លោក នួន ពុទ្ធារ៉ា អភិបាលក្រុងសៀមរាប បានណែនាំអោយអាជីវករទាំងអស់ក្នុងក្រុងសៀមរាបត្រូវលក់ដោយការវិចខ្ចប់ជូនដល់ភ្ញៀវ ដើម្បីជាចូលរួមទប់ស្កាត់ ការចម្លងមេរោគកូវីដ-១៩ និងដើម្បីសុវត្ថិភាពទាំងអស់គ្នា នៅក្នុងសហគមន៍ ខណៈដែលក្រុងទេសចរណ៍មួយនេះមានការឆ្លងជំងឺកូវីដ១៩ធ្ងន់ធ្ងរ។ លោកអភិបាលក្រុងសៀមរាប លើកឡើងបែបនេះ ក្នុងឱកាសដឹកនាំក្រុមការងារចម្រុះ ចុះពិនិត្យមើលគោលដៅបិទខ្ទប់ និងល្បាតពិនិត្យមើលការអនុវត្តន៍ នៃការកំណត់ “តំបន់លឿងទុំ” នៅក្នុងភូមិសាស្ត្រក្រុងសៀមរាប ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ កាលពីយប់ថ្ងៃទី១៣ ខែកញ្ញា ឆ្នាំ២០២១នេះ។
លោក នួន ពុទ្ធារ៉ា មានប្រសាសន៍ថា ចាប់តាំងពីម៉ោង ១០ព្រឹក រហូតដល់ម៉ោង២១យប់ ថ្ងៃទី១៣ ខែកញ្ញា ឆ្នាំ២០២១នេះ ក្រុមការងារបានចុះពិនិត្យមើលការលក់ដូររបស់អាជីវករ និងតំបន់គោលដៅបិទខ្ទប់ក្នុងក្រុងសៀមរាប ដើម្បីណែនាំដល់ក្រុមអ្នកលក់ដូរ មិនឲ្យភ្ញៀវជួបជុំហូបអាហារនៅកន្លែងលក់ផ្ទាល់ ដោយអោយម្ចាស់អាជីវកម្មវិចខ្ចប់អាហារដល់ភ្ញៀវយកទៅទទួលទាននៅផ្ទះ ឬយកទៅនៅកន្លែងផ្សែងៗគ្នា ទៅតាមការណែនាំរបស់រាជរដ្ឋាភិបាល និងក្រសួងសុខាភិបាលដែលហាមមិនអោយប្រមូលផ្ដុំគ្នា ដើម្បីកាត់ផ្ដាច់នៃការឆ្លងជំងឺកូវីដ-១៩ ។
លោកអភិបាលក្រុងសៀមរាប បានបន្ដថា ក្នុងការចុះត្រួតពិនិត្យនេះដែរ ក្រុមការងារចម្រុះក៏បានធ្វើកិច្ចសន្យាណែនាំដល់ម្ចាស់អាជីវកម្មដ្ឋាន បានចំនួនប្រមាណ៥០ទីតាំង នៅក្នុងក្រុងសៀមរាប ឲ្យអោយពួកគាត់លក់ដូរតាមរបៀបគន្លងថ្មី គឺវេចខ្ចប់ ដោយមិនអនុញ្ញាតិឲ្យភ្ញៀវ ឬអតិថិជន អង្គុយជួបជុំ នៅនឹងកន្លែងឡើយ និងអនុវត្តន៍ អោយបានត្រឹមត្រូវតាមការណែនាំរបស់ក្រសួងសុខាភិបាល និងវិធានការ ៣កុំ ៣កាពារ ដើម្បីរួមគ្នាកាត់ផ្តាច់កុំអោយមានករណីឆ្លងកូវីដ-១៩ កុំឲ្យឆ្លងបន្តនៅក្នុងសហគមន៍យើង។ បន្ទាប់ពីធ្វើកិច្ចសន្យាណែនាំរួចហើយ ក្នុងករណីម្ចាស់អាជីវកម្មដ្ឋានណាមួយ នៅតែបន្តល្មើសម្ចាស់អាជីវកម្មដ្ឋាននោះ នឹងប្រឈមមុខចំពោះការផាកពិន័យ ឬការអនុវត្តវិធានការរដ្ឋបាលជាធរមាន។
ព័ត៌មានជាតិ ថ្មីៗ
សូមជម្រាបថា ក្រុងសៀមរាបត្រូវបានបិទខ្ទប់និងដាក់កំណត់ជាតំបន់លឿងទុំរយៈពេល៧ថ្ងៃ គិតចាប់ពីថ្ងៃទី១១ ខែកញ្ញា រហូតដល់ថ្ងៃទី ១៨ ខែកញ្ញា ឆ្នាំ២០២១ ក្នុងគោលបំណងដើម្បីទប់ស្កាត់ការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រខេត្តសៀមរាប បន្ទាប់ពីមានការរីករាលដាលនូវជំងឺកូវីដ-១៩ យ៉ាងធ្ងន់ធ្ងរគួរអោយព្រួបារម្ភក្នុងមួយរយៈចុងក្រោយនេះ៕
អត្ថបទ និង រូបភាព៖ លោក ឈិត សាវី
