ថ្លែងក្នុងពិធីវេទិកាសាធារណៈ ស្ដីពីយុវជនរួមគ្នាកាត់បន្ថយអំពើហឹង្សា ដែលធ្វើឡើងនៅវិទ្យាល័យ១០មករា១៩៧៩នៅព្រឹកថ្ងៃទី១៤ខែកុម្ភៈឆ្នាំ២០១៩នេះ លោកស្រី យូ សុភា អភិបាលរងខេត្តសៀមរាប បានមានប្រសាសន៍ថា ថ្ងៃ១៤កុម្ភៈ មិនមែនជាថ្ងៃបុណ្យសង្សានោះទេ គឺជាទិវាថ្ងៃនៃក្ដីស្រលាញ់របស់ប្រទេសអឺរ៉ុប ហើយ Valentine’s Day ជាពិធីបុណ្យមួយ របស់ជនជាតិនៅប៉ែកអឺរ៉ុប ប៉ុន្តែបច្ចុប្បន្នប្រជាជនស្ទើរតែទូទាំងពិភពលោក ក៏តែងប្រារព្ធដូចគ្នា ដូច្នេះសូមសិស្សានុសិស្ស កុំយកវប្បធម៌នេះ ទៅធ្វើអ្វីផ្ដេសផ្ដាស ដែលនាំឲ្យបាត់បង់តម្លៃស្ដ្រីខ្មែរ ពិសេសបាត់បង់នូវវប្បធម៌ប្រពៃណីដ៏ល្អផូរផង់របស់ខ្មែរ ។
លោកស្រី យូ សុភា មានប្រសាសន៍ទៀតថា Valentine’s Day ឬ ទិវាបុណ្យនៃសេចក្តីស្រឡាញ់ មនុស្សជាច្រើន តែងយកថ្ងៃនេះ បង្ហាញពីទឹកចិត្តរបស់ខ្លួន ចំពោះអ្នកដែលគេស្រឡាញ់ តាមរយៈការទិញកាដូ , បាច់ផ្កា ឬចំណាយពេលទៅក្រៅញ៉ាំអាហារ ជាមួយគ្នាយ៉ាងរ៉ូមែនទិក ខណៈនៅក្នុងប្រទេសកម្ពុជា ក៏មានយុវវ័យជាច្រើន កំពុងតែយល់ច្រឡំថា ថ្ងៃ Valentine’s Day គឺជាថ្ងៃដែលត្រូវលះបង់ខ្លួនប្រាណ ជូនដល់មនុស្សជាទីស្រឡាញ់របស់ខ្លួនទៅវិញ ដែលមានន័យសំដៅ ដល់ការបង្ហាញនូវភក្តីភាពស្នេហា រវាងគូស្នេហ៍ ចំពោះគ្នា និងគ្នា តាមរយៈការទិញ ផ្កាកូលាប ឬវត្ថុអនុស្សាវរីយ៏ ឬចំណាយពេលនៅជិតគ្នា ហើយវប្បធម៌នេះ មិន មែនជាវប្បធម៌របស់ខ្មែរនោះទេ ប៉ុន្ដែយើងត្រូវយកទិវានេះទៅផ្ដល់ជូនជាមួយក្រុមគ្រួសារ មាតាបិតាទៅវិញជាការប្រសើរ ។
លោកស្រី យូ សុភា មានប្រសាសន៍បន្ថែមទៀតថា សមត្ថកិច្ចនៅខេត្ដសៀមរាប បានដាក់ម្លាំងសម្រាប់ឃ្លាំមើលសិស្សានុសិស្សទៅដេកនៅផ្ទះសំណាក់គ្រប់ទីកន្លែង ប៉ុន្ដែទោះជាយ៉ាងណា តាមការសង្កេតឃើញនៅខេត្ដសៀមរាប នៅថ្ងៃValentine’s Day ១៤កុម្ភៈឆ្នាំ២០១៩នេះ ហាក់មិនសូវបានធ្វើឲ្យយុវជនអាច ពុះកញ្ច្រោលបានច្រើនប៉ុន្មានទេ ដែលមានន័យថា ពួកគាត់បានយល់ដឹងច្បាស់ពីវប្បធម៌បរទេសមួយនេះច្បាស់លាស់ ៕
ព័ត៌មានជាតិ ថ្មីៗ
អត្ថបទ និង រូបថត ៖ លោក ឃុត សៅ
កែសម្រួលអត្ថបទ ៖ លោក លីវ សាន្ត
