុខក្លោងទ្វារមន្ទីរពេទ្យបង្អែកខេត្តសៀមរាប។
តាមរយៈ ជំនួបពិភាក្សា និងធ្វើបទបង្ហាញ នៅរដ្ឋបាលខេត្តសៀមរាប រសៀលថ្ងៃទី១២ខែកុម្ភៈឆ្នាំ២០១៩ លោក គឹម ប៉ុណ្ណា ប្រធានមន្ទីរសាធារណៈការ និងដឹកជញ្ជូនខេត្ត មានប្រសាសន៍ថា៖ មន្ទីរបានលើកគម្រោងនេះ កាលពីចុងឆ្នាំ២០១៦ នៅខែមករាឆ្នាំ២០១៧ ចាយកា (JICA) បានមកទំនាក់ទំនង និងសិក្សាពីទីតាំង ក្រោមការសហការសម្របសម្រួលពីអាជ្ញាធរក្រុងសៀមរាប និងមានការជម្រុញរបស់ក្រសួងសាធារណៈការ និងដឹកដឹកជញ្ជូន ដែលបានផ្តោតសំខាន់ទៅលើតំបន់ក្នុងក្រុង ដែលមានទេសចរធ្វើដំណើរថ្មើរជើងច្រើន។
តាមការបញ្ជាក់របស់នាយករដ្ឋបាលខេត្តសៀមរាប ក្នុងនោះដែរ ឯកឧត្តម ទៀ សីហា អភិបាលខេត្តបានពិនិត្យអំពីបច្ចេកទេសខាងលើ ដែលបង្ហាញដោយក្រុមហ៊ុន អូមុរ៉ា សឺរ៉ាតិច (Omura Ceratec Co.,Ltd) និងបានគាំទ្រ ព្រមទាំងចាត់ទុកគម្រោងនេះ ថាមានសារសំខាន់ណាស់សម្រាប់ខេត្តទេសចរណ៍មួយនេះ។
លោកនាយករដ្ឋបាលបន្ថែមថា ក្រៅពីរៀបចំកម្រាល និងចិញ្ចើមផ្លូវតាមបច្ចេកទេស និងស្ដង់ដាជប៉ុននេះរួចរាល់ហើយ គម្រោងនេះក៏នឹងរៀបចំបែងចែកគន្លងគំនូសផ្លូវសម្រាប់អ្នកថ្មើរជើង ជនពិការ និងយានយន្ត តាមពណ៌កំណត់សម្គាល់ដាច់ដោយឡែកផងដែរ។
លោក សុខ ថុល បានបញ្ជាក់បន្ថែមថា ប្រសិនណាគម្រោងនេះបានជោគជ័យ រដ្ឋបាលខេត្តនឹងពិនិត្យពីលទ្ធភាពដើម្បីរៀបចំតាមផ្លូវសំខាន់ៗក្នុងក្រុងបន្ថែមទៀត តែលោកថា គម្រោងរបស់ ចាយកា នេះ ត្រូវចាយលុយច្រើន ដូច្នេះខេត្តនឹងរៀបចំអនុវត្តន៍គម្រោងនេះ ជាជំហានៗ៕
អត្ថបទ និង រូបថត ៖ លោក ម៉ាត់ អារីហ្វីន និង លោក យូ វង្ស
កែសម្រួលអត្ថបទ ៖ សេង ផល្លី
