ជាការចូលរួមចំណែកក្នុងសកម្មភាពមនុស្សធម៏ជាមួយ ក្រសួងព័ត៌មាន លោក លៀវ លីអូ ប្រធានក្រុមប្រឹក្សាភិបាលសារព័ត៌មាន អាស៊ី-ប៉ាស៊ីហ្វិក ថែមស៍ AP Time ប្រទេសចិន បាននាំយកនូវអង្ករចំនួន ៥ តោន មកប្រគល់ជូន ដល់ ឯកឧត្តម ខៀវ កាញារីទ្ធ រដ្ឋមន្រ្តី ក្រសួងព័ត៌មាន ចែកជូនដល់ប្រជាពលរដ្ឋ តាមមូលដ្ឋានស្រុក កោះសូទិន ខេត្តកំពង់ចាម នៅព្រឹកថ្ងៃទី១៤ ខែកញ្ញា ឆ្នាំ ២០២១ នាទីស្តីការក្រសួងព័ត៌មាន ។
កាលពីថ្ងៃទី២១ ខែកក្កដា ឆ្នាំ ២០២១ ក្រសួងព័ត៌មានដែលបានអនុញ្ញាតអោយគេហទំព័រព័ត៌មានភាសាចិន អាស៊ី-ប៉ាស៊ីហ្វិក ថែមស៍ AP Time ដំណើរ ការផ្សាយនៅកម្ពុជា ដែលផ្តោតសំខាន់លើដំណឹងស្តីពី គោលនយោបាយ សេដ្ឋកិច្ចពាណិជ្ជកម្ម ការវិនិយោគនានារបស់ប្រទេសចិននៅកម្ពុជា។ ជាមួយនេះ សារព័ត៌មាន AP Time នឹងជួយផ្សព្វផ្សាយពីភាពរីកចម្រើនប្រទេសកម្ពុជា ទៅកាន់ពិភពលោកបានដឹងច្បាស់បន្ថែមទៀត និងជួយទាក់ទាញភ្ញៀវទេសចរ និងអ្នកវិនិយោគិនចិនមកកម្ពុជាបានច្រើនបន្ថែមទៀត។ ឆ្លៀតក្នុងឱកាសនោះ លោក លៀវ លីអូ បានធ្វើការគោរពស្នើសុំមតិយោបល់ពី ឯកឧត្តមរដ្ឋមន្រ្តី ដើម្បីធ្វើយ៉ាងណាអភិវឌ្ឍអង្គភាពសារព័ត៌មាន AP Time បានកាន់តែរីកចម្រើនហើយអាចចូលរួមពង្រីកផ្នែកសេដ្ឋកិច្ច តាមរយះការទាក់ទាញ វិនិយោគគិន ពីប្រទេសចិនមកកម្ពុជា។ ប្រធានក្រុមប្រឹក្សាភិបាលសារព័ត៌មាន AP Time បានគាំទ្រចំពោះ ការលើកឡើងរបស់ ឯកឧត្តម ខៀវ កាញារីទ្ធ កាលពីពេលកន្លងមក អំពីគម្រោងចង់អោយក្រុមហ៊ុនពិនិត្យលទ្ធភាពជួយធ្វើការបង្រៀនភាសាចិន ដល់កូនចៅប្រជាពលរដ្ឋ នៅតាមទីជនបទ មានជីវភាពខ្វះខាតបានសិក្សារៀនសូត្រ ភាសាចិន ព្រោះកម្មវិធីនេះ ធ្លាប់មានម្តងរួចមក ហើយដោយមានការជួយពីកាសែតចិនមួយតែបញ្ចប់ទៅវិញ។
ទាក់ទងកិច្ចការងារនេះ ឯកឧត្តម រដ្ឋមន្រ្តី ខៀវ កាញារីទ្ធ នឹងធ្វើការពិនិត្យរកតំបន់ណាមួយ ដើម្បីអោយខាងថ្នាក់ដឹកនាំ សារព័ត៌មាន AP Time ចុះទៅដោយផ្ទាល់ ដើម្បីអោយឈានទៅអនុវត្តន៏ ក្នុងគម្រោងបង្រៀនភាសាចិននាពេលខាងមុខឆាប់ៗនេះ។ ឯកឧត្តម រដ្ឋមន្រ្តី បានចាត់ទុកសារព័ត៌មាន AP Time ជាស្ពាននៃទំនាក់ទនងល្អរវាងកម្ពុជាចិន។ ឯកឧត្តម ខៀវ កាញារីទ្ធ បានសំដែងនូវការអរគុណចំពោះ លោក លៀវ លីអូ ប្រធានក្រុមប្រឹក្សាភិបាលសារព័ត៌មាន AP Time ដែលបានផ្តល់នូវអង្ករ ចំនួន៥ តោន ជូនដល់ក្រសួងព័ត៌មាន ដើម្បីទុកចែកជូនដល់ប្រជាពលរដ្ឋ តាម មូល ដ្ឋានស្រុកកោះសូទិន ខេត្តកំពង់ចាម៕
