អណ្ដូងទឹកស្អាតចំនួន៥កន្លែង (អណ្ដូងស្នប់អាហ្វ្រីដេស៍) ត្រូវបានប្រគល់ជូនដល់ប្រជាពលនៅសហគមន៍ ភូមិគោកដូងចាស់ ចំនួន២ ភូមិដូនអែម ចំនួន២ និងភូមិកំប្លើប ចំនួន១ ក្នុងឃុំគោកដូង ស្រុកអង្គរជុំ ខេត្តសៀមរាប កាលពីរសៀលថ្ងៃទី១២ ខែកុម្ភះ ឆ្នាំ២០១៩ ក្រោមវត្តមានរបស់លោកជំទាវបណ្ឌិត គួយ ណាលីន ឃឹមប៊ុនសុង អនុប្រធានគណៈកម្មាធិការសាខាកាកបាទក្រហមកម្ពុជា ខេត្តសៀមរាប និង សហការី ដែលជាអំណោយរបស់សាខាកាកបាទក្រហមកម្ពុជាខេត្តសៀមរាប ។
មានប្រសាសន៍ស្វាគមន៍របស់លោក លុក ផុស ប្រធានអនុសាខាកាកបាទក្រហមស្រុកអង្គរជុំ បានគូសបញ្ជាក់ថា នៅតាមបណ្តាសហគមន៍មួយចំនួន កំពុងប្រឈមទៅនឹងការខ្វះខាតទឹកស្អាតប្រើប្រាស់ដែលកន្លងមក ប្រជាពលរដ្ឋទាំងនោះបានប្រើប្រាស់ទឹកដែលគ្មានអនាម័យ ដូចជាអណ្តូងដៃតូចៗ ទឹកស្រះ និងទិញទឹកជាដើម ។
តាមសេចក្តីរាយការណ៍របស់សាខាកាកបាទក្រហមកម្ពុជាខេត្ត បានគូសបញ្ជាក់ថា អណ្ដូងទឹកស្អាតនេះជាអណ្ដូងទី ៤៩ ទី៥០ ទី៥១ ទី៥២ និងទី៥៣ របស់សាខាកាកបាទក្រហមកម្ពុជា ខេត្តសៀមរាប ហើយនេះក៏ជាអណ្ដូងទឹកស្អាតអាហ្វ្រីដេស៍ទី២៦ ទី២៧ ទី២៨ ទី២៩ និងទី៣០ ដែលផ្តល់ជូនបងប្អូនប្រជាពលរដ្ឋ ក្នុងសហគមន៍ទាំងបី ក្នុងឃុំគោកដូង ស្រុអង្គរជុំនេះ ។
ព័ត៌មានជាតិ ថ្មីៗ
ជាមួយនឹងការនាំយកការផ្តាំផ្ញើ សួរសុខទុក្ខ នៃសម្ដេចកិត្តិព្រឹទ្ធបណ្ឌិត ប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ក្នុងឱកាសប្រគល់អំណោយអណ្តូងទឹកស្អាតទាំងនោះ លោកជំទាវបណ្ឌិត គួយ ណាលីន ឃឹម ប៊ុនសុង បានមានប្រសាសន៍ថា កាកបាទក្រហមកម្ពុជា តែងតែបានយកចិត្តទុកដាក់គិតគូរចំពោះសុខទុក្ខប្រជាពលរដ្ឋងាយរងគ្រោះនិងរងគ្រោះគ្រប់ៗរូប និង គ្រប់ស្ថានភាពប្រឈមទាំងអស់ ដោយមិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយអ្វីនោះឡើយ ។
លោកជំទាវបណ្ឌិតក៏បានសង្កត់ធ្ងន់ចំពោះ បញ្ហាសុខភាពមាតា ទារក និង ស្ត្រីមានផ្ទៃពោះ ក៏ដូចប្រជាពលរដ្ឋទូទៅ ត្រូវបងប្អូនមានការប្រុងប្រយ័ត្នខ្ពស់ អំពីសុខភាព ដោយងាយទទួលរងជម្ងឺផ្សេងៗ តែបើមានជម្ងឺត្រូវប្រញាប់នាំកូនចៅ ទៅកាន់មណ្ឌលសុខភាពដែលនៅជិតបងប្អូនក្នុងការសង្គ្រោះអាយុជីវិត និង ត្រូវហូបស្អាត ផឹកស្អាត មានអនាម័យល្អ ក្នុងការកាត់បន្ថយការចំណាយថវិកាក្នុងក្រុមគ្រួសារ ហើយក៏ត្រូវចេះសម្អាត ថែរក្សាអណ្ដូង ទឹកស្អាតនេះ ដើម្បីបានប្រើប្រាស់យូរអង្វែងតរៀងទៅសមនឹងពាក្យស្លោក “ការប្រើប្រាស់ទឹកស្អាត និងមានអនាម័យ នាំឲ្យគ្រួសារមានសុខភាពល្អ និងមានសុភមង្គល” ។
ក្នុងពិធីប្រគល់អណ្តូងទឹកស្អាតនេះដែរ លោកជំទាវបណ្ឌិត បាននាំយកអំណោយ ចែកជូនដល់បងប្អូនប្រជាពលរដ្ឋដែលចូលរួម ចំនួន១៣៥នាក់ ដោយម្នាក់ៗទទួលបាន សារុង១ និងថវិកា១ម៉ឺនរៀលផងដែរ៕
អត្តបទនិងរូបថត៖ម៉ី សុខារិទ្ធ ភា្នក់ងារខេត្តសៀមរាប
