នារសៀលថ្ងៃទី១៤ ខែកុម្ភៈ ឆ្នាំ២០១៩នេះ លោក លីវ សុខុន ប្រធានមន្ទីរព័ត៌មានខេត្តសៀមរាប បានអនុញ្ញាតឱ្យមន្ត្រីនៃអង្គការក្រុមការងារដើម្បីដោះស្រាយទំនាស់ ដែលហៅកាត់ជាភាសាបរទេសថា ACT ដឹកនាំដោយកញ្ញា ខន សុភី ប្រធានគម្រោង ចូលជួបសម្ដែងការគួរសម និង ពិភាក្សាការងារមួយចំនួន នៅមន្ទីរព័ត៌មានខេត្តសៀមរាប ។
កញ្ញា ខន សុភី មានប្រសាសន៍ថា ឆ្លើយតបទៅនឹងអនុសាសន៍របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលជំរុញឲ្យអ្នកសារព័ត៌មានរួមគ្នាប្រយុទ្ធ ទប់ស្កាត់ព័ត៌មានក្លែងក្លាយ ដូច្នេះ គោលបំណងថ្ងៃនេះ គឺសុំការគាំទ្រពីថ្នាក់ដឹកនាំមន្ទីរព័ត៌មានខេត្តសៀមរាប ចំពោះសកម្មភាពរបស់អង្គការក្រុមការងារដើម្បីដោះស្រាយទំនាស់ តាមរយៈគម្រោងប្រព័ន្ធផ្សព្វផ្សាយដើម្បីសន្តិភាព ដែលនឹងបន្តសកម្មភាពលើការពង្រឹងសមត្ថភាពដល់អ្នកសារព័ត៌មាន និង វិធីសាស្ត្រទប់ស្កាត់ព័ត៌មានក្លែងក្លាយនៅក្នុងវិស័យបណ្ដាញផ្សព្វផ្សាយសង្គម ក្នុងរយៈពេល៣ឆ្នាំ ពីឆ្នាំ២០១៩ ដល់ឆ្នាំ២០២១ លើតំបន់គោលដៅចំនួន៦ នៃរាជធានីនិងខេត្ត រួមមាន ៖ រាជធានីភ្នំពេញ , ខេត្តកំពង់ឆ្នាំង , ខេត្តបាត់ដំបង , ខេត្តសៀមរាប , ខេត្តមណ្ឌលគីរី និង ខេត្តព្រះសីហនុ ខណៈដែលសកម្មភាពរបស់អង្គការក្រុមការងារដើម្បីដោះស្រាយទំនាស់ ទទួលបានការគាំទ្រពីក្រសួងព័ត៌មានរួចហើយ ។
កញ្ញា ខន សុភី មានប្រសាសន៍ទៀតថា សម្រាប់ការងាររយៈពេល៣ឆ្នាំនេះ អង្គការក្រុមការងារដើម្បីដោះស្រាយទំនាស់ តាមរយៈគម្រោងប្រព័ន្ធផ្សព្វផ្សាយដើម្បីសន្តិភាព នឹងបណ្ដុះបណ្ដាល និង ធ្វើការងារជិតស្និទ្ធជាមួយតំណាងមន្ទីរព័ត៌មានចំនួន១២រូប ដែលមកពីមន្ទីរព័ត៌មានរាជធានី និង ខេត្ត ទាំង៦នេះ ហើយក្រៅពីនេះ គម្រោងនឹងបណ្ដុះបណ្ដាលដល់អ្នកសារព័ត៌មាន និង អ្នកដែលធ្វើការនៅក្នុងប្រព័ន្ធផ្សព្វផ្សាយ រួមមានវិទ្យុ , ទូរទស្សន៍ , គេហទំព័រ , កាសែត និង ទស្សនាវដ្ដី ចំនួន១៥ស្ថាប័ន ដើម្បីពង្រឹងសមត្ថភាពផ្នែកសន្តិភាព និង សារព័ត៌មានសន្តិភាព ។
ព័ត៌មានជាតិ ថ្មីៗ
ជាការឆ្លើយតប លោក លីវ សុខុន មានប្រសាសន៍ថា ក្នុងនាមមន្ទីរដែលជាស្ថាប័នរបស់រដ្ឋ ដែលបានធ្វើការស្នូលផ្អែកលោកគោលការណ៍របស់រាជរដ្ឋាភិបាល សូមគាំទ្រ និង រីករាយសហការចំពោះសកម្មភាពរបស់អង្គការក្រុមការងារដើម្បីដោះស្រាយទំនាស់ ដែលធ្វើសកម្មភាពលើការពង្រឹងសមត្ថភាពដល់អ្នកសារព័ត៌មាន និង វិធីសាស្ត្រទប់ស្កាត់ព័ត៌មានក្លែងក្លាយនៅក្នុងវិស័យបណ្ដាញផ្សព្វផ្សាយសង្គម ព្រោះថា ដើម្បីធ្វើឲ្យព័ត៌មានមានសន្តិភាព អ្នកដែលធ្វើការនៅក្នុងប្រព័ន្ធផ្សព្វផ្សាយ ត្រូវមានសមត្ថភាពជំនាញខាងសរសេរព័ត៌មាន និង មានក្រមសីលធម៌វិជ្ជាជីវៈ ។
លោក លីវ សុខុន មានប្រសាសន៍ទៀតថា តាមរយៈនៃគម្រោងនេះ លោកសង្ឃឹមថា ចាប់ពីពេលនេះតទៅ រាល់ព័ត៌មានទាំងអស់ដែលបានផ្សាយនៅក្នុងប្រព័ន្ធផ្សព្វផ្សាយទាំងអស់នោះ សុទ្ធតែជាព័ត៌មានពិត ជឿជាក់បាន ជាពិសេសជាព័ត៌មាន ដែលគ្រប់ភាគីពាក់ព័ន្ធទទួលយកបាន ហើយរួមគ្នាដោះស្រាយដោយសន្តិវិធី ប៉ុន្តែសំខាន់ សុំឲ្យអង្គការក្រុមការងារដើម្បីដោះស្រាយទំនាស់ គោរពតាមគោលការណ៍ច្បាប់ នៃព្រះរាជាណាចក្រកម្ពុជា ដើម្បីធានាសណ្ដាប់ធ្នាប់ និង របៀបរៀបរយសាធារណៈ ៕
អត្ថបទ ៖ លោក លីវ សាន្ត
រូបថត ៖ សហការី
