លោកជំទាវ ម៉ាន ចិន្តា រដ្ឋលេខាធិការក្រសួងកិច្ចការនារី មានប្រសាសន៍ថា អំពើហិង្សាគ្រប់ទម្រង់ និងអំពើហិង្សាទាក់ទងទៅនឹងយេនឌ័រ គឺជាកង្វល់ និងជាបញ្ហារួមដែលទាមទារឲ្យមានការចូលរួមពីគ្រប់សមាសភាព ដើម្បីទប់ស្កាត់និងកាត់បន្ថយ ព្រោះអំពើហិង្សាគ្រប់ទម្រង់ បាននាំមកនូវផលប៉ះពាល់ទាំងក្នុងគ្រួសារនិងសង្គម ហើយវាអាចធ្វើឱ្យបាត់បង់ពេលវេលា កាត់បន្ថយប្រាក់ចំណូល និងនាំមកនូវអន្តរាយដល់សុខភាពក្នុងសមាជិកគ្រួសារ បើទោះបីជាបច្ចុប្បន្ននេះ ប្រទេសជាតិយើងមានការរីកចម្រើនគួរឱ្យកត់សម្គាល់ក៏ដោយ ក៏ប៉ុន្តែស្ត្រីនិងក្មេងស្រី នៅតែជាជនងាយរងគ្រោះ ជួបប្រទះបញ្ហាប្រឈមមួយចំនួននៅឡើយ ដូចជាការរំលោភបំពានផ្លូវភេទ ការជួញដូរផ្លូវភេទ ការបោកបញ្ឆោត ការរើសអើងភាពក្រីក្រ និងសុខភាពទន់ខ្សោយជាដើម ដូច្នេះ ក្នុងនាមក្មួយៗជាអ្នកបន្តវេន ត្រូវកសាងប្រទេសជាតិឱ្យមានសុខសន្តិភាព និងការរីកចម្រើន តាមរយៈការចូលរួមកាត់បន្ថយនូវការប្រព្រឹត្តអំពើហិង្សាលើស្ត្រី និងកុមារ ក៏ដូចជាកាត់បន្ថយនូវរាល់ទម្រង់រើសអើងស្ត្រីក្នុងគ្រួសារ និង សង្គមជាតិទាំងមូល។
លោកជំទាវ ម៉ាន ចិន្តា មានប្រសាសន៍យ៉ាងដូច្នេះ ក្នុងវេទិកានារីរតនៈ ស្តីពីយុវជនរួមគ្នាកាត់បន្ថយអំពើហិង្សា ដែលរៀបចំដោយនាយកដ្ឋានព័ត៌មាននៃក្រសួងកិច្ចការនារី សហការជាមួយរដ្ឋបាលខេត្តសៀមរាប កាលពីរសៀលថ្ងៃទី១៤ខែកុម្ភៈ ឆ្នាំ២០១៩ម្សិលមិញនេះ ដោយមានសិស្សចូលរួមពីសិស្សានុសិស្សនៅវិទ្យាល័យចំណេះទូទៅ និង បច្ចេកទេសពួក ក្នុងស្រុកពួក ចំនួន១៤០នាក់ ក្នុងបំណងបញ្ជ្រាបការយល់ដឹងអំពីអំពើហិង្សាគ្រប់ទម្រង់ ដល់ស្រទាប់យុវជន ដើម្បីឱ្យពួកគាត់យល់ដឹងរួមគ្នាទប់ស្កាត់ និងកាត់បន្ថយ។
លោកជំទាវ ម៉ាន ចិន្តា មានប្រសាសន៍ទៀតថា ឆ្នាំ២០១៩នេះ ជាដំណាក់កាលប្រវត្តិសាស្ត្រមួយសម្រាប់ការលើកកម្ពស់សមភាពយេនឌ័រនៅកម្ពុជា ដោយរាជរដ្ឋាភិបាលបានដាក់ចេញនូវគោលនយោបាយជាតិ ស្តីពីសមភាពយេនឌ័រលើកដំបូង ការប៉ាន់ប្រមាណយេនឌ័រនៅកម្ពុជាឆ្នាំ២០១៨ និងផែនការសកម្មភាពជាតិ ស្តីពីការទប់ស្កាត់អំពើហិង្សាលើស្ត្រីលើកទី៣ (២០១៩-២០២៣) ដែលក្រសួងកិច្ចការនារីជាអ្នកដឹកនាំ រៀបចំឯកសារគោលនយោបាយទាំងបីនេះ ក្រោមកិច្ចសហការជាមួយក្រសួង ស្ថាប័ន អង្គការសង្គមស៊ីវិលនិងដៃគូរអភិវឌ្ឍនានា ។
លោកស្រី យូ សុភា អភិបាលរងខេត្ត បានមានប្រសាសន៍ថា ដើម្បីឆ្លើយតបទៅនឹងប្រធានបទខាងលើសុំឱ្យក្មួយៗដែលជាទំពាំងស្នងឫស្សី ត្រូវប្រឹងប្រែងយកចិត្តទុកដាក់ស្តាប់ និងកត់ត្រាទុក ដើម្បីជាសារយកទៅផ្សព្វផ្សាយបន្តដល់មិត្តភក្ត្រ បងប្អូនរបស់យើងនៅក្នុងសាលា ក៏ដូចជានៅតាមគេហដ្ឋាន រួមគ្នាកាត់បន្ថយ និងទប់ស្កាត់អំពើហិង្សាក្នុងគ្រួសារ និងអំពើហិង្សាគ្រប់ទម្រង់ ព្រោះថាអំពើហិង្សាក្នុងគ្រួសារ និងអំពើហិង្សាទាក់ទងទៅនឹងយេនឌ័រ និយាយជារួមគ្រប់ទម្រង់នៃអំពើហិង្សា សុទ្ឋតែជាបញ្ហានិងក្តីកង្វល់របស់យើងទាំងអស់គ្នា ដែលទាមទាររួមគ្នាទប់ស្កាត់និងកាត់បន្ថយ ដូច្នេះតាមរយៈនៃវេទិកានេះ ពិតជាមានសារៈសំខាន់ណាស់សម្រាប់ក្មួយៗ ហើយតាមរយៈសារអប់រំ ជាផ្នែកមួយដែលអាចជួយឱ្យក្មួយៗ យកទៅអនុវត្ត និងផ្សព្វផ្សាយបន្ត ដើម្បីក្លាយជាកូនល្អ សិស្សល្អ មិត្តល្អ ពលរដ្ឋល្អនិងយុវវ័យល្អ ចេះស្តាប់ដំបូន្មានឱពុកម្តាយលោកគ្រូអ្នកគ្រូនិងចាស់ព្រឹទ្ឋាចារ្យ ៕
អត្ថបទ រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
