នៅថ្ងៃទី១៤ ខែសីហា ឆ្នាំ២០២១ នៅតាមបណ្ដោយផ្លូវកូម៉ៃ ឬផ្លូវ WN-03 ក្រុមការងារសាងសង់ នៃគម្រោងហេដ្ឋារចនាសម្ព័ន្ធផ្លូវ ៣៨ខ្សែ បាននិងកំពុងបន្តសាកល្បងក្រាលផ្លូវកៅស៊ូបេទីម ដើម្បីធ្វើតេស្ត និងពិនិត្យលើគុណភាពល្បាយកៅស៊ូ ខណៈមានភ្លៀវធ្លាក់ខ្លាំងក្នុងក្រុងសៀមរាបស្ទើររៀងរាល់ថ្ងៃនៅសប្ដាហ៍ចុងក្រោយនេះ។
យោងតាមរបាយការណ៍ វឌ្ឍនភាព ស្ដីពីគម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែ របស់ក្រសួងសាធារណការ និងដឹកជញ្ជូន កាលពីថ្ងៃទី២៦ ខែសីហា ឆ្នាំ២០២១ បង្ហាញថាដំណើរការសាងសង់ហេដ្ឋារចនាសម្ព័ន្ធផ្លូវ ៣៨ខ្សែ ក្នុងក្រុងសៀមរាប សរុបរួមបានជាង ៧៥ភាគរយ ក្នុងនោះការងារសាងសង់ផ្លូវដំណើរបាន ជិត៧៦ភាគរយ ការងារសាងសង់ប្រព័ន្ធទឹកកខ្វក់ និងលូទឹកភ្លៀង សាងសង់បានជាង ៩៧ភាគរយ និងការរៀបចំប្រព័ន្ធបណ្ដាញ តម្លើងបង្គោលភ្លើងបំភ្លឺផ្លូវ និងភ្លើងសញ្ញាចរាចរណ៍ ដោយជីកកប់នូវបំពង់សម្រាប់រត់ខ្សែអគ្គិសនី និងប្រព័ន្ធបណ្ដាញទិន្នន័យ សម្រេចបាន៥៥ភាគរយ។
តាមរបាយការណ៍ដដែលនេះ ក៏បានបង្ហាញផងដែរនូវបញ្ហាមួយចំនួន ដែលបាននិងកំពុងបង្កឱ្យប៉ះពាល់ដល់ដំណើរការសាងសង់គម្រោងខាងលើរួមមាន ការរាលដាល នៃជំងឺកូវីដ-១៩ ក្នុងខេត្ត កើនឡើងច្រើន ផលរំខានដោយអាកាសធាតុដោយសារមានភ្លៀងធ្លាក់ច្រើន ការដ្ឋានប៉ះពាល់ដល់ការរស់នៅ និងប្រកបអាជីវកម្មប្រចាំថ្ងៃរបស់ប្រជាពលរដ្ឋ ចរាចរណ៍មមាញឹក ប៉ះពាល់ដើមឈើធំៗ ដែលមានអាយុកាលវែង ។ល។
គួរជម្រាបថា គម្រោងសាងសង់ហេដ្ឋារចនាសម្ព័ន្ធផ្លូវ ៣៨ខ្សែ ក្នុងក្រុងសៀមរាប ផ្ដល់ដោយសម្ដេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងបើកការដ្ឋានជាផ្លូវការនៅថ្ងៃទី៣០ ខែវិច្ឆិកា ឆ្នាំ២០២០ ដោយប្រើប្រាស់ថវិកាជាតិ ១៥០លានដុល្លារអាមេរិច និងប្រើប្រាស់រយៈពេលសាងសង់ ១៣ខែ។
អត្ថបទ និងរូបថត ៖ លោក ម៉ី សុខារិទ្ធ
កែសម្រួលអត្ថបទ ៖ លោក សេង ផល្លី
