ថ្លែងនៅក្នុង សិក្ខាសាលាស្តីពី“ការផ្លាស់ប្ដូរបទពិសោធន៍លើការដោះស្រាយវិវាទដីធ្លី របស់ ក្រុមការងារដោះស្រាយវិវាទដីធ្លីចល័ត ដែលបានរៀបចំធ្វើឡើងនៅសាលាខេត្តសៀមរាប ថ្ងៃទី១៣ ខែកុម្ភៈឆ្នាំ២០១៩ លោក ពិន ប្រាកដ អភិបាលរងខេត្ត បានលើកឡើងថា៖ ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាល បានខិតខំធ្វើការកែទម្រង់លើគ្រប់វិស័យក្នុងនោះ រួមទាំងកំណែទម្រង់វិស័យដីធ្លីផងដែរ។
ជាមួយគ្នានេះ រាជរដ្ឋាភិបាល ក៏បានរៀបចំតាក់តែង និងដាក់ឲ្យចូលជាធរមាននូវច្បាប់ អនុក្រឹត្យ និងលិខិតបទដ្ឋានគតិយុត្តនានា ពាក់ព័ន្ធនឹងការគ្រប់គ្រងដីធ្លី។ ទន្ទឹមនឹងការកសាងលិខិតបទដ្ឋាន ដើម្បីជាឧបករណ៍សម្រាប់គ្រប់គ្រងដីធ្លី រាជរដ្ឋាភិបាល ក៏បានបង្កើតយន្តការសម្រាប់ដោះស្រាយ ជាពិសេសគណៈកម្មការសុរិយោដីទាំងបីថ្នាក់ ក្នុងគោលបំណង តាមដាន និងដោះស្រាយទំនាស់ដីធ្លីក្រៅប្រព័ន្ធតុលាការ ដែលកន្លងមកបានអនុវត្តដោយអន្លើរៗ។
លោក អភិបាលរងខេត្ត បន្តថា៖ យន្តការទាំងអស់នេះ នៅតែពុំទាន់ឆ្លើយតបទៅនឹងស្ថានភាពទំនាស់ដីធ្លីនាពេលបច្ចុប្បន្ន ដោយសារកំណើននៃទំនាស់ដីធ្លី បានកើតឡើងជាបន្តបន្ទាប់ពីមួយថ្ងៃទៅមួយថ្ងៃ។ ការកើនឡើងជាបន្តបន្ទាប់នេះ ដោយសារ៖
ទី១-ខ្វះការយកចិត្តទុកដាក់របស់អាជ្ញាធរមូលដ្ឋានក្នុងការគ្រប់គ្រងដីធ្លីក្នុងដែនសមត្ថកិច្ចរបស់ខ្លួន។
ទី២-ខ្វះការយល់ដឹងក្នុងការប្រើប្រាស់យន្តការគណៈកម្មការសុរិយោដីថ្នាក់ក្រុង ស្រុក និងខេត្ត។
ទី៣-ខ្វះឆន្ទះក្នុងការចូលរួមដោះស្រាយរវាងប្រជាពលរដ្ឋ និងអាជ្ញាធរមូលដ្ឋាន។
ទី៤-ខ្វះការយល់ដឹងអំពីច្បាប់ និងលិខិតបទដ្ឋានគិតយុត្ត។
ជាការពិត ទំនាស់ដីធ្លីនាពេលបច្ចុប្បន្ននេះ មានភាពស្មុគស្មាញដោយសារបងប្អូនប្រជាពលរដ្ឋ ពុំទាន់យល់ដឹងអំពីច្បាប់់ និងនីតិវិធីនៃការប្តឹង មានន័យថា បណ្តឹងតែមួយ ពួកគាត់យកទៅដាក់ប្តឹងគ្រប់ទីកន្លែង ជាពិសេស ពួកគាត់ ប្តឹងទៅរដ្ឋសភា ព្រឹទ្ធសភា ក្រសួង ស្ថាប័ន ថ្នាក់ជាតិដោយពួកគាត់ពុំបានប្តឹងមកយន្តការដោះស្រាយថ្នាក់ក្រុង ស្រុក និងខេត្តឡើយ។
ថ្លែងក្នុងឱកាសនោះ ឯកឧត្តម ទេព ធន រដ្ឋលេខាធិការ ក្រសួងរៀបចំដែនដីនគរូបនីយកម្ម និង សំណង់ និងជាអគ្គលេខាធិការ អាជ្ញាធរជាតិដោះស្រាយវិវាទដីធ្លី មានប្រសាសន៍ថា៖ការដោះស្រាយវិវាទដីធ្លីជូនប្រជាពលរដ្ឋ នៅតែជាការងារអាទិភាពរបស់ក្រសួង ដែលតម្រូវឲ្យមន្ត្រីរាជការគ្រប់លំដាប់ថ្នាក់បន្តខិតខំបន្ថែមទៀតដោយត្រូវចុះពិនិត្យ ស្រាវជ្រាវ អង្គហេតុឲ្យបានច្បាស់លាស់ និងព្យាយាមដោះស្រាយជួយឲ្យគូរភាគីវិវាទ បានសម្រុះសម្រួលនឹងគ្នាបង្កើតភាពសុខដុមក្នុងសហគមន៍ និងក្នុងសង្គមជាតិទាំងមូល។
ឯកឧត្តម ទេព ធន បានជម្រុញដល់មន្ត្រីមន្ទីររៀបចំដែនដី នគរូបនីយកម្ម សំណង់ និងសុរិយោដីនិងក្រុមការងារដោះស្រាយវិវាទដីធ្លីចល័ត ត្រូវមានភាពម្ចាស់ការ ក្នុងការរៀបចំផែនការដោះស្រាយក្នុងភូមិសាស្ត្ររបស់ខ្លួន ហើយក្រុមការងារដោះស្រាយវិវាទដីធ្លីចល័ត ក៍ត្រូវអនុវត្តតាមលិខិតបទដ្ឋានគតិយុត្តនានា ជាមួយគ្នានោះ មន្ត្រីក៍គួរខិតខំស្វែងយល់នូវបទដ្ឋានគតិយុត្តរបស់ក្រសួងពាក់ព័ន្ឋលើការងារដោះស្រាយវិវាទដីធ្លី ហើយរាល់ការដោះស្រាយត្រូវតម្លើងផែនទីទីតាំងវិវាទ ដើម្បីងាយស្រួលក្នុងការកំណត់ទីតាំងមានទំនាស់ និងទីតាំងដែលមិនពាក់ព័ន្ឋ។
សូមជម្រាបថា៖សិក្ខាសាលា “ការផ្លាស់ប្ដូរបទពិសោធន៍លើការដោះស្រាយវិវាទដីធ្លី របស់ ក្រុមការងារដោះស្រាយវិវាទដីធ្លីចល័ត”រៀបចំដោយ នាយកដ្ឋានកិច្ចការវៅវាទដីធ្លីនៃអគ្គនាយកដ្ឋានសុរិយោដីនិងភូមិសាស្ត្រ ក្រសួងរៀបចំដែនដី នគរូបនីយកម្មនិងសំណង់ មានរយៈពេលបីថ្ងៃនៅខេត្តសៀមរាប ដោយមានសិក្ខាកាមចូលរួម ជាអ្នកអនុវត្តផ្ទាល់មកពីមន្ទីររៀបចំដែនដី នគរូបនីយកម្ម សំណង់ និងសុរិយោដី តាំង២៥រាជធានីខេត្ត និងអាជ្ញាធរមូលដ្ឋាន ក្រុងស្រុកនៃខេត្តសៀមរាបសរុបចំនួន១៣០រូប ដើម្បីផ្លាស់ប្តូរបទពិសោធនិងចែករំលែកចំណេះដឹងឲ្យគ្នាទៅវិញទៅមក។
វគ្គសិក្ខាសាលានេះ ធ្វើឡើងក្នុងគោលបំណងផ្តល់ចំណេះដឹងជូនសិក្ខាកាមឲ្យបានជ្រាបពីបេសកកម្មរបស់មន្ត្រីក្នុងការសម្របសម្រួលដោះស្រាយវិវាទដីធ្លី និងយកចំណេះដឹងនិងបទពិសោធដែលទទួលបានពីអង្គសិក្ខាសាលាយកទៅដោះស្រាយវិវាទដីធ្លីនៅតាមមូលដ្ឋានឲ្យកាន់តែប្រសើរឡើង ប្រកបដោយប្រសិទ្ឋភាព សមភាព និងយុត្តិធម៌។
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក សេង ផល្លី
